ءداستۇرلى ءانشى, «دارىن» مەملەكەتتىك جاستار سىيلىعىنىڭ لاۋرەاتى اسقار مۇقيات ەسىمى ستۋدەنت كەزىنەن-اق جاقسى تانىلا باستادى. كۇمبىرلەگەن قوڭىر داۋىسى قازاقتىڭ كەڭ دالاسىن ەسكە تۇسىرەتىندەي ەرەكشە تارتىمدى ءھام بوياۋعا باي اۋەزدىلىگىمەن تىڭداعان جاننىڭ قۇلاق قۇرىشىن قاندىراتىن. ۇستازى, قازاقستاننىڭ حالىق ءارتىسى قايرات بايبوسىنوۆ شەبەرحاناسىنان شىڭدالىپ شىققان ءدۇلدۇل دارىن قازاق ۇلتتىق ونەر ۋنيۆەرسيتەتىن بىتىرگەننەن كەيىن دە تىڭدارمانىن تامسانتۋىن تامامداعان جوق.
تالاي بايقاۋلاردا توپ جارىپ, جەڭىس تۇعىرىندا جارقىرادى. ۇنەمى ىزدەنىستە جۇرەتىن ءان جۇيرىگىنىڭ ونەردەگى قارىمدى قادامىن ايگىلەگەن تاعى ءبىر جارقىن جوبا – وزبەكستاننىڭ «وۆۋز» (داۋىس) بايقاۋى. ءدال قازىرگى ۋاقىتتا ءجۇرىپ جاتقان ءان بايقاۋىندا اسقار مۇقيات قازاق ەلىنىڭ اتىنان جالعىز قاتىسىپ جاتىر. ول جوبانىڭ العاشقى كەزەڭىندە ابايدىڭ «جارق ەتپەس قارا كوڭىلىم نە قىلسا دا» ءانىن شىرقاپ, قازىلار القاسىنىڭ ءبىراۋىزدان قولداۋىنا يە بولدى.
ساراپشىلار قۇرامىندا وتىرعان وزبەكستاننىڭ مادەنيەت ءمينيسترى ءھام حالىق ءارتىسى وزودبەك نازاربەكوۆ, اتى اڭىزعا اينالعان ايگىلى «ياللا» ءانسامبلىنىڭ كوريفەيى, حالىق ءارتىسى فارۋح زاكيروۆ, وزبەكستاننىڭ اتاقتى ءانشىسى سەۆارا نازارحان, «بولالار» (بالالار) توبىنىڭ مۇشەسى, تانىمال ءانشى تاحير سادىقوۆ سىندى ونەر مايتالماندارىن بۇگىنگى قازاق ءانشىسى تاڭ قالدىردى. تالانت داۋسىنا تاڭداي قاعىپ, ىقىلاسىن جاۋدىرعان ساراپشىلار القاسى ءبىراۋىزدان انشىگە ىقىلاس بەردى.
اۋزىن اشقاننان اسقارعا اينالايىنىن جاۋدىرعان وزبەكستاننىڭ حالىق ءارتىسى فارۋح زاكيروۆ: ء«سىز ءان ايتقاندا بۇكىل قازاقستاننىڭ شەكسىز كەڭىستىگى, كەڭ دالاسى مەن بيىك تاۋلارى كوز الدىمىزعا كەلدى. بۇل, ارينە, ەڭ الدىمەن ءسىزدىڭ تۋما تالانتىڭىز بەن شەبەرلىگىڭىزدىڭ ارقاسىندا. داۋىسىڭىز عاجاپ ەكەن. قازاقتا مۇنداي عاجاپ داۋىس يەلەرى كوپ. بۇل – سونىڭ جارقىن مىسالى. ءسوزسىز, جەڭىسكە ءۇمىتىڭىز مول» دەپ تامسانسا, ءانشى سەۆارا نازارحان: «مەن ءۇشىن بۇل ءاندى قالاي ناقىشىنا كەلتىرىپ, شەبەر جەتكىزگەنىڭىز ماڭىزدى بولدى. ءسىزدى قازاقتىڭ وزگە ورىنداۋشىلارىمەن سالىستىرا المايمىن. ءسىز – ەرەكشەسىز, جالعىزسىز! ءدال وسى ءان ارقىلى ەرەكشە ەكەنىڭىز كورىنىپ تۇر. ءسىزدى تىڭداپ وتىرىپ باسىما سان ءتۇرلى ويلار كەلدى, بولاشاقتا سىزبەن جان-جاقتى جۇمىس ىستەگەن بولار ەدىم» دەپ بىرلەسە ونەر تۋدىرۋ ماقساتىن دا ايتىپ قالدى.
ال اسقاردىڭ ءوزى بولسا سىپايى عانا ءىلتيپات ءبىلدىرىپ, جوبا ەرەجەسى بويىنشا ءتورت ساراپشىنىڭ اراسىنان تاڭداۋىن جاسادى. ءانشى وزودبەك نازاربەكوۆتىڭ توبىنا قوسىلدى. الدا ءان بايقاۋى جالعاسادى. قىزۋ تارتىس ەندى باستالاتىن ءتۇرى بار. سەبەبى ايتۋلى بايقاۋعا بىرنەشە ەلدىڭ انشىلەرى قاتىسىپ جاتىر. كەلەسى كەزەڭ – باتل, ياعني ءان ايتىسى. 500 ۇمىتكەردىڭ ىشىنەن ىرىكتەلىپ الىنعان 48 ونەرپاز ءوزارا جۇپتاسىپ ونەر كورسەتەدى. اسقاردىڭ بۇل كەزەڭدەگى جۇبى ارميان ءانشىسى بولماق.