ءماجىلىس سپيكەرى ەرلان قوشانوۆتىڭ توراعالىعىمەن بيۋرو ءوتىپ, الداعى جالپى وتىرىستىڭ كۇن ءتارتىبى ناقتىلاندى. الداعى جالپى وتىرىستا ءماجىلىس قازاقستان مەن قىتاي حالىق رەسپۋبليكاسىنىڭ ۇكىمەتتەرى اراسىنداعى بىرقاتار كەلىسىمدى راتيفيكاتسيالايدى.
حالىقارالىق اۆتوموبيل تاسىمالدارى تۋرالى كەلىسىم كولىك-ترانزيتتىك جانە ساۋدا-ەكونوميكالىق قاتىناستاردى ودان ءارى دامىتۋعا باعىتتالعان.
ال ترانسكاسپي حالىقارالىق كولىك باعىتىن دامىتۋ جونىندەگى كەلىسىم ترانسكاسپي حالىقارالىق كولىك باعىتى بويىنشا مۋلتيمودالدى تاسىمالداردى دامىتۋدى كوزدەيدى. بۇل قازاقستان مەن قىتاي اۋماقتارى بويىنشا جۇكتەردى تاسىمالداۋ ءۇشىن قولايلى جاعداي جاساۋعا مۇمكىندىك بەرەدى.
ترانسكاسپي حالىقارالىق كولىك باعىتىن, ونىڭ ىشىندە «قىتاي – ەۋروپا» باعىتىنداعى كونتەينەرلىك پويىزدار ءۇشىن دامىتۋ جونىندەگى كەلىسىم ەكى ەلدىڭ اۋماعى بويىنشا كونتەينەرلىك پويىزدار ءۇشىن ەكسپورتتىق-يمپورتتىق, ترانزيتتىك تاسىمالداردى ۇلعايتۋ جونىندەگى ىنتىماقتاستىقتى ودان ءارى دامىتۋدى كوزدەيدى.
جالپى, وتىرىستىڭ كۇن ءتارتىبى جوباسىنا تۇركى مەملەكەتتەرى ۇيىمىنا مۇشە ەلدەردىڭ ۇكىمەتتەرى اراسىنداعى حالىقارالىق قۇرامداستىرىلعان جۇك تاسىمالدارى تۋرالى كەلىسىم دە بار. قۇجات تۇركى مەملەكەتتى اراسىندا تەمىرجول, سۋ جانە اۆتوكولىك ارقىلى جۇك تاسىمالداۋ كولەمىن ارتتىرۋعا جول اشادى.
سونىمەن قاتار دەپۋتاتتار دۇنيەجۇزىلىك ساۋدا ۇيىمىن قۇرۋ تۋرالى مارراكەش كەلىسىمىنە (بالىق اۋلاۋ سۋبسيديالارى جونىندەگى كەلىسىم) وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسىن تالقىلايدى. ونىڭ ماقساتى – دۇنيەجۇزىلىك مۇحيتقا شىعاتىن تەڭىزدەردىڭ بالىق رەسۋرستارىن زاڭسىز, حابارلانبايتىن جانە رەتتەلمەيتىن كاسىپتىك اۋلاۋعا ىقپال ەتەتىن سۋبسيديالاردى شەكتەۋ جولىمەن ساقتاۋدى قامتاماسىز ەتۋ.
دەپۋتاتتار ەكىنشى وقىلىمدا مەملەكەتتىك ستاتيستيكا جانە دەرەكتەردى باسقارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن قارايدى. سونداي-اق ءماجىلىس كوميتەتى «مەملەكەتتىك (مۋنيتسيپالدىق) ساتىپ الۋدى جۇزەگە اسىرۋ كەزىندە بانك كەپىلدىكتەرىن ءوزارا تانۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن جۇمىسقا الاتىن بولادى.