قر پرەزيدەنتى اكىمشىلىگىنىڭ باسشىسى ايبەك دادەباي رەسپۋبليكالىق تەلەارناعا بەرگەن سۇحباتىندا مەملەكەتتىك تىلگە قاتىستى سۇراققا جاۋاپ بەردى, دەپ حابارلايدى Egemen.kz.
«مەملەكەتتىك تىلگە قاتىستى پرەزيدەنتىمىزدىڭ ۇستانىمى بەلگىلى. قاسىم-جومارت كەمەل ۇلى – ناعىز ءتىل جاناشىرى. سوندىقتان پرەزيدەنتىمىزدىڭ ساياساتى – مەملەكەتتىك ءتىلدىڭ دامۋىنا ناقتى ىسپەن قولداۋ كورسەتۋ جانە بۇل سالادا قانداي دا ءبىر سپەكۋلياتسيا مەن ارانداتۋعا جول بەرمەۋ», دەپ مالىمدەدى قر پرەزيدەنتى اكىمشىلىگىنىڭ باسشىسى ا.دادەباي.
ايبەك دادەبايدىڭ ايتۋىنشا, قازاقتىڭ قازاقشا عانا سويلەمەي, ورىسشا, اعىلشىنشا, قاجەت بولسا, باسقا تىلدەردى جەتىك مەڭگەرۋى – بۇل ۇلتتىمىزدىڭ ارتىقشىلىعى.
«قادىر اقىن ايتپاقشى, ءبىز ءوز ءتىلىمىزدى قۇرمەتتەۋگە مىندەتتىمىز, ال وزگە ءتىلدىڭ ءبارىن بىلۋگە ۇمتىلۋىمىز كەرەك. قازاقتىڭ قازاقشا عانا سويلەمەي, ورىسشا, اعىلشىنشا, قاجەت بولسا, باسقا تىلدەردى جەتىك مەڭگەرۋى – ءبىزدىڭ ۇلتتىمىزدىڭ ارتىقشىلىعى. ءال-فارابي بابامىز 70 ءتىل بىلگەن دەسەدى, سونىڭ ارقاسىندا ول تەلەگەي تەڭىز ءبىلىم جينادى, الەمنىڭ «ەكىنشى ۇستازى» اتاندى.
بۇعان قوسا, ءبىزدىڭ ەلىمىزدە ەشكىمدى سويلەيتىن تىلىنە بايلانىستى كەمسىتۋگە, قۋدالاۋعا نەمەسە قانداي دا ءبىر قىسىم جاساۋعا جول بەرىلمەيدى. بۇل – مەملەكەتىمىزدىڭ نەگىزگى زاڭى – اتا زاڭدا جازىلعان نورما. ءبىز دامىعان ەل بولامىز دەسەك, بۇكىلحالىقتىق رەفەرەندۋمدا قابىلدانعان كونستيتۋتسيا نورمالارىن قاتاڭ ساقتاۋىمىز كەرەك», دەدى قر پرەزيدەنتى اكىمشىلىگىنىڭ باسشىسى ا. دادەباي.
ول زەرتتەۋلەرگە سايكەس, قازىر ەلدەگى مەملەكەتتىك ءتىلدى مەڭگەرگەن ازاماتتار سانى 81%-دان اسقانىن اتادى. قانشا ءتىل بىلسەڭ, سونشا الەمگە ەسىك اشىلادى دەيدى.
«دەمەك, بۇل ءوز ءتىلىڭدى قۇرمەتتەپ, وزگە ءتىلدىڭ ءبارىن ءبىل دەگەن ۇستانىم», دەپ ا.دادەباي پرەزيدەنت جاستاردىڭ دا بىرنەشە تىلدە سويلەيتىنىن جانە ولارعا سەنىم ارتىپ وتىرعانىن ايتتى.