پرەزيدەنت قاسىم-جومارت توقاەۆ الماتى قالاسىنىڭ اكىمى ەربولات دوساەۆتى قابىلدادى. مەملەكەت باسشىسىنا الماتىنىڭ بيىلعى قاڭتار-ءساۋىر ايلارىنداعى الەۋمەتتىك-ەكونوميكالىق دامۋىنىڭ الدىن الا قورىتىندىسى تۋرالى ەسەپ بەرىلدى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنتكە وسى كەزەڭدە الماتى ەكونوميكاسىنىڭ نەگىزگى سالالارىنداعى ءوسىم قارقىنى جوعارى بولعانى تۋرالى باياندالدى. اتاپ ايتقاندا, كولىك قىزمەتىنىڭ كولەمى 17,5 پايىزعا, قۇرىلىس 5,7 پايىزعا جانە بايلانىس باعىتى 4,4 پايىزعا وسكەن. مەگاپوليس ەكونوميكاسىنا 360 ميلليارد تەڭگە جەكە ينۆەستيتسيا تارتىلعان. ءوسىم 5,8 پايىزدى قۇرادى.
سونىمەن قاتار قاسىم-جومارت توقاەۆقا بيىل ءساۋىر ايىندا الماتىداعى جىلدىق ينفلياتسيا 9,1 پايىزعا دەيىن باسەڭدەگەنى تۋرالى مالىمەت بەرىلدى. جىل باسىنان بەرى 19,5 مىڭ جۇمىس ورنى اشىلعان. بۇل جۇمىسسىزدىق دەڭگەيىن 4,7 پايىزعا دەيىن تومەندەتۋگە مۇمكىندىك بەردى.
ەربولات دوساەۆ شاھارداعى كەيبىر اۋدانداردى سۋمەن تۇراقتى قامتاماسىز ەتۋ ءۇشىن قابىلدانىپ جاتقان شارالار تۋرالى ايتتى. بيىل اقپان ايىندا قالانىڭ جوعارعى بولىگىن سۋمەن قامتۋ جونىندەگى رەزەرۆ سحەماسىن جاساۋ جۇمىستارى باستالدى. قۇرىلىستى وسى جىلدىڭ 1 شىلدەسىنە دەيىن اياقتاۋ جوسپارلانىپ وتىر. ال «بالقاش» تازا سۋ رەزەرۆۋارى پايدالانۋعا بەرىلىپ, «يۋبيلەينىي», «كامەنسكوە پلاتو» جانە باسقا دا اۋداندارعا سۋ جەتكىزىلە باستادى.
بۇدان بولەك, پرەزيدەنتكە الماتىنىڭ كولىك قۇرىلىمىن قالىپتاستىرۋ اياسىندا قولعا الىنعان جوبالار توپتاماسىنىڭ جۇزەگە اسىرىلۋ بارىسى باياندالدى.
كەزدەسۋ سوڭىندا قاسىم-جومارت توقاەۆ الماتى ەكونوميكاسىن ءارتاراپتاندىرۋ ءۇشىن ينۆەستيتسيا تارتۋ, باعا تۇراقتىلىعىن قامتاماسىز ەتۋ جانە ينفلياتسيا مولشەرىن ودان ءارى تومەندەتۋ جۇمىستارىن جالعاستىرۋدى تاپسىردى. سونداي-اق قالانى سۋمەن قامتۋ ماسەلەسىن ايرىقشا باقىلاۋدا ۇستاۋ قاجەت ەكەنىن ايتتى.