تالدىقورعان اۋە بازاسىنا كەڭەس وداعىنىڭ ەكى مارتە باتىرى, ۇشقىش سەرگەي لۋگانسكيدىڭ ەسىمى بەرىلدى. مەملەكەت باسشىسى قاسىم-جومارت توقاەۆ اتىراۋدا وتكەن ۇلتتىق قۇرىلتايدا سۇراپىل سوعىس كەزىندەگى اعا بۋىننىڭ وشپەس ەرلىگى مەن ەرەن ەڭبەگىن ۇرپاق جادىندا جاڭعىرتۋ وتە ماڭىزدى دەگەن ەدى. وسى ماقساتتا جەتىسۋ جەرىندە كەلەلى جيىن ءوتىپ, ەل ازاماتتارى باتىر رۋحىنا تاعزىم ەتتى.
مەملەكەتتىك كەڭەسشى ەرلان قارين Telegram-داعى جەكە پاراقشاسىندا بۇل ءىس-شارانىڭ ماڭىزىنا توقتالىپ: «سەرگەي لۋگانسكيدىڭ ەسىمى بەرىلگەن اۆيابازا ونىڭ تۋعان قالاسىنىڭ اسپانىنا قورعان بولادى. مۇنىڭ سيمۆولدىق ءمانى بار. قازاقستاندا باتىرلاردىڭ ەسىمى ەشقاشان ۇمىتىلمايدى. بۇگىنگى ءىس-شارا – سونىڭ ايقىن دالەلى», دەپ جازدى.
ەڭ ماڭىزدىسى – سالتاناتتى ءىس-شارادا سەرگەي لۋگانسكيدىڭ ەرلىگى ەل جادىنا ءسىڭدى. جەتىسۋلىقتار ەكىنشى دۇنيەجۇزىلىك سوعىستا اۋەگە 390 رەت كوتەرىلىپ, 40-تان استام جاۋدىڭ ۇشاعىن قۇلاتقان باتىردىڭ ءومىر تاريحىنا قانىقتى. ەكى مارتە اۋە كەمەسىن تىكەلەي باعىتتاپ, قارسىلاسقا سوققى بەرگەن. ءدال وسىنداي ەرلىك تاريح پاراقتارىندا ۇزاق ساقتالۋعا ءتيىس. مۇنى جينالعان كوپشىلىك تە ماقۇلدادى.
اۋەلى قورعانىس ءمينيسترى, گەنەرال-پولكوۆنيك رۋسلان جاقسىلىقوۆ پەن ءوڭىر اكىمى بەيبىت يساباەۆ قازا تاپقان باتىرلاردى ءبىر مينۋت ۇنسىزدىكپەن ەسكە الىپ, داڭق مەموريالىنا گۇل شوقتارىن قويدى. سودان كەيىن سوعىس ارداگەرلەرى تولەۋباي شەكتىباەۆ, سارسەنباي قانتارباي جانە ەرماق قۇسايىنوۆتىڭ شاڭىراعىنا بارىپ, مەرەكەمەن قۇتتىقتادى.
«جاس ۇرپاقتى اسكەري-پاتريوتتىق تاربيەلەۋگە قوسقان ۇلەسى ءۇشىن سىزدەرگە العىس ايتقىم كەلەدى. ۇلى مايدانعا ءتۇسىپ, جاۋدىڭ بەتىن قايتارعان ەرلىكتەرىڭىز ەشقاشان ۇمىتىلمايدى. سىزدەردىڭ جىگەرلى مىنەزدەرىڭىز جاستارعا ماڭگى ونەگە بولادى», دەدى ر.جاقسىلىقوۆ.
ارداگەرلەرگە ءىلتيپات كورسەتكەننەن كەيىن تالدىقورعانداعى قازاقستان اسكەري-اۋە كۇشتەرىنىڭ №21751 اۆياتسيالىق اسكەري بولىمىنە باردى. ەل الدىنا وبلىس باسشىسى مەن قورعانىس مينيسترىنەن بولەك, تۇڭعىش قازاق عارىشكەرى, حالىق قاھارمانى توقتار اۋباكىروۆ جانە حالىق قاھارمانى ايدىن ايىمبەتوۆ شىعىپ, جينالعان قاۋىمدى مەرەكەمەن قۇتتىقتادى. باتىردىڭ ءبيۋستىن اشىپ, الدىنا گۇل شوقتارىن قويدى.
جينالعانداردى قۇتتىقتاعان قورعانىس ءمينيسترى ر.جاقسىلىقوۆ تالدىقورعانداعى اۆيابازاعا سەرگەي لۋگانسكيدىڭ ەسىمىن بەرۋ جونىندە پرەزيدەنت – جوعارعى باس قولباسشىنىڭ بيىل اتىراۋ قالاسىندا وتكەن قۇرىلتايدا باستاما كوتەرگەنىن جەتكىزدى. سونداي-اق بۇل ۇسىنىسقا قارۋلى كۇشتەردىڭ جەكە قۇرامى قولداۋ بىلدىرگەنىن اتاپ ءوتتى. اسكەري قىزمەتشىلەردىڭ كۇردەلى دە جاۋاپتى قىزمەتتەرىنە تابىس تىلەدى.
بەيبىت يساباەۆ باتىردىڭ عۇمىر بەلەسىنە ءۇڭىلىپ, قۇتتىقتاۋ تىلەگىن جەرلەستەرىنە جولدادى. «بۇگىن كەڭەس وداعىنىڭ ەكى مارتە باتىرى, اسكەري ۇشقىش سەرگەي لۋگانسكيدىڭ ەسىمىن بەرۋ جانە ءبيۋستىنىڭ اشىلۋ سالتاناتىنا كۋا بولىپ وتىرمىز. سەرگەي دانيلوۆيچ – ەكىنشى دۇنيەجۇزىلىك سوعىس كەزىندەگى ەرلىگى ءۇشىن ەكى مارتە كەڭەس وداعىنىڭ باتىرى اتانعان جاۋىنگەر. باتىردىڭ ەسىمىن يەلەنۋ – اسكەري ءبولىم ءۇشىن ۇلكەن مارتەبە ءارى زور جاۋاپكەرشىلىك. بۇدان بىلاي دا وتان الدىنداعى جاۋىنگەرلىك پارىزدارىڭىزدى لايىقتى ورىنداپ, ەل قورعانىسىنداعى ەڭبەكتەرىڭىزدىڭ جەمىستى بولاتىنىنا سەنەمىن», دەدى ءوڭىر باسشىسى.
ال جەتىسۋلىقتار ەرەكشە قوشەمەتپەن تورىنە شىعارعان توقتار اۋباكىروۆ سول داۋىردەگى ەستى وقيعالاردىڭ تيەگىن اعىتتى. سۋ-30 ۇشاعىمەن وسى تالدىقورعان اۆيابازاسىنان ۇشقان كەزدەرىن ەسكە الدى.
«سەرگەي لۋگانسكي – اتى اڭىزعا اينالعان ادام. بالا كەزىمدە مەن ونى وزىمە ۇستاز تۇتتىم, سونىڭ ۇلگىسىمەن تاربيەلەندىم. اۆيابازاعا داڭقتى باتىردىڭ ەسىمىن بەرۋدىڭ پاتريوتتىق, تاربيەلىك ماڭىزدى زور. سونىمەن قاتار بۇل بولاشاقتا وسىندا قىزمەت ەتەتىن جاس ۇشقىشتارعا دا, قازىر ۇشاتىندارعا دا ەكى ەسە جاۋاپكەرشىلىك جۇكتەيدى. ءوڭىر تۇرعىندارىن جەڭىس كۇنى مەرەكەسىمەن تاعى دا قۇتتىقتايمىن», دەدى ت.اۋباكىروۆ.
سالتاناتتى جيىن سوڭى مەرەكەلىك كونتسەرتپەن جالعاستى. سونىمەن قاتار قالا تۇرعىندارى ءۇشىن ورتالىق الاڭدا ءداستۇرلى سارباز بوتقاسى كوپشىلىككە ۇسىنىلدى.
جەتىسۋ وبلىسى