ءبىر اي بويى توقتاۋسىز جالعاساتىن «تازا قازاقستان» ەكولوگيالىق اكتسياسىنا بەلسەندى جاستان باستاپ, ەڭكەيگەن قارياعا دەيىن قولدان كەلگەنشە اتسالىسىپ جاتىر. «ونەگەلى ۇرپاق» دەگەن اتاۋ العان وسى اپتانىڭ العاشقى كۇنىندە ەلىمىزدەگى ەڭ ۇلكەن شاعىن اۋدانداردىڭ ءبىرى « ۇلى دالانىڭ» اۋماعىن كوگەرىشتەندىرۋ جۇمىسى قولعا الىندى.
«تازا اۋلا. تازا ولكە. تازا ەل!» ۇرانىمەن ءوتىپ جاتقان ەكولوگيالىق اكتسياعا ءوڭىر باسشىسى ەربول قاراشوكەەۆ باستاپ, وزگە دە اتقامىنەر ازاماتتار قاتىستى. بۇل كۇنى كونە شاھارداعى جاڭا شاعىن اۋدان سانالاتىن « ۇلى دالانىڭ» اۋماعىنا 125 ءتۇپ قارااعاش, 100 ءتۇپ ەمەن, 170 ءتۇپ تەرەك پەن 101 ءتۇپ شىرشا كوشەتى ەگىلدى.
جالپى العاندا ءوڭىر بويىنشا «تازا قازاقستان» اكتسياسىنا 27 مىڭنان اسا وبلىس تۇرعىنى ۇلەس قوسىپ جاتىر. قالالار مەن اۋىلداردى اباتتاندىرۋعا اتسالىسىپ جاتقانداردىڭ ىشىندە ءتۇرلى كاسىپورىن مەن الەۋمەتتىك مەكەمەلەردىڭ 5 222 قىزمەتكەرى بار ەكەنىن ايتا كەتكەن ءجون. ءىس-شارا باستالعالى بەرى وڭىردە 60 تاريحي-مادەني ەسكەرتكىشتىڭ ماڭايى قوقىستان تازارتىلىپ, 143 ساياباق, 1 400-گە جەتەعابىل اۋلا, 8 300 شارشى مەتر سۋ جۇيەلەرى تازالاندى.
جەرگىلىكتى اتقارۋشى بيلىك كەلتىرگەن دەرەككە جۇگىنسەك, ءوڭىر بويىنشا اباتتاندىرۋ, كوگالداندىرۋ جانە سانيتارلىق تازالاۋ جۇمىستارىنا قازىنادان 9,4 ملرد تەڭگە قارجى قاراستىرىلعان. قازىرگى كەزگە دەيىن 57 100 كوشەت ەگىلگەن ەكەن. 809,4 مىڭ شاقىرىم ارىق-اتىز تازالانعان. بۇل جۇمىستار الداعى ۋاقىتتا دا ساتىمەن جالعاسادى.
«پرەزيدەنت تاپسىرماسى اياسىندا قالا ينفراقۇرىلىمىن جاقسارتۋ ءۇشىن كەشەندى جۇمىستار جۇرگىزىلىپ جاتىر. مەملەكەت باسشىسى قالالاردى لايىقتى جانە تارتىمدى ەتىپ ۇستاۋدىڭ ماڭىزى زور ەكەنىن اتاپ وتكەن ەدى. وسى ورايدا ءوڭىر حالقى جۇمىلعان جۇدىرىقتاي بىرىگىپ, ەكولوگيالىق اكتسياعا بەلسەندىلىكپەن قاتىسىپ جاتقانىن ايتا كەتكەن ءجون», دەيدى ءوڭىر باسشىسى ە.قاراشوكەەۆ.
رەسمي دەرەككە سەنسەك, قازىرگى كەزدە تاراز قالاسىنداعى اعاشتاردى تۇگەندەۋ جۇمىستارى جۇرگىزىلىپ جاتىر. وسى جۇمىستار اياقتالعاننان كەيىن قالا بويىنشا ۇتىمدى سۋارۋ جۇيەسىن قالىپتاستىرۋ ماقساتىندا ارنايى دەندروكارتا جاسالماق.
تاراز