ناۋرىز ايىندا ەلدە جىلدىق ينفلياتسيا باياۋلاپ, 9,1%-دى (اقپاندا – 9,3%) قۇرادى. ۇلتتىق بانكتىڭ حابارلاۋىنشا, جىلدىق ينفلياتسيا 14 وڭىردە باسەڭدەدى. 5 وبلىستا قارقىن الىپ, 1 وڭىردە وزگەرىسسىز قالدى.
جىلدىق ينفلياتسيانىڭ ەڭ جوعارعى ءمانى قاراعاندى مەن ماڭعىستاۋ وبلىستارىندا تىركەلگەن. ناۋرىزدا ازىق-ت ۇلىك تاۋارلارىنىڭ باعاسى جىلدىق 6,9%-عا دەيىن باياۋلاعان (اقپاندا – 7,4%). وسى توپتاعى تاۋارلاردىڭ باعاسى ۇلىتاۋ وبلىسىندا (10,5%) بارىنشا قارقىندى, ال الماتى وبلىسىندا (4,3%) مەيلىنشە باياۋ ءوسىپتى.
«ازىق-ت ۇلىككە جاتپايتىن تاۋارلار باعاسىنىڭ ءوسۋ قارقىنى 8,2%-عا دەيىن باسەڭدەدى (اقپاندا – 8,5%). ەڭ جوعارعى ءمان ماڭعىستاۋ وبلىسىندا (13,2%), ەڭ تومەنگى ءمان جەتىسۋ وبلىسىندا (6,5%) تىركەلدى. ناۋرىزدا اقىلى كورسەتىلەتىن قىزمەت باعاسى 13,2%-عا دەيىن جەدەلدەدى (اقپاندا – 12,8%). سونىمەن قاتار پاۆلودار وبلىسىندا باعا جالپى رەسپۋبليكالىق دەڭگەيدەن ءبىرشاما تەز (18,2%), ۇلىتاۋ وبلىسىندا (8,6%) ايتارلىقتاي باياۋ ءوستى», دەلىنگەن ۇب حابارلاماسىندا.
ناۋرىزدا ەل بويىنشا ايلىق ينفلياتسيا 0,7%-عا شارىقتادى. بۇل – تاريحي ورتاشا ماننەن جوعارى (2017-2021 جىلدارداعى ناۋرىزدا – 0,6%).
ەسكە سالايىق, بىرنەشە كۇن بۇرىن ۇب بازالىق مولشەرلەمەنى 14,75% دەڭگەيىندە ساقتاۋ تۋرالى شەشىم قابىلدادى. شەشىم قابىلداۋ كەزىندە ينفلياتسيانىڭ ديناميكاسى مەن تاۋەكەلدەر بالانسى ەسكەرىلگەن. بازالىق مولشەرلەمەنىڭ دەڭگەيىن وزگەرتۋدە بايىپتىلىق قاجەت دەپ ەسەپتەيدى باس بانك باسشىلىعى.