بۇگىن وقۋ-اعارتۋ مينيسترلىگىنىڭ اپپاراتتىق كەڭەسىندە وڭىرلىك ءبىلىم باسقارمالارى, ۆەدومستۆولىق باعىنىستى ۇيىمدار مەن ادىستەمەلىك كابينەت باسشىلارىنىڭ قاتىسۋىمەن بالالاردىڭ ساۋىقتىرۋ دەمالىسىن, بوس ۋاقىتىن جانە جۇمىسپەن قامتىلۋىن ۇيىمداستىرۋ ماسەلەلەرى تالقىلاندى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
وقۋ-اعارتۋ مينيسترلىگى ءىىم, دسم, تجم, مام, تسم, عجبم, ەحاقم جانە ەترم-مەن بىرلەسىپ زاڭنامالىق نورمالاردى, باعدارلامالاردى, سونداي-اق مونيتورينگ پەن باقىلاۋدى قامتيتىن ءىس-شارالار جوسپارىن قابىلدادى. بيىل ءبىرىنشى رەت لاگەرلەر ءۇشىن بىرىڭعاي تالاپتار ازىرلەندى, قوسىمشا ءبىلىم بەرۋ سالاسىنداعى ەرىكتىلەر مەن پەداگوگتەر جۇمىسقا تارتىلدى, لاگەرلەردى قابىلداۋ مەن نۇسقاما وتكىزۋدىڭ رەسپۋبليكالىق مونيتورينگى قۇرىلدى. سونداي-اق ۋاكىلەتتى مەملەكەتتىك ورگاندارى بەكىتكەن بالالاردى ساۋىقتىرۋ ورتالىقتارىنىڭ ءتىزىلىمى جولداندى.
«بالالاردىڭ قاۋىپسىزدىگىن باستى نازارعا الا وتىرىپ, جازعى دەمالىستى وتكىزۋ مادەنيەتىن قالىپتاستىرۋ قاجەت. سوندىقتان ارىپتەستەر, بالالاردى قورعاۋ شارالارىن قاتاڭ باقىلاۋعا الىپ, جۇمىستى كۇشەيتۋ كەرەك. سىزدەرگە ءتيىستى ادىستەمەلىك قۇرالدار مەن الگوريتمدەر جولداندى. بالالاردىڭ جازعى دەمالىسىن ۇيىمداستىرۋدا ءبىلىم باسقارمالارىنىڭ باسشىلارىنا جەكە جاۋاپكەرشىلىك جۇكتەيمىن», دەدى وقۋ-اعارتۋ ءمينيسترى عاني بەيسەمباەۆ.
بيىلعى بارلىعى 3,1 ملن بالانى, ياعني وقۋشىلاردىڭ 88,2%-ىن دەمالىسپەن قامتۋ جوسپارلانىپ وتىر. ولار ءۇشىن 10 630 دەمالىس ورتالىعى ازىرلەندى.