2024 جىلدىڭ باسىنان بەرى بالقاش كولىندە سۋ دەڭگەيى ورتا ەسەپپەن 15 سانتيمەترگە كوتەرىلدى. 1 قاڭتاردا كولدىڭ ورتاشا سۋ دەڭگەيى 159 سم بولسا, 1 ساۋىردە بۇل كورسەتكىش 174 سم-گە جەتتى, دەپ جازادى Egemen.kz.
بالقاشتاعى سۋ دەڭگەيىنىڭ كوتەرىلۋىنە ترانسشەكارالىق ىلە وزەنىنەن كەلگەن سۋ اسەر ەتكەن. وسىنىڭ ناتيجەسىندە قاپشاعاي سۋ قويماسىنان بالقاش كولىنە شامامەن 2,3 تەكشە شاقىرىم كولەمىندە سۋ جىبەرىلدى.«بالقاش كولىنىڭ سۋ دەڭگەيىن انىقتاۋ ءۇشىن 4 سۋ بەكەتىندە باقىلاۋ جۇرگىزىلەدى. وسى جىلدىڭ 24 ساۋىرىندەگى جاعداي بويىنشا بالقاش كولىنىڭ ەڭ جوعارى دەڭگەيى سارىشاعان سۋ بەكەتىندە تىركەلدى. مۇندا سۋ دەڭگەيى 210 سانتيمەترگە جەتكەن. ال كولدىڭ ەڭ تومەنگى دەڭگەيى - 140 سم, قاراقۇم سۋ بەكەتىندە بەلگىلەندى. بالقاش بەكەتىندە سۋ دەڭگەيى - 177 سم, مىڭارال بەكەتىندە 167 سم قۇرادى», دەلىنگەن سۋ رەسۋرستارى جانە يرريگاتسيا مينيسترلىگى تاراتقان حابارلامادا.