قر پارلامەنتى سەناتىنىڭ دەپۋتاتى سۇلتانبەك ماكەجانوۆ ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ جونىندەگى زاڭ تۋرالى پىكىر ءبىلدىرىپ, Instagram الەۋمەتتىك جەلىسىندە جازبا قالدىردى, دەپ حابارلايدى Egemen.kz.
«قۇرمەتتى دوستار, پرەزيدەنت ق. توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا قول قويدى.
وزدەرىڭىزگە بەلگىلى, ەلىمىزدە ايەلدەر مەن بالالارعا قاتىستى زورلىق-زومبىلىق, اسىرەسە, سوڭعى ۋاقىتتارى الەۋمەتتىك وتكىر ماسەلە رەتىندە قارالا باستادى. قابىلدانعان زاڭدا ساراپشىلاردىڭ بارلىق ۇسىنىستارى مەن قاراپايىم ازاماتتاردىڭ وتىنىشتەرى پرەزيدەنت تاراپىنان قولداۋ تاپتى. مەملەكەت باسشىسىنىڭ جاڭا زاڭعا قول قويۋى, ەل باسشىلىعىنىڭ «حالىق ۇنىنە قۇلاق اساتىن مەملەكەت» قاعيداتىن ىسكە اسىرۋ اياسىندا قوعام سۇرانىسىنا ۇدايى نازار اۋدارىپ وتىرعانىن كورسەتەدى», دەپ جازدى سەناتور.
ول پرەزيدەنت ق.توقاەۆ بارلىق ماسەلەلەردى, سونىڭ ىشىڭدە ايەلدەردىڭ قۇقىقتارىن قورعاۋ جانە بالالاردىڭ قاۋىپسىزدىگىن قامتاماسىز ەتۋ ماسەلەلەرىن ۇنەمى كوتەرىپ وتىراتىنىن ەسكە سالدى.
«زاڭ ازاماتتىق قوعام مەن مەملەكەتتىڭ وتكىر جانە وزەكتى ماسەلەنى شەشۋگە باعىتتالعان سىندارلى ءوزارا ءىس-قيمىلىنىڭ ناتيجەسى بولدى. ۇلتتىق قۇرىلتايدىڭ ءۇشىنشى وتىرىسىندا پرەزيدەنت وتباسىلىق-تۇرمىستىق زورلىق-زومبىلىقتى قوعام بولىپ كۇرەسۋدى قاجەت ەتەتىن الەۋمەتتىك پروبلەمانىڭ ءبىرى رەتىندە بەلگىلەدى. سوندىقتان پرەزيدەنت قول قويعان وتباسىلىق-تۇرمىستىق زورلىق-زومبىلىق تۋرالى زاڭ, شىن مانىندە, مەملەكەتتىڭ تەڭدىك پەن زاڭ ۇستەمدىگى قاعيداتتارىنا باسىمدىق بەرەتىنىن, قۇقىق بۇزۋشىلىققا مۇلدەم توزبەۋشىلىكتى قالىپتاستىراتىنىن كورسەتەدى. ول تۋرالى ق.توقاەۆ وسى جىلدىڭ قاڭتار ايىندا: «مەن «زاڭ جانە ءتارتىپ» قاعيداتىن نىعايتۋدى جاقتايمىن, وتباسىلىق-تۇرمىستىق زورلىق-زومبىلىق ءۇشىن جازانى قاتاڭداتۋدى قولدايمىن», دەدى. بۇل زاڭ ءبىزدىڭ قوعامدى دەموكراتيالاندىرۋ باعىتىنداعى تاعى ءبىر قادام بولىپ تابىلادى», دەپ تۇيىندەدى سۇلتانبەك ماكەجانوۆ.