قىرعىزستان پرەزيدەنتى سادىر جاپاروۆتىڭ قازاقستانعا رەسمي ساپارى اياسىندا قازاقستاننىڭ مادەنيەت قايراتكەرلەرىنە مەملەكەتتىك ناگرادالار تابىستاۋ ءراسىمى ءوتتى, دەپ حابارلايدى Egemen.kz قر مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
سالتاناتتى ءىس-شارا بارىسىندا قىرعىزستاننىڭ مەملەكەتتىك حاتشىسى سۇيىنبەك قاسمامبەتوۆ مادەنيەت جانە ونەر وكىلدەرىن مەملەكەتتىك ناگرادالارمەن ماراپاتتاۋ عاسىرلارعا ۇلاسقان دوستىقتىڭ, ورتاق مادەنيەتتىڭ, دامىپ كەلە جاتقان ىنتىماقتاستىقتىڭ بەلگىسى ەكەنىن ايتتى.
قازاقستاننىڭ بەلگىلى كومپوزيتورى التىنبەك قورازباەۆقا, تانىمال ەسترادا ءانشىسى, كينواكتريسا روزا رىمباەۆاعا «قىرعىز رەسپۋبليكاسىنىڭ حالىق ءارتىسى» قۇرمەتتى اتاعى بەرىلدى.
سونداي-اق قىرعىزستان پرەزيدەنتى سادىر جاپاروۆتىڭ جارلىعىمەن قىرعىزستان مەن قازاقستان اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن:
«داناكەر» وردەنىمەن - قوعام قايراتكەرى, مادەنيەتتانۋشى مۇرات اۋەزوۆ, اقىن مۇحتار شاحانوۆ; «دوستۋك» وردەنىمەن - پۋبليتسيست, ادەبيەتتانۋشى, جۋرناليست, كينوسىنشى ساۋىتبەك ءابدىراحمانوۆ, مەملەكەت جانە قوعام قايراتكەرى, تۇركىتانۋشى عالىم مىرزاتاي جولداسبەكوۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيت تۇيمەباەۆ قانسەيىت ۇلى; «داڭك» وردەنىمەن - حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا; «داڭك» مەدالىمەن - «تاڭ-شولپان» كوركەم-ادەبي جۋرنالىنىڭ رەداكتورلار كەڭەسىنىڭ توراعاسى, باس ديرەكتورى ديدار قۇلكەنوۆ ماراپاتتالدى.