EXPO حالىقارالىق كورمە ورتالىعىندا ءتورت اۋقىمدى ءىس-شارا ءوتتى: IV Ondeu EXPO وڭدەۋ ونەركاسىبى, V Kazakhstan Machinery Fair ماشينا جاساۋ جانە مەتالل وڭدەۋ, XIII Su Arnasy – Water Expo سۋ يندۋسترياسىنىڭ جانە III Chem Tech Kazakhstan حيميا ونەركاسىبى بويىنشا حالىقارالىق مامانداندىرىلعان كورمەسى مەن كونفەرەنتسياسى. كورمەگە 18 مەملەكەتتەن 250-دەن اسا كومپانيا جينالدى.
«بيىل كەلۋشىلەر ۇسىنعان ءونىم كولەمى بىلتىرعىعا قاراعاندا اۋقىمدى. كورشىلەس جانە وزگە مەملەكەتتەردەن كەلگەن كومپانيالار ادەتتەگىدەي ماشينا جاساۋ مەن مەتالل وڭدەۋ, سۋ يندۋسترياسى مەن حيميا ونەركاسىبى سالاسىنداعى جاڭا ءارى زاماناۋي تەحنولوگيالارىن ۇسىندى. سونداي-اق مەتالل وڭدەۋ, دانەكەرلەۋ جابدىقتارى مەن ماتەريالدارى, ءادديتيۆتى تەحنولوگيالار, ونەركاسىپتىك 3D باسىپ شىعارۋ جانە روبوتتەحنيكا دا بار. اسىرەسە قىتاي, رەسەي, گەرمانيا ەلىنەن اكەلگەن ونىمدەردى كوپتەپ كورۋگە بولادى», دەيدى جوبا مەنەدجەرى نۇرجان تورەمۇراتوۆ.
كورمەگە قاتىسۋشىلاردىڭ ءبىرى – «Force Machinery» جشس. ايماقتىق ديرەكتور مىرزابەك جولدىباەۆتىڭ ايتۋىنشا, كومپانيانىڭ نارىققا شىققانىنا 12 جىل تولعان.
«وزبەكستان مەن قىرعىزستانعا دا ءونىم جىبەرەمىز. كومپانيا كوبىنە-كوپ مەديتسينا جانە باسقا دا وندىرىستە قولداناتىن وتتەگى جانە ازوت گەنەراتورى, ياعني كادىمگى اۋادان وتتەگىگە اينالدىرۋ قۇرىلعىسىن دايىندايدى. سونداي-اق قوسالقى جابدىقتار دا شىعادى. قازىر ەلدەگى اۋرۋحانالاردىڭ بارلىعىندا وتتەگى ستانسالارى بار, بىراق ۇقىپتى پايدالانبايدى. دۇرىسى, ونى قولدانۋدى, كۇتىپ-ۇستاۋ كەرەكتىگىن تۇسىنبەيدى. فيلتر نەمەسە باسقا دا سۇيىقتىقتارىن اۋىستىرىپ وتىرۋ كەرەك. ايتپەسە ول اپپارات تازا وتتەگى بولمەيدى. ءبىز بۇعان دا قىزمەت كورسەتەمىز. سەرىكتەستىكتىڭ الماتىدا ەكى, شىمكەنتتە ءبىر فيليالى بار. الدا استانا قالاسىندا ءبىر بولىمشە اشۋ جوسپارلانىپ وتىر», دەيدى «Force Machinery» جشس ايماقتىق ديرەكتورى.
ەلدەگى سۋ جەلىلەرىنە ەڭ قاجەتتى ءونىمدى شىعاراتىن كومپانيالاردىڭ ءبىرى, قاراعاندى قالاسىنان كەلگەن «Kaspy Group» سەرىكتەستىگى دە كورمەدە ءوز تاۋارلارىن كورسەتتى.
«ەۋروپالىق ستاندارتقا ساي, ديامەترى 125-تەن 1 000-عا دەيىنگى قۇبىرلاردى وندىرەمىز. ءونىمنىڭ نەگىزگى قۇرامى – پوليپروپيلەن. تۇرعىن ۇيلەر مەن باسقا دا عيماراتتاعى اۋىزسۋ نەمەسە كارىز سۋ جۇيەلەرىنە ارنالعان بىردەن-ءبىر ءونىم دەسەك ارتىق ايتپاسپىز. جەر استىندا ساقتالۋعا شىدامدى, توزۋ دەڭگەيى 60-70 جىلعا دەيىن جەتەتىن ونىمدەر تمد ەلدەرىنە دە ەكسپورتتالادى», دەيدى كومپانيا ديرەكتورى اسحات جايلاۋبەك.
جوعارىدا ايتقانداي, ءتورت ماڭىزدى كورمەنىڭ ءبىرى – Kazakhstan Machinery Fair. بۇل – قازاقستان مەن ورتالىق ازياداعى ماشينا جاساۋ جانە مەتالل وڭدەۋ سالاسىنداعى باستى كورمەنىڭ ءبىرى. بۇعان ءداستۇرلى تۇردە جاڭا جابدىقتاردى وندىرۋشىلەر مەن ماشينا جاساۋ سالاسىنداعى جەتەكشى كومپانيا وكىلدەرى كەلدى. سونىمەن قاتار ولار مەتالل وڭدەۋ مەن پىسىرۋگە ارنالعان جابدىقتار مەن ماتەريالدارىن, ونەركاسىپتىك 3D-باسىپ شىعارۋ مەن روبوتتەحنيكاسىن جانە ماشينا جاساۋ جانە مەتالل وڭدەۋ سالاسىنداعى ەڭ جاڭا تەحنولوگيانى ۇسىنادى.
ال Su Arnasy – Water Expo كورمەسىندە وتاندىق جانە حالىقارالىق كومپانيالار سۋدى تازارتۋ مەن جابدىقتاۋعا جانە سۋ رەسۋرستارىن ءتيىمدى پايدالانۋعا بايلانىستى يننوۆاتسيالىق تەحنولوگيالار مەن ونىمدەرىن كورسەتتى. شارادا سالاعا قاتىستى كاسىپورىن باسشىلارى, ينجەنەرلەر مەن تەحنولوگتەر, شاعىن جانە ورتا بيزنەستىڭ, مەملەكەتتىك ورگانداردىڭ وكىلدەرى جانە سالالىق قاۋىمداستىقتار قاتىسىپ, سۋ تاپشىلىعى مەن ۇنەمدەۋگە قاتىستى ءوزارا پىكىر الماستى.
حيميا ونەركاسىبىنە, سونداي-اق وسى سالاعا بايلانىستى تەحنولوگيالار مەن جابدىقتارعا ارنالعان Chem Tech Kazakhstan حالىقارالىق كورمەسىندە دە ونى دامىتۋعا بايلانىستى يننوۆاتسيالىق تەحنولوگيالار ۇسىنىلدى. مۇندا دا سالاعا قاتىستى ماماندار مەن كاسىپكەرلەر ديالوگ ورناتىپ, حيميا ونەركاسىبىنىڭ تەحنولوگيالارى بويىنشا ماسەلەلەردى ورتاعا سالدى.