قازاقستان رەسپۋبليكاسى پارلامەنتى سەناتىنىڭ دەپۋتاتى رۋسلان رۇستەموۆ ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ جونىندەگى زاڭ تۋرالى پىكىر ءبىلدىرىپ, قازاق حالقىن ءداستۇرلى قۇندىلىقتاردى ساقتاۋعا شاقىردى, دەپ جازادى Egemen.kz.
«ەرتە كەزدە بابالارىمىز جورىققا اتتاناردا ارتتا قالعان قارتتار مەن بالا-شاعانى ايەل-انالارعا اماناتتاپ, «ارتتا سىزدەر بەكەم بولساڭىزدار, ءبىزدىڭ دە كوڭىلىمىز توق, جولىمىز اشىق» دەپ نازىك جاندارعا سەنىپ تاپسىراتىن بولعان.
ارينە, زامان وزگەرىپ, قوعام العا جىلجىعان سايىن وسىنداي ءداستۇرلى قۇندىلىقتارىمىزدان ءبىر مىسقال اجىراماۋىمىز ءتيىس. وكىنىشكە قاراي, بۇگىنگى قوعامدا ايەلدەر مەن بالالارعا قاتىستى ءجيى ورىن الاتىن زورلىق-زومبىلىق ءۇشىن جازانى قاتاڭداتۋ زاماننىڭ تالابى مەن سۇرانىستارىنا سايكەس تۋىنداپ وتىرعانىن ۇمىتپاۋىمىز قاجەت», دەپ جازدى سەناتور.
رۋسلان رۇستەموۆ اتالعان ماسەلە قوعامدا قىزۋ تالقىلانىپ, وسى باعىتتاعى زاڭنامالاردى جەتىلدىرۋ قاجەتتىگى ايقىندالعانىن ايتا كەتتى. بارلىق ساراپشىلاردىڭ, قوعامدىق بەلسەندىلەردىڭ پىكىرى قابىلداناتىن زاڭنىڭ باستى مىندەتى - بالالار قاۋىپسىزدىگىن قامتاماسىز ەتۋ ماسەلەلەرى بويىنشا مەملەكەتتىك ساياساتتىڭ قۇقىقتىق, ەكونوميكالىق, الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋ, ايەلدەر مەن بالالارعا قاتىستى قىلمىستاردىڭ الدىن الۋ جانە جولىن كەسۋ.
«وسىعان وراي, مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭدارىنا قول قويدى. مەملەكەت باسشىسىنىڭ ۇستانىمى ايقىن: زاڭنىڭ ۇستەمدىگىن بەلگىلەۋ جانە زاڭ نورمالارى ساقتالاتىن ادىلەتتى قوعام قۇرۋ. زاڭ مەن ءتارتىپتى ورناتۋ ونىڭ سايلاۋالدى باعدارلاماسىنىڭ نەگىزى بولىپ سانالادى. مەملەكەت باسشىسى ۇسىنعان «زاڭ جانە ءتارتىپ» قاعيداتى بارلىق ماسەلەلەر قۇقىقتىق سالادا شەشىلۋى كەرەك دەگەندى بىلدىرەدى. بۇل ءپرينتسيپتىڭ ءوزارا بايلانىستى ەكى قىرى بار. ءبىرىنشىسى - «زاڭ بار جەردە ءتارتىپ بار». ەكىنشىسى - «زاڭ بۇزىلماعان جەردە ءتارتىپ بار». وسىلايشا, جاسالعان قىلمىس ءۇشىن قولدانىلاتىن جازا عانا ماڭىزدى ەمەس, سونداي-اق, قىلمىستىڭ الدىن الۋ دا ماڭىزدى», دەلىنگەن سەناتوردىڭ جازباسىندا.