قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ ەۋرازيالىق ۇكىمەتارالىق كەڭەس وتىرىسىنا قاتىسۋ ماقساتىندا مينسكىگە باردى.
ساپار بارىسىندا بەلارۋس رەسپۋبليكاسىنىڭ پرەمەر-ءمينيسترى رومان گولوۆچەنكومەن ەكى مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى ىسكە اسىرۋ ماسەلەلەرى بويىنشا كەزدەسۋ ءوتتى. ساۋدا-ەكونوميكالىق, ونەركاسىپ, اوك, تسيفرلاندىرۋ سالالارىنداعى ىنتىماقتاستىقتى نىعايتۋ, سونداي-اق مادەني-گۋمانيتارلىق ءوزارا ءىس-قيمىل ماسەلەلەرى تالقىلاندى. ەكىجاقتى تاۋار اينالىمى بىلتىر 912 ملن دوللاردى قۇرادى. ساۋدا اعىندارىن ءارتاراپتاندىرۋ جانە جەتكىزىلەتىن تاۋارلار نومەنكلاتۋراسىن كەڭەيتۋ شارالارى قارالدى. قازاقستان شامامەن 265 ملن دوللار سوماسىنا 105 تاۋار پوزيتسياسى بويىنشا ەكسپورتتى ۇلعايتۋعا دايىن.
اۋىل شارۋاشىلىعى ماشينالارىن جاساۋ سالاسىنداعى بىرلەسكەن جوبالار — ەكىجاقتى ىنتىماقتاستىقتىڭ ماڭىزدى باعىتى. بۇگىنگى تاڭدا جالپى قۇنى 200 ملن دوللاردان اساتىن تراكتورلار مەن كومباينداردى جانە وزگە دە تەحنيكانى قۇراستىرۋ بويىنشا 11 جوبا ىسكە اسىرىلدى, 1,6 مىڭ جۇمىس ورنى اشىلعان. تاراپتار قازاق-بەلارۋس ارىپتەستىگىنىڭ قارقىندى دامۋىن قامتاماسىز ەتۋ ءۇشىن كوپجوسپارلى جۇمىستى جالعاستىرۋ نيەتىن راستادى.
ولجاس بەكتەنوۆ «بەلاگرو-2024» حالىقارالىق كورمەسىنە قاتىسىپ, «ەۋرازيالىق ەكونوميكالىق وداقتىڭ ازىق-ت ۇلىك قاۋىپسىزدىگى» پلەنارلىق سەسسياسىندا ءسوز سويلەدى. سەسسياعا رەسەي, قىرعىزستان, وزبەكستان, بەلارۋس, ازەربايجان ۇكىمەتتەرىنىڭ باسشىلارى, ارمەنيا ۆيتسە-پرەمەرى, سونداي-اق ەۋرازيالىق ەكونوميكالىق كوميسسيا القاسىنىڭ توراعاسى قاتىستى.
پرەمەر-مينيستر اتاپ وتكەندەي, حالىقتى ساپالى ءارى قاۋىپسىز ازىق-ت ۇلىكپەن قامتاماسىز ەتۋ باستى مىندەت بولىپ قالا بەرمەك. قازاقستان ورتالىق ازياداعى استىق پەن ۇننىڭ نەگىزگى ءوندىرۋشىسى بولا وتىرىپ, ءوزىنىڭ اۋىل شارۋاشىلىعى سالاسىنداعى الەۋەتىن جاھاندىق ازىق-ت ۇلىك تۇراقتىلىعىن قامتاماسىز ەتۋ ءۇشىن پايدالانادى. قازاقستان الەمدىك ازىق-ت ۇلىك ەكسپورتتاۋشىلارىنىڭ توپ-25 قاتارىنا كىرەدى. وتاندىق اۋىل شارۋاشىلىعى ونىمدەرى الەمنىڭ 80 ەلىنە, سونىڭ ىشىندە ورتالىق ازيا مەن ەاەو ەلدەرىنە جەتكىزىلەدى. ونىڭ ەكسپورتى سوڭعى 5 جىلدا ەكى ەسەگە ءوسىپ, 5,4 ملرد دوللارعا جەتتى.
«ەلىمىزدى دامىتۋدىڭ ستراتەگيالىق باسىمدىقتارىنىڭ ءبىرى – اگروونەركاسىپ كەشەنى. مەملەكەت باسشىسى قاسىم-جومارت توقاەۆ قازاقستان ۇكىمەتىنىڭ الدىنا ىشكى قاجەتتىلىكتى تولىق قامتاماسىز ەتىپ, ەكسپورت كولەمىن ودان ءارى ارتتىرا وتىرىپ اۋىل شارۋاشىلىعى سالاسىن تەرەڭ وڭدەۋ دەڭگەيىنە جەتكىزۋ مىندەتىن قويدى. ەلىمىز 2026 جىلعا قاراي اۋىل شارۋاشىلىعى ونىمدەرىنىڭ ەكسپورتىن ەكى ەسەگە ۇلعايتۋدى ماقسات ەتىپ وتىر. بۇل رەتتە بىزدەگى ەكسپورتتىڭ قۇرىلىمى بەلسەندى تۇردە وزگەرتىلىپ, تەرەڭ وڭدەۋ ونىمدەرىنە باسىمدىق بەرىلەدى. ءبىز قازاقستاندا لوكاليزاتسيالاۋمەن بىرلەسكەن قايتا وڭدەۋ وندىرىستەرىن اشۋعا مۇددەلىمىز», دەپ اتاپ ءوتتى ولجاس بەكتەنوۆ.
قازاقستان پرەمەر-ءمينيسترى ەاەو-عا قاتىسۋشى ەلدەردىڭ 600 ملن-عا جۋىق ادامنىڭ ازىق-ت ۇلىككە دەگەن قاجەتتىلىگىن قامتاماسىز ەتۋ جونىندەگى الەۋەتىنە نازار اۋداردى. ول ءۇشىن وداققا قاتىسۋشى بارلىق مەملەكەتتىڭ قاجەتتىلىكتەرى مەن مۇددەلەرىن ەسكەرە وتىرىپ, ۇلتتىق دەڭگەيلەردە ازىق-ت ۇلىك جەتكىزۋ تاسىلدەرىن ۇيلەستىرۋ قاجەت.
«وزىق حالىقارالىق ستاندارتتارعا سايكەس كەلەتىن باسەكەگە قابىلەتتى, ەكولوگيالىق جانە ەكسپورتقا باعدارلانعان ءونىم شىعارۋ ءۇشىن تىعىز كووپەراتسيالىق بايلانىس ورناتۋ ءبىزدىڭ نەگىزگى مىندەتتەرىمىزدىڭ ءبىرى بولۋعا ءتيىس. ورتالىق ازيا ارقىلى جاڭا لوگيستيكالىق باعىتتاردى ودان ءارى دامىتۋ جانە قىتايعا جەتكىزەتىن قولدانىستاعى باعىتتاردىڭ وتكىزۋ قابىلەتىن ارتتىرۋ پەرسپەكتيۆالاردى كەڭەيتە تۇسپەك», دەپ اتاپ ءوتتى ۇكىمەت باسشىسى.
ولجاس بەكتەنوۆ لوگيستيكا مەن ساقتاۋ جاعدايلارىنا بايلانىستى اۋىل شارۋاشىلىعى ءونىمىن جوعالتۋ ماسەلەسىن شەشۋ, سونداي-اق جاھاندىق جىلىنۋ, سۋ تاسقىنى مەن قۇرعاقشىلىق سەكىلدى ماۋسىمدىق سىن-تەگەۋرىندەردى ساراپتامالىق باعالاۋ جۇمىستارىن ەسكەرە وتىرىپ, اگروازىق-ت ۇلىك جۇيەلەرىنىڭ تۇراقتىلىعىن نىعايتۋ ءۇشىن قاجەتتى شارالارعا توقتالدى. سونىمەن قاتار قازىرگى زامانعى اگرارلىق عىلىمدى دامىتۋ جانە اوك-تە يننوۆاتسيالاردى بەلسەندى تۇردە ەنگىزۋ ماسەلەسى ەرەكشە اتاپ ءوتىلدى.
سونداي-اق «بەلاگرو-2024» كورمەسىندە قازاقستان رەسپۋبليكاسىنىڭ ۇلتتىق ەكسپوزيتسياسى دا قارالدى. وندا كومبايندار, تراكتورلار, جاڭبىرلاتىپ سۋارۋ اپپاراتتارى سەكىلدى وتاندىق اۋىل شارۋاشىلىعى تەحنيكالارى مەن اوك تەرەڭ وڭدەۋ ونىمدەرى ۇسىنىلعان. بۇعان قوسا قازاقستاندىق اگرارلىق عىلىمي زەرتتەۋ ينستيتۋتتارىنىڭ عىلىمي جەتىستىكتەرى, ماسەلەن, ەگىستىكتەردى وڭدەۋ ءۇشىن قولدانىلاتىن درون, سەلەكتسيالىق جەتىستىكتەردىڭ پاتەنتتەرى, ونىڭ ىشىندە المانىڭ 4 سۇرپى كورسەتىلدى.