بۇگىن ەل تاريحىنداعى ەڭ ازالى كەزەڭنىڭ ءبىرى – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى.
دەرەكتەرگە سۇيەنسەك, حح عاسىردىڭ ءبىرىنشى جارتىسىندا 125 مىڭنان استام ادام قۋعىن-سۇرگىنگە ۇشىرادى. ولاردىڭ 25 مىڭدايى اتىلدى. وسى قارالى جىلدارى ەلىمىز كولەمىندە گۋلاگ-تىڭ 20-دان استام لاگەرى ورنالاستى. جازىقسىز جازالانعاندار قاتارىندا كوپتەگەن مەملەكەت جانە قوعام قايراتكەرى, ۇلت زيالىسى بولدى. ۇلتىمىز الاپات اشتىقتىڭ دا زاردابىن تارتىپ, ورنى تولماس شىعىنعا ۇشىرادى. ۇجىمداستىرۋ ناۋقانى قازاق بايتاعىن بۇرىن-سوڭدى بولماعان اسا اۋقىمدى اپاتقا ۇرىندىردى.
سوڭعى جىلدارى حالقىمىز باستان كەشكەن ناۋبەت جىلداردىڭ سەبەپ-سالدارىنا تاعى دا ءبىر تەرەڭ ءۇڭىلىپ, شىنايى باعا بەرۋ ءۇردىسى تىڭ قارقىنمەن بەلەڭ الدى. وعان پرەزيدەنت ق.توقاەۆتىڭ «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا تۋرالى» جارلىعى ەسەلەپ ەكپىن بەردى. كوميسسيا جۇمىسىنىڭ نەگىزگى باعىتتارى بەلگىلەنىپ, ماقسات-مىندەتتەرى ايقىندالعان سوڭ, ءتۇرلى باعىتتا ەلەۋلى جۇمىس اتقارىلدى.
شاڭ باسىپ جاتقان ارحيۆتىك قۇجاتتار جۇيەلەنىپ, سارالانىپ, توم-توم زەردە كىتاپتارى جارىققا شىقتى. بۇرىنعىلارعا قوسىمشا 311 مىڭ زاڭسىز قۋعىن-سۇرگىنگە ۇشىراعان ازامات اقتالدى. زۇلمات جىلدارعا عىلىمي باعا بەرۋ, جازىقسىز قۇربان بولعانداردى ءادىل, نەگىزدى اقتاۋ جۇمىستارى ءالى دە جالعاسادى. سولاقاي ساياساتتان جاپا شەككەن وتانداستارىمىزعا قاتىستى تاريحي ادىلەتتىك قايتكەندە قالپىنا كەلۋگە ءتيىس. بۇل – مەملەكەتتىڭ دە, قوعامنىڭ دا پارىزى.
تاريحىمىزداعى ناۋبەتتى كەزەڭ تۋرالى تاعىلىم ءبىزدى بىرىكتىرە تۇسەدى. وسى رەتتە قازاقستانداعى ءتۇرلى ەتنوس وكىلدەرىنىڭ تار زامانداعى قيىندىقتارى دا زەرتتەلىپ-زەردەلەنە بەرەدى. ءبىز ارقاشان ساياسي قۋعىن-سۇرگىن جانە اشتىق قۇرباندارىنىڭ رۋحىنا تاعزىم ەتىپ, ەسىمدەرىن ماڭگى ەستە ساقتايمىز.