مەملەكەت باسشىسىنا ەلىمىزدەگى زاڭدىلىقتىڭ جاي-كۇيى جانە قاداعالاۋ قىزمەتىنىڭ باسىم باعىتتارى بويىنشا جۇرگىزىلگەن جۇمىستاردىڭ نەگىزگى قورىتىندىسى باياندالدى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا ەلىمىزدەگى كريمينوگەندىك احۋال جانە قىلمىستىق-قۇقىقتىق سالادا ازاماتتاردىڭ كونستيتۋتسيالىق قۇقىقتارىنىڭ ساقتالۋى جونىندە مالىمەت بەرىلدى. پروكۋرورلار تەرگەۋ ورىندارى زاڭسىز قاماۋعا العان 449 ادامدى بوساتتى. سونداي-اق 515 ادامعا قاتىستى شىققان ۇكىمدى قايتا قاراۋ جونىندە باستاما كوتەردى. ونىڭ ىشىندە 205 سوتتالۋشىنىڭ جاعدايى جاقسارىپ, 10 ادام اقتالدى.
بۇدان بولەك, مەملەكەت باسشىسىنا اكتيۆتەردى قايتارۋ جانە قىلمىسكەرلەردى ىزدەستىرۋ جۇمىستارى بارىسىندا پروكۋراتۋرا ورگاندارىنىڭ جاساندى ينتەللەكتىنى پايدالانۋى جونىندە باياندالدى. باس پروكۋراتۋرادا ەلدەن زاڭسىز شىعارىلعان اكتيۆتەردى ىزدەۋ جانە ىزىنە ءتۇسۋ ءۇشىن قولدانىلاتىن «اقىلدى» اناليتيكالىق پلاتفورمانى پيلوتتىق رەجيمدە سىناپ كورۋ جۇمىستارى باستالدى.
قازىرگى تاڭدا قابىلدانعان شارالاردىڭ, سونىڭ ىشىندە اقپاراتتىق جۇيەلەردى پايدالانۋدىڭ ناتيجەسىندە ىزدەۋدە جۇرگەن 605 قىلمىسكەر ۇستالدى.
سونىمەن قاتار بۇگىندە پروكۋرورلار جۇزەگە اسىرىلىپ جاتقان 663 ينۆەستيتسيالىق جوباعا قۇقىقتىق كەڭەس بەرىپ وتىر. بيىل ەل ەكونوميكاسىنا 2,4 تريلليون تەڭگە كولەمىندە ينۆەستيتسيا سالعان 148 ينۆەستوردىڭ تۇيتكىلدى ماسەلەسى شەشىلدى.
پرەزيدەنت شەتەلگە زاڭسىز شىعارىلعان اكتيۆتەردى ىزدەۋگە جانە قايتارۋ ءۇشىن زاماناۋي تەحنولوگيالاردى كەڭىنەن قولدانۋ ءىسىن جالعاستىرۋدى تاپسىردى. مەملەكەت باسشىسى قىلمىستىق پروتسەستە ازاماتتاردىڭ كونستيتۋتسيالىق قۇقىقتارىن قورعاۋدىڭ جانە ينۆەستورلار مەن بيزنەس-قوعامداستىقتىڭ قۇقىقتارىن پروكۋرورلىق قاداعالاۋ شارالارىمەن ءتيىمدى قامتاماسىز ەتۋدىڭ ماڭىزدى ەكەنىن اتاپ ءوتتى.