مەملەكەت باسشىسى قاسىم-جومارت توقاەۆ سينگاپۋر پرەمەر-ءمينيسترىنىڭ ورىنباسارى – ەكونوميكالىق ساياسات جونىندەگى ۇيلەستىرۋشى مينيستر حەنگ سۋي كەاتتى قابىلدادى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
كەزدەسۋ بارىسىندا قاسىم-جومارت توقاەۆ قازاقستان-سينگاپۋر بيزنەس فورۋمىن ۇيىمداستىرعانى ءۇشىن وسى ەلدىڭ ۇكىمەتىنە ريزاشىلىعىن ءبىلدىردى. پرەزيدەنتتىڭ ايتۋىنشا, بۇل شارا قازاقستان مەن سينگاپۋر كومپانيالارىن ەكى ەل نارىعىندا جاڭا مۇمكىندىكتەر ىزدەۋگە ىنتالاندىرادى.
مەملەكەت باسشىسى قازاقستاندا ۇلتتىق ەكونوميكانىڭ باسەكەگە قابىلەتتىلىگىن ارتتىرۋ جانە الەۋەتتى ينۆەستورلار ءۇشىن قولايلى جاعداي جاساۋ ماقساتىندا كەشەندى رەفورمالار جۇرگىزىلىپ جاتقانىن ايتتى.
حەنگ سۋي كەات ورتالىق ازيا جانە اسەان ەلدەرىنىڭ ىنتىماقتاستىعىن كەڭەيتۋگە قازاقستان مەن سينگاپۋر سەپتىگىن تيگىزە الاتىنىن اتاپ ءوتتى.
قاسىم-جومارت توقاەۆ پەن حەنگ سۋي كەات ۇكىمەتتەر مەن بيزنەس قۇرىلىمداردىڭ ىقپالداستىعىن نىعايتۋ ارقىلى ەكىجاقتى سەرىكتەستىكتى ودان ءارى دامىتۋعا دايىن ەكەنىن راستادى.
سونىمەن قاتار كەزدەسۋدە مەملەكەتتىك قۇرىلىم مەن جاھاندىق ەكونوميكاعا, ونىڭ ىشىندە تسيفرلاندىرۋعا, تەحنولوگيالاردى دامىتۋعا, جاساندى ينتەللەكتى جانە ادام كاپيتالىنا قاتىستى ماسەلەلەر قاراستىرىلدى.