بۇل ءتۇنى ىستانبۇل ءتۇبى ءبىر تۇركىنىڭ ەمەس, كۇللى الەمنىڭ رۋحاني ورتالىعىنا اينالعانداي. جەر-جاھاننىڭ تۇكپىر-تۇكپىرىنەن اسىعا جەتكەن ءنوپىر حالىق انىمەن جۇرەكتەرگە جىلۋ قۇيعان انشىسىنە جانكۇيەر بولۋعا تۇركيانىڭ ايگىلى «بەشيكتاش» ستاديونىنا جينالدى. التى الاشتىڭ الاقانىنان اسىپ شىعىپ, التى قۇرلىقتىڭ قىمباتىنا اينالعان ءدۇلدۇل ديماشتىڭ ءان كەشى عوي سەبەبى.
كونتسەرت ۋاقىتى 21.00 دەپ بەلگىلەنگەن. بىراق ستاديون الدىن كەشكى ساعات التىدان باستاپ تولتىرعان تىڭدارمان كونتسەرت باستالعانشا «بەشيكتاش» ءتورىن ۇلكەن مەرەكەگە ۇلاستىردى. الەمنىڭ تۇكپىر-تۇكپىرىنەن جينالعان حالىق سانىندا شەك جوق. ءتۇرلى توسىنسىيلارىمەن تاڭعالدىرعان ديماش جانكۇيەرلەرى – «Dearsتىڭ» دۋمانى ءتىپتى ەرەكشە. ءانشىنىڭ بەينەسى سالىنعان ءتۇرلى بۇيىمدار, دەنەدە بەدەرلەنگەن سان الۋان سۋرەتتەر, ديماش ءانىن جاتقا شىرقاعان التى قۇرلىقتىڭ اقەدىل پەيىلى مەن شىنايى ونەرگە دەگەن شەكسىز ماحابباتى شىنىمەن-اق كوڭىل تولقىتادى. «ماحاببات بەر ماعان» دەپ قازاقشا ءان سالعان بۇل قالىڭ ءنوپىردىڭ ۇلتى مەن ۇلىسىن, ويى مەن تالعامىن ءبىر ارنادا توعىستىرعان ورتاق ءتىن – شىنايى ونەرگە دەگەن ماحاببات ەدى.
ءيا, بۇل كۇن – ەرەكشە كۇن, تاريحي ءسات. ءاربىر جەكە كونتسەرتى ۇلكەن ونەر وقيعاسى رەتىندە وتەتىندىگىنە ۇيرەنىپ العان ءانشى تىڭدارماندارى ديماشتىڭ «Stranger» شوۋىن اسىعا كۇتتى. ونىڭ ۇستىنە ديماش جانكۇيەرلەرى ءدال وسى كۇنى ءانشىنىڭ 30 جاسقا تولعان مەرەيتويىن دا بىرگە تويلاۋ مارتەبەسىنە يە بولىپ وتىر. ءبىر سوزبەن ايتقاندا, بۇل كونتسەرت – ديماشتىڭ, ونىڭ وتباسى مەن دوستارىنىڭ, ارىپتەستەرىنىڭ جانە الەمنىڭ تۇكپىر-تۇكپىرىنەن كەلگەن مىڭداعان جانكۇيەردىڭ كوپتەن كۇتكەن ايرىقشا كەزدەسۋى.
حوش, سونىمەن ساعات ءتىلى ىستانبۇل ۋاقىتىمەن 20.00-ءدى سوققاندا بىرنەشە اي دەمىن ىشىنە تارتىپ كۇتكەن كورەرمەن ءۇشىن ايگىلى ستاديوننىڭ ەسىگى دە ايقارا اشىلدى. قۇشاعىنا 42 مىڭ كورەرمەندى ەركىن قابىلدايتىن الىپ عيمارات ءوز تاريحىندا وسى كۇنگە دەيىن نەبىر تالانتتى ونەر مايتالماندارىنا ساحناسىن ۇسىنىپ, داڭق شىڭىنا كوتەرىلۋىنە جول سالعان. ولاردىڭ قاتارىندا ءمۇسىلىم ماگوماەۆ, مايكل دجەكسون سىندى مەگاجۇلدىزدار بار. ايتۋلى اڭىز انشىلەر ونەر كورسەتىپ, لىق تولى كورەرمەن جيناعان ىستانبۇلدىڭ ايگىلى «بەشيكتاش» ستاديونىنا سول اڭىزداردىڭ جالعاسى بولىپ, وردا بۇزعان وتىزىندا قازاقتىڭ ديماشى كوتەرىلدى. ىعى-جىعى حالىقتىڭ قيمىلى ساپ تىيىلىپ, ستاديون ىشىندەگى تىرشىلىكتى ەندى قۇلاق تۇندىرار قوشەمەت ءۇنى قۇمىقتىردى.
«Stranger» شوۋ-كونتسەرتى اتاۋى ايتىپ تۇرعانداي, شىنىمەن-اق ءانشىنىڭ بۇعان دەيىن تىڭدارمانىنا بەيمالىم بولىپ كەلگەن بەيتانىس قىرلارىن پاش ەتكەن, ونەردە شەكارا بولمايتىنىن دالەلدەگەن عالامات كەش بولدى. مۋزىكانىڭ سان الۋان جانرىندا ەركىن كوسىلىپ, تابىستى تاجىريبەسىن تانىستىرعان ديماشتىڭ تالعامى مەن ينتەللەكتۋالدىق دەڭگەيى قانداي قۇرمەتكە دە لايىق. كەش بويى كونتسەرت تىزگىنىن قولىنا الىپ, قازاق, اعىلشىن, تۇرىك تىلدەرىندە ەركىن كوسىلگەن ءانشى نوتانىڭ دا كوپ ءانشى بويلاي بەرمەيتىن شىڭدارىنان ءۇن قاتتى. ونىڭ «ۇمىتىلماس كۇن», ەڭ كولەمدى تۋىندىسى «The Story Of One Sky», سونداي-اق جاقىندا جارىق كورگەن «Smoke» جانە «When I`Ve Got You» تۋىندىلارى دا بۇگىن ەرەكشە ستيلدە ورىندالدى. شىڭىلتىر ءۇننىڭ تازالىعى سونداي, ساف ونەرگە باس يگەن كورەرمەن ءۇش جارىم ساعات بويى سىلتىدەي تىنا كلاسسيكالىق مۋزىكاعا كوڭىل قويدى, ديماشقا قوسىلىپ, بىرگە ءان شىرقادى.
شوۋ-باعدارلامادا ءانشىنىڭ قۇرمەتتى دوسى, كومپوزيتور يگور كرۋتويدىڭ تۋىندىلارى ەرەكشە ورىن الدى. «Olimpico» اتتى ايبىندى كانتاتا مەن «Ave Maria» شەبەر ۆوكاليزاتسياسى ۇلكەن الاڭنىڭ اركاسىنىڭ استىندا وتە ادەمى جانە كەڭ كولەمدە شىرقالسا, ديماش پەن كومپوزيتور كرۋتويدىڭ شىعارماشىلىق تاندەمىن بەينەلەيتىن كلاسسيكالىق دىبىستى ۇلتتىق قازاقىلىقپەن ۇيلەستىرەتىن «Stranger» تۋىندىسى شوۋ-باعدارلاماسىنىڭ شارىقتاۋ شىڭى بولدى دەسەك, ارتىق ايتقاندىعىمىز ەمەس. ال جانكۇيەرلەردىڭ ەرەكشە سۇيىسپەنشىلىگىنە يە بولعان «ليۋبوۆ ۋستاۆشيح لەبەدەي» ءانى بۇل كۇنى بۇكىل كورەرمەننىڭ قوسىلۋىمەن ايرىقشا سيپاتتا قايتا شىرقالدى.
«Stranger» شوۋ-باعدارلاماسىن سونىمەن قاتار تۋعان كۇن يەسىنىڭ قوناقتارى مەن دوستارىنىڭ توسىنسىيلارى مەن قويىلىمدارى ودان ءارى اسەرلەندىرە ءتۇستى. اتاپ ايتساق, ونەر يەسىن قۇتتىقتاۋعا تۇركيا, قازاقستان, اقش-تان الەمگە ايگىلى مۋزىكانتتار كەلدى. سونىڭ بىرەگەيى ءھام مەرەيتويلىق كەشتىڭ ايتۋلى جاڭالىعى – ديماش العاش رەت لوس-اندجەلەستەن كەلگەن قوناق, كومپوزيتور, پروديۋسەر, كوپتەگەن تانىمال مۋزىكالىق تۋىندىنىڭ اۆتورى نەيتان ۆانگپەن بىرگە ءبىر ساحنادا ونەر كورسەتتى. ءانشى كومپوزيتوردىڭ سۇيەمەلدەۋىمەن ايگىلى اكتەر دجەكي چاننىڭ «اۆانگارد» ءفيلمىنىڭ ساۋندترەگىن العاش رەت ساحنادا ورىندادى. «Happy» اتالاتىن بۇل كومپوزيتسيانى ديماش 2020 جىلى ءفيلمنىڭ سوڭعى نۇكتەسىن قوياتىن ساۋندترەك رەتىندە جازعان بولاتىن. ديماش پەن نەيتاننىڭ ونەر كورسەتۋى كورەرمەندەر ءۇشىن ۇلكەن توسىنسىي بولدى. تىڭدارماندار قىتاي تىلىندەگى ۆيرتۋوزدىق فورتەپيانو مەن ءبىر قاراعاندا جەڭىل بولىپ كورىنەتىن ۆوكالدىق داۋىستى ەرەكشە اسەرمەن قابىلدادى.
ءۇش اي بۇرىنعى كونتسەرت الدىنداعى جۋرناليستەرمەن كەزدەسۋىندە: «تۇركياداعى كونتسەرتكە كىمدى شاقىراتىنىمدى ازىرگە ايتپاي-اق قويايىن, ول قۇپيا بولسىن. كونتسەرتتە مىندەتتى تۇردە تۇركيانىڭ بەلگىلى ءبىر انشىسىمەن نەمەسە ونەر ۇجىمىمەن ونەر كورسەتىپ, قازاق ەلى مەن تۇركيا حالقىنىڭ ءبىر-بىرىنە دەگەن دوستىق قارىم-قاتىناسىنىڭ ۇلكەن ايعاعىن ساحناعا الىپ شىعىپ كورسەتكىم كەلەدى» دەگەن ءانشى ۋادەسىندە تۇردى. ديماشتىڭ جەكە كونتسەرتىنىڭ ارنايى قوناعى, ءانشى, كومپوزيتور, گيتاريست, تەك شىعارماشىلىق قانا ەمەس, قايىرىمدىلىق قىزمەتىمەن دە كەڭىنەن تانىمال جانە حالىق سۇيگەن تۇرىك حالىقتىق حارد-روگىن جاڭعىرتقان مۋزىكانت حالۋك لەۆەنت قابىلداۋشى ەل اتىنان قازاق ونەرپازىن تۇرىك جەرىندە قارسى الىپ, ديماشقا گيتاراسىن سىيعا تارتتى. سونىمەن قاتار روكەر حالۋك پەن كلاسسيكالىق ۆوكاليست ديماش ساحنادان اكۋستيكالىق گيتارانىڭ سۇيەمەلدەۋىمەن تۇرىكتىڭ ەڭ تانىمال «Gesi Bağlari» ءانىن ورىندادى.
كونتسەرتتىڭ تاعى ءبىر قوناعى اتاقتى ديدجەي بۋراك يەتەر بولدى. ول ديماشپەن بىلتىر تۇركياداعى «Weekend» ءانىنىڭ پرەمەراسى وتكەن العاشقى كونتسەرتىنەن بەرى بىرگە جۇمىس ىستەپ كەلەدى. ايتۋلى جارقىن شىعارما تۇركيا ءتۇنىن تامىلجىتقان «Stranger» شوۋدا تاعى دا ورىندالىپ, كورەرمەننىڭ ەرەكشە ىقىلاسىنا يە بولدى. ال بۋراك ديماشقا وتكەن جىلعى كونتسەرت-شوۋىندا ەرەكشە تانىمال بولعان «عارىش» كۇرتەسىن سىيلادى.
مەرەيتويلىق دۋماننىڭ تاعى ءبىر ارنايى قوناعى, ەلىمىزگە بەلگىلى كومپوزيتور رەنات گايسين دە وسىناۋ مەرەيلى كۇنى ءانشىنىڭ قاسىنان تابىلدى. سازگەردىڭ پيانينودا جانە ولجاس قۇرمانبەكتىڭ قوبىزدا سۇيەمەلدەۋىمەن ورىنداعان ديماشتىڭ «قايران ەلىم» ءانى قازاقتىڭ جانىن جىرلاپ قانا قويماي, ارتىستەردىڭ ادام تاعدىرى جايىنداعى تەرەڭ تولعانىستارىن دا جان-جاقتى اشا ءتۇستى.
«Stranger» شوۋدىڭ كورەرمەن ءۇشىن عانا ەمەس, ءانشى ءۇشىن دە توسىنسىي بولعان تاماشا ءساتى – ۇستازى مارات ءايتىموۆتىڭ شاكىرتىن تۋعان كۇنىمەن قۇتتىقتاۋ ءۇشىن ۇلكەن تورتپەن ساحنا تورىنە شىعۋى. مۇنى كورىپ قاتتى تولقىعان ديماش ۇستازىنا جانە بۇگىنگى ونىڭ ارمانىن جۇزەگە اسىرعان جانكۇيەرلەرىنە العىسىن ءبىلدىردى. كوڭىل تۇكپىرىندەگى ارمانىن ايتىپ, تورتتىڭ بەتىندەگى شىراقتى ۇرلەگەن ساتتەگى ءانشى تىلەگى كونتسەرتكە جينالعان تىڭدارمان كوڭىلىن تولقىتتى. ديماشتىڭ تىلەگى – الەم, بەيبىتشىلىك جانە ماحاببات ەدى. ءانشى ءسوزىنىڭ اسەرلى شىققانى سونشالىق, كوزىنە جاس العان كورەرمەن كوپ بولدى. ال «Together» ءانىن بىرگە ورىنداعاننان كەيىن جاس مۋزىكانت, ءىنىسى ءابىلمانسۇر قۇدايبەرگەن: «ماعان شابىت بەرگەنىڭىز ءۇشىن جانە مۋزىكاعا قاتىستىنىڭ بارلىعىن ۇيرەتىپ جاتقانىڭىز ءۇشىن كوپ راحمەت», دەپ اعاسىنا العىسىن ءبىلدىرىپ, جۇرەكجاردى قۇتتىقتاۋ لەبىزىن جەتكىزدى.
كونتسەرتتەگى كورەرمەن ىقىلاسى ءتىپتى ەرەك. ولاردىڭ تەلەفون شامى ارقىلى سۇيىكتى ءانشىسىن قولداۋى ءوز الدىنا, ءسوزىن كوپشىلىك جاتقا بىلەتىن «ماحاببات بەر ماعان» ءانىن الەمنىڭ 21 ەلىنەن جينالعان مىڭداعان جانكۇيەر جاتقا شىرقادى. وسى ءبىر تولقىنىستى ءساتتى سوزبەن ايتىپ جەتكىزۋ مۇمكىن ەمەس.
«DimashAli» شىعارماشىلىق ورتالىعىنىڭ مالىمەتىنشە, حورعا 7 اقپاننان بەرى سولتۇستىك, ورتالىق جانە وڭتۇستىك امەريكا, ەۋروپا, ازيا ەلدەرىنەن ديماشتىڭ جانكۇيەرلەرى دايىندالىپ, سونىڭ نەگىزىندە جوباعا قاتىسىپتى. ۇيىمداستىرۋشىلار ايرىقشا ەڭبەگى ءۇشىن قوبىزشى ولجاس قۇرمانبەككە جانە وسى اۋقىمدى جوبانىڭ باستى باستاماشىسى ءارى جەتەكشىسى بولعان پولياك ديماش فان-كلۋبىنىڭ وكىلى اگنەشكا چلاپقا العىس ءبىلدىردى. Dimash FC Poland فان-كلۋبىنىڭ ادمينيستراتورلارى: ء«انىمىز بارلىعىنا ۇنايدى جانە ديماش Dears-تى ماقتان تۇتادى دەگەن ۇمىتتەمىز», دەپ اسەرىمەن ءبولىستى. جاۋاپ رەتىندە ديماش قۇدايبەرگەن ءۇنسىز قالماي, جانكۇيەرلەرىنە قولداۋ كورسەتىپ, تۋعان ءتىلى مەن قازاقستاننىڭ مادەنيەتىنە دەگەن سۇيىسپەنشىلىگى مەن قۇرمەتى ءۇشىن شەكسىز العىسىن ءبىلدىردى.
ءيا, ديماش بۇعان دەيىن دە ءوزىنىڭ جانكۇيەرلەرىنەن قۇرالعان «Dears» توبىن «وتباسىم» دەپ تالاي رەت ايتقان بولاتىن. ال بۇگىن ۇلكەن ستاديوندا ناعىز ءبىر ۇلكەن وتباسىنىڭ تۋعان كۇنى ءوتتى. «Dears» تۋعان كۇن يەسىمەن بىرگە قوسىلىپ, فان-زونادا «Golden», «Give Me Your Love», «Be With Me», «Fly Away» اندەرىن بىرگە شىرقاپ, بيلەدى, كوڭىل كوتەردى. كونتسەرت بارىسىندا ءارتىستىڭ جانكۇيەرلەرى ديماشتىڭ بۇرىننان تانىمال بولعان «Battle Of Memory» جانە «Sos D’un Terrien En Détresse» اندەرىن ورىندادى. «Stranger» مەن ء«دۇرداراز» شىعارمالارىنداعى ۇلتتىق اسپاپتاردىڭ ءاربىر ۇنىنە شابىتتانىپ, ءتانتى بولدى. كونتسەرت بويى سۇيىكتى اندەرىنە قوسىلىپ, بىرگە ءان شىرقادى. ال ءسوزىن كوپشىلىك جاتقا بىلەتىن «ماحاببات بەر ماعان» ءانى ورىندالا باستاعاندا, بارشا كورەرمەن ونەرپازدىڭ ورنىنا حورمەن ءان شىرقادى. سول ساتتە ديماش كورەرمەندەر اراسىنان وزىنە تابىس ەتىلگەن قازاقستاننىڭ تۋىن ماقتانىشپەن ۇستاپ تۇرىپ, بارشا جينالعان قاۋىمعا ريزاشىلىعىن ءبىلدىرىپ, الەمگە بەيبىتشىلىك تىلەيتىنىن جەتكىزدى.
«تۇرىكشە, اعىلشىنشا سويلەپ جاتىرمىز, الايدا مەنىڭ تۋعان ەلىم, انا ءتىلىم بار. مەنىڭ تىلەۋىمدى تىلەيتۇعىن بارشا قازاق ەلىنىڭ اتىنان تۇرىك اعايىنعا, الەمنىڭ تۇكپىر-تۇكپىرىنەن كەلگەن جانكۇيەرلەرگە مىڭ تاعزىم, ۇلكەن راحمەت! ەلىمىزدىڭ كوك بايراعى كۇللى الەم الدىندا جەلبىرەي بەرسىن. الەمدە بەيبىتشىلىك, تاتۋلىق بولسىن. ەل مەن ەلدىڭ اراسىندا ارقاشان ءوزارا دوستىق بولسىن. دوستاسا ءبىلۋ – ۇلكەن دانالىقتىڭ بەلگىسى. سوندىقتان وسى كونتسەرتتە ۇلتتارىڭىز بولەك بولسا دا, ءوزارا بىرىگىپ, كوڭىلدەرىڭىز ءبىر ارناعا توعىسىپ, كەلىپ وتىرعاندارىڭىزعا مىڭ مارتە راحمەت», دەدى ديماش قۇدايبەرگەن.
ءيا, جەر ءجۇزىنىڭ ايگىلى ساحنالارىندا جارقىن ونەر كورسەتىپ, انىمەن الەمدى الديلەگەن ديماشتىڭ وسى كەشتەگى تاعى ءبىر ءتانتى ەتكەن قاسيەتى – ءار قيمىلى مەن ارەكەتىنەن, ءۇنى مەن ونەرىنەن ءوزىنىڭ قازاق ەكەنىن پاش ەتىپ وتىرار بولمىسىنىڭ ۇلتجاندىلىعى دەر ەدىك. ءۇنى عانا ەمەس, تىلىمەن دە ۇلتىن ۇلىقتاپ, ءانى ارقىلى الەمدى قازاققا باس يگىزگەن ەرلىگى – ديماش فەنومەنىنىڭ ءبىر قۇپياسى دەر ەدىك. ساحنا ارقىلى قازاقتىڭ ءانىن عانا ەمەس, سالتى مەن ءداستۇرىن, عۇرپى مەن عيبراتىن, ۇلتتىق قۇندىلىقتارىن دا ونەرىمەن ءبىرتۇتاس بىرلىكتە ۇسىنا الۋى – ءانشى الەمىنىڭ ادەمىلىگى ءھام بىرەگەيلىگى. ايتپەسە قازاق قاي زاماندا دا تالانتتان كەندە بولعان جوق قوي. بىراق ءدال ديماشتاي دۇنيەنى قازاققا باس يگىزىپ, الەم حالقىنا قازاقشا ءان شىرقاتقانى نەكەن-ساياق.
ءيا, ديماش – جۇلدىز, ديماش – سەنساتسيا, ديماش – فەنومەن. ونىڭ داۋسى بۇكىلالەمدىك گارۆيتاتسيا زاڭىن ىسكە قوسقانداي: شالقىتتى, تاسىتتى, تۇڭعيىققا تارتتى, كوككە كوتەردى. ديماش – بۇگىندە التى الاشتى عانا ەمەس, التى قۇرلىقتى ونەرىنە تابىندىرعان ءانشى. ونىڭ داۋىس دياپازونى مۋزىكا تىلىمەن ايتقاندا, 5-6 وكتاۆادان تۇرادى. بىراق ءانشىنىڭ ءوزى بولسا: «مەنىڭ داۋسىمدى 5-6 وكتاۆا دەپ, تىڭدارماندارىم تەك سوعان عانا ءمان بەرمەسە ەكەن. داۋىس تەك ءان ايتۋ قۇرالى عانا. مەنىڭ ماقساتىم – سول داۋىستىڭ قۇدىرەتىمەن ادامداردى كۇندەلىكتى تىرلىكتىڭ كۇيبەڭىنەن الىپ كەتىپ, ارماندار مەن ەرتەگىلەر الەمىنە اپارۋ», دەيدى.
بۇگىنگى كەش ءدال سول سەزىمنىڭ شىڭىنا جەتكىزگەن ەرەكشە كەش بولدى. «DimashAli» شىعارماشىلىق ورتالىعىنىڭ ۇيىمداستىرۋىمەن وتكەن كونتسەرتتىڭ باس دەمەۋشىسى – «RAMS Qazaqstan» قۇرىلىس كومپانياسى. ايتۋلى الپاۋىت كومپانيا ديماش ءۇنى ارقىلى كۇللى تۇركى الەمىنىڭ تۇتاستىعىن تانىتۋدى ماقسات تۇتىپتى ءھام قازاق ونەرىنىڭ الەمدىك ارەنادا ناسيحاتتالۋىنا باسىمدىق بەرگەن ەكەن. «كومپانيا تۇركى حالىقتارىنىڭ دوستاستىعىن قولدايدى. وتاندىق ونەرىمىزدى دەمەۋ ارقىلى وزگە حالىقتار الدىندا ەلىمىزدى ودان سايىن تانىتىپ, جاقىنداتا تۇسەمىز. بۇل – كومپانيانىڭ باستى ۇستانىمى. ديماش – ەلىمىزدى الەمگە تانىتىپ جۇرگەن ۇلكەن ماقتانىشىمىز. سوندىقتان وعان قولداۋ كورسەتە وتىرىپ, كومپانيامىز ەلىمىز قازاقستاننىڭ مادەنيەتى كۇللى الەم حالقىنا تانىلۋىنا ۇلەس قوسادى دەپ سەنەمىز. ءبىز قازاق ءانشىسىن قازاقستاننان تىس جەرلەردە دە قولداي الاتىنىمىزعا قۋانىشتىمىز», دەدى «RAMS Qazaqstan» كومپانياسىنىڭ PR ءبولىمىنىڭ ديرەكتورى ەۆگەنيا كوجا-احمەت.
اتاعى الدەقاشان التى الاشتان اسىپ, التى قۇرلىققا جەتكەن تالانت بۇل كۇنى شىنىمەن جارقىرادى. نە دەگەن ەڭبەك, نە دەگەن تالانت, نە دەگەن ەنەرگەتيكا! مۋزىكانىڭ سان جانرىندا ەركىن كوسىلگەن ديماش الەمىن بەينە ءبىر عارىش دەرسىز! ايتۋعا – ءتىل, سۋرەتتەۋگە ءسوز جەتپەيدى. ونى تەك كوزبەن كورىپ, جۇرەكپەن سەزىنۋ كەرەك! ماقتاندىق, مارقايدىق! جاساي بەر, قازاقتىڭ قۇداي بەرگەن ديماشى!
استانا – ىستانبۇل – استانا
P.S: «Stranger» تۋرى تۇركيامەن شەكتەلمەي, الداعى ۋاقىتتا چەحيا مەن گەرمانيادا دا جالعاسىن تابادى دەپ جوسپارلانىپ وتىر. ناقتىلاپ ايتار بولساق, «Stranger» شوۋى پراگادا 22 قاراشادا, ال ديۋسسەلدورفتا 24 قاراشا كۇنى وتەدى. كونتسەرتتىڭ چەحيادا وتەتىن ورنى – «Sortovni Hala Fortuna», گەرمانيادا – «PSD BANK DOME».
تاقىرىپقا وراي
نۇرلان ونەرباەۆ,
قازاقستاننىڭ ەڭبەك سىڭىرگەن قايراتكەرى:
– ىستانبۇل تورىنە قازاقتىڭ تالانتتى پەرزەنتى, باۋىرىمىز ديماشتى قولداپ كەلىپ قالدىق. كونتسەرتتىڭ الدىندا الەمنىڭ تۇكپىر-تۇكپىرىنەن جينالعان ديماشتىڭ جانكۇيەرلەرىمەن كەزدەستىك. قازاققا, ونىڭ ونەرى مەن سالت-داستۇرىنە دەگەن ماحابباتى ەرەكشە ەكەن. قازاق تىلىندە ديماشتىڭ اندەرىن جاتقا ورىنداعانىن كورىپ, جۇرەگىم تولقىدى. ونەردە شەكەرا بولمايدى دەگەن وسى شىعار. قازاق ونەرىن دۇنيە ديدارىنا تانىتىپ جۇرگەن ديماشقا وسى ءۇشىن دە العىس ايتقىم كەلەدى. ءاماندا ۇلتتىق ونەرىمىز ورىستەي بەرسىن!
ايشەگۇل دەنيز,
ديماشتىڭ جانكۇيەرى (تۇركيا):
– قازاق ءتىلىن ديماشتىڭ ارقاسىندا ۇيرەندىم. ونىڭ اندەرى قازاق ۇلتىنا دەگەن قىزىعۋشىلىعىمدى وياتتى. سونىڭ ارقاسىندا قازاق ءتىلىن ۇيرەنەمىن دەپ شەشتىم. قازىر تەك اۋىزەكى سويلەۋگە شامام جەتتى. بىراق بولاشاقتا ءالى دە تەرەڭىرەك ۇيرەنسەم دەيمىن. «ماحاببات بەر ماعان, تاعدىر» ءانى – ديماش شىعارماشىلىعىنداعى ەڭ سۇيىكتى ءانىم. بۇگىنگى كونتسەرتتە ديماشپەن قوسىلىپ راحاتتانا ورىندادىم.
اندرەا قۇدايبەرگەن,
ديماشتىڭ جانكۇيەرى (چيلي):
– ديماشتىڭ ونەرىنە عاشىق بولعانىم سونشالىق, قازاق ءتىلىن عانا ەمەس, قازاقتىڭ ۇلتتىق مۋزىكالىق اسپاپتارىن, اندەرىن تىڭداۋ, ۇيرەنۋ ماعان ۇلكەن قۋانىش سىيلايدى. وزدەرىڭىز بىلەتىندەي, مەن قازىر دومبىرادا ويناۋدى ۇيرەندىم. الداعى ۋاقىتتا تاعى دا باسقا اسپاپتاردا ويناۋدى ۇيرەنسەم دەيمىن. بۇگىن مەن ديماشتىڭ كونتسەرتىنە ارنايى چيليدەن ۇشىپ كەلدىم. انشىمەن العاشقى كەزدەسۋىم بولعاندىقتان, قاتتى تولقىدىم. بىراق كونتسەرت وتە جوعارى دەڭگەيدە ءوتتى. ديماشتىڭ اندەرى كەرەمەت! كومەيىنە بۇلبۇل ۇيا سالعان ديماش ءانشى جاساي بەرسىن دەيمىن!
لەوناردو كانترو,
ديماشتىڭ جانكۇيەرى (ارگەنتينا):
– كونتسەرتتەن كەيىنگى اسەرىم ەرەكشە, سوزبەن ايتىپ جەتكىزە المايمىن. ديماشتى قولداپ جۇرگەن جانكۇيەرلەردىڭ باسىن قوسقان «Dears» ءبىزدى ءبىر وتباسىعا اينالدىردى دەسەم بولادى. قازىر بارلىعىمىز تۋىسقان سياقتىمىز. بۇگىن كوزبە-كوز جۇزدەسىپ, مارە-سارە بولىپ جاتىرمىز. كونتسەرت تە كەرەمەت ءوتتى. جانىمىز راحاتتانىپ شىقتىق. الداعى ۋاقىتتا ديماش لاتىن امەريكاسى ەلدەرىنە كەلىپ كونتسەرت بەرسە, قۋانا قارسى الار ەدىك. وسىنداي ءبىرتۋار ونەرپازى, ديماشتاي تالانتتى پەرزەنتى بار قازاق ەلى شىنىمەن باقىتتى! ديماشتىڭ ونەرى ورلەي بەرسىن دەگىم كەلەدى!