مەملەكەت باسشىسى قاسىم-جومارت توقاەۆ دسۇ باس ديرەكتورى نگوزي وكوندجو-يۆەالامەن كەزدەستى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنت قاسىم-جومارت توقاەۆ نگوزي وكوندجو-يۆەالاعا ءىلتيپات بىلدىرە وتىرىپ, قازاقستان دۇنيەجۇزىلىك ساۋدا ۇيىمىمەن ىنتىماقتاستىقتى كەڭەيتۋگە ايرىقشا ءمان بەرەتىنىن اتاپ ءوتتى.
ء«سىزدىڭ باسشىلىعىڭىزبەن كوپجاقتى حالىقارالىق ساۋدا جۇيەسى قازىرگى كەدەرگىلەردى جويۋعا جانە تەڭ جاعداي جاساۋعا باعىتتالعان ۇلكەن ترانسفورماتسيادان وتەتىنىنە سەنىمدىمىز. ءسىزدىڭ الماتىعا ساپارىڭىزدىڭ ماڭىزى زور. وسى مۇمكىندىكتى پايدالانا وتىرىپ, تىعىز ىنتىماقتاستىعىمىز ءۇشىن وزىڭىزگە ريزاشىلىعىمدى بىلدىرگىم كەلەدى. ۇيىمعا مۇشە ەلدەر مينيسترلەرىنىڭ 12-ءشى كونفەرەنتسياسىنا توراعالىق ەتۋ – قازاقستان ءۇشىن ۇلكەن جاۋاپكەرشىلىك ءارى مارتەبە. اتالعان جيىن بارىسىندا دسۇ مۇشەلەرى ۇيىمدى رەفورمالاۋ تۋرالى ماڭىزدى شەشىمدەر قابىلداي الدى», دەدى پرەزيدەنت.
مەملەكەت باسشىسىنىڭ ايتۋىنشا, كۇشەيىپ كەلە جاتقان جاھاندىق پروتەكتسيونيزم مەن ساۋدا شەكتەۋلەرىنە قاراماستان, قازاقستان ەكونوميكاسى اشىق ەل رەتىندە ءوز پوزيتسياسىن نىعايتا تۇسۋگە ۇمتىلادى. قازىرگى كەزدە ءبىز الەمنىڭ 180 ەلىمەن ساۋدا-ساتتىق جاسايمىز. سوڭعى ءۇش جىلدا ەلىمىزدىڭ سىرتقى ساۋداسىنىڭ كولەمى 53 پايىزعا ۇلعايىپ, 160 ميلليارد دوللارعا جەتتى.
پرەزيدەنت جۋىردا ەكونوميكانى ىرىقتاندىرۋ جونىندەگى شارالار تۋرالى جارلىققا قول قويعانىن جەتكىزدى. بۇل قۇجات ءادىل باسەكەنى كۇشەيتۋگە, كاسىپكەرلىك ەركىندىكتى ساقتاۋعا جانە مەملەكەتتىڭ ەكونوميكاداعى ۇلەسىن ازايتۋعا باعىتتالعان.
ءوز كەزەگىندە نگوزي وكوندجو-يۆەالا دسۇ-عا مۇشە ەلدەر مينيسترلەرىنىڭ 12-ءشى كونفەرەنتسياسىنىڭ توراعاسى رەتىندە حالىقارالىق ساۋدا سالاسىنداعى ماڭىزدى شەشىمدەردى قابىلداۋعا قازاقستاننىڭ قوسقان ۇلەسىن جوعارى باعالادى.
پرەزيدەنت وسى كۇندەرى الماتىدا ءوتىپ جاتقان ورتالىق ازيانىڭ ساۋدا ساياساتى جونىندەگى ەكىنشى فورۋمىنىڭ وڭىردەگى ەكونوميكالىق ىنتىماقتاستىق پەن ساۋدا-ساتتىقتى ىلگەرىلەتۋ, سونداي-اق كورشىلەس ەلدەردى كوپجاقتى ساۋدا جۇيەسىنە ينتەگراتسيالاۋ تۇرعىسىنان ءمانى زور ەكەنىنە نازار اۋداردى.
كەزدەسۋ سوڭىندا قاسىم-جومارت توقاەۆ نگوزي وكوندجو-يۆەالانىڭ كوپجاقتى ساۋدا جۇيەسىن جانە دۇنيەجۇزىلىك ساۋدا ۇيىمىنىڭ ءرولىن نىعايتۋ ىسىنە قوسقان ۇلەسىن قازاقستان تاراپى جوعارى باعالايتىنىن اتاپ ءوتىپ, ونى ءىى دارەجەلى «دوستىق» وردەنىمەن ماراپاتتادى.