وبلىس اكىمدىگى مادەنيەت, ارحيۆتەر جانە قۇجاتتاما باسقارماسىنىڭ ۇيىتقى بولۋىمەن, كەنەن ازىرباەۆ اتىن-داعى وبلىستىق فيلارمونيانىڭ ۇيىمداستىرۋىمەن جازۋشىلار وداعىنىڭ مۇشەسى, اقىن-كومپوزيتور, مادەنيەت سالاسىنىڭ ۇزدىگى ءۇمىت بيتەنوۆانىڭ «جىرلا, جۇرەك!» اتتى پوەتيكالىق كەشى ءوتتى.
ادەمى اندەرمەن ادىپتەلىپ, شۇرايلى شۋماقتارمەن ارلەنگەن كەش بارىسىندا ء«ازىل الەمى» تەاترىنىڭ اكتەرى امانعالي سىپابەكوۆ باستاپ, جەرگىلىكتى ونەرپازدار قوشتاپ, ءۇ.بيتەنوۆانىڭ اۆتورلىق اندەرىن شىرقادى.
قالامگەردىڭ مەرەيتويىنا ورايلاستىرىلىپ وتكىزىلگەن كەشتى بەلگىلى اقىن باقىت بەدەلحان جۇرگىزدى. جىردان شاشۋ شاشىلعان ادەبي ءىس-شاراعا ارنايى كەلگەن مەملەكەتتىك سىيلىقتىڭ لاۋرەاتى عالىم جايلىباي, جازۋشىلار وداعى توراعاسىنىڭ ورىنباسارى قاسىمحان بەگمانوۆ ىزگى تىلەكتەرىن جەتكىزدى.
وبلىس اكىمى اپپاراتىنىڭ باسشىسى لەسبەك ىلەباەۆ, مادەنيەت, ارحيۆتەر جانە قۇجاتتاما باسقارماسىنىڭ باسشىسى ەرلان ءجۇنىسباي, وبلىستىق ءماسليحاتتىڭ توراعاسى ابدالى نۇراليەۆ, سونداي-اق ءماجىلىس دەپۋتاتتارى مۇقاش ەسكەندىروۆ پەن گۇلدارا نۇرىموۆا دا اقىنعا دەگەن اقجارما تىلەكتەرىن ايتىپ, شىعارماشىلىعىنا تابىس تىلەپ, قۇرمەت كورسەتتى.
پوەزيا تورگە وزعان كەشتە اسقار توقپانوۆ اتىنداعى وبلىستىق قازاق دراما تەاترىنىڭ ۇجىمى ادەبي-ليريكالىق كومپوزيتسيا قويىپ, اقىن شىعارمالارىن تەاتر تىلىندە سويلەتتى.
اتىراۋ مەن التاي اراسىنان كەلگەن مارتەبەلى مەيماندار بۇل كۇنى جامبىلدىق اقىننىڭ شىعارماشىلىعى تۋرالى اقجارما تىلەكتەرىن اياپ قالعان جوق.
ءىس-شارا سوڭىندا ءسوز العان مەرەيتوي يەسى ادەبيەت الەمىندەگى ەڭبەگىن لايىقتى باعالاعان جەرگىلىكتى بيلىك پەن الىستان ات ارىتىپ كەلگەن قوناقتارعا, قارا ولەڭگە اڭسارى اۋعان جەرلەستەرىنە ريزاشىلىعىن جەتكىزدى.