پرەزيدەنت قاسىم-جومارت توقاەۆ سلوۆاكيا پرەمەر-ءمينيسترى روبەرت فيتسوعا قاستاندىق جاسالۋىنا بايلانىستى بۇل تەررورلىق ارەكەتتى قاتاڭ ايىپتايتىنىن جانە مۇنداي قاراۋلىقتى مۇلدە اقتاۋعا بولمايتىنىن مالىمدەدى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
قازاقستان مەن سلوۆاكيانى ۇزاق جىلعى دوستىق پەن ءوزارا ءتيىمدى ىنتىماقتاستىق قاتىناستار بايلانىستىرادى. بۇل يگىلىكتى ىستە پرەمەر-مينيستر روبەرت فيتسو ەلەۋلى ءرول اتقاردى.
مەملەكەت باسشىسى قاسىم-جومارت توقاەۆ روبەرت فيتسونىڭ تەزىرەك ساۋىعىپ كەتۋىنە تىلەكتەستىك ءبىلدىردى.
ايتا كەتەيىك, بۇگىن سلوۆاكيانىڭ پرەمەر-ءمينيسترى روبەرت فيتسوعا قاستاندىق جاسالدى.
جەرگىلىكتى باق وقيعا ورنىنان تۇسىرىلگەن ۆيدەو تاراتتى. كادرلاردا ءتورت رەت وق اتىلىپ, ر.فيتسونىڭ جەرگە قۇلاعانى كورسەتىلگەن. قاۋىپسىزدىك قىزمەتكەرلەرى پرەمەر-ءمينيستردى شۇعىل تۇردە اۋرۋحاناعا جەتكىزدى.