ساتباەۆ قالاسىنىڭ تۇرعىنى سالتانات بايسالباەۆا وسى جىلدىڭ ناۋرىز ايىندا 1 جاسار جالعىز قىزىنان ايىرىلدى. ءبۇلدىرشىن ۇلىتاۋ وبلىسىنداعى قالالىق اۋرۋحانانىڭ رەانيماتسيا بولىمىندە قاتتى ىشەك ينفەكتسياسى سالدارىنان قايتىس بولدى. اناسىنىڭ ايتۋىنشا, دارىگەرلەر ونى قۇتقارۋ ءۇشىن ءتيىستى شارالار قابىلداماعان, دەپ حابارلايدى Egemen.kz.
«3 ناۋرىزعا قاراعان ءتۇنى قىزىم قۇسا باستادى. جەدەل جاردەم كولىگىمەن ساتباەۆ اۋرۋحاناسىنىڭ جۇقپالى اۋرۋلار بولىمشەسىنە دەرەۋ جەتتىك. بىراق اۋرۋحانا قابىلدامادى. كەزەكشى دارىگەر ونى قاراپ شىعىپ, مەدبيكەگە جاراعا قارسى ينفەكتسيا جاساۋدى ايتتى. سودان كەيىن ۇيدە ەمدەلۋدى بەلگىلەپ, ەمحاناعا بارۋدى ۇسىندى. ءبىز ۇيگە بارىپ, سول جەردە ەمدەلۋدى باستاۋعا ءماجبۇر بولدىق. كەشكە قاراي ول جاقسارعان سياقتى ەدى, بىراق 4 ساۋىردە دەنە قىزۋى 38-گە دەيىن كوتەرىلىپ, قايتادان قۇسا باستادى. ەمحاناعا جۇگىردىك, وندا ءبىزدى قاراپ, اۋرۋحاناعا جاتقىزۋعا شۇعىل جولداما بەردى. بۇل رەتتە فەلدشەر ەمحاناعا جەدەل جاردەم شاقىرماي, ۇيگە بارىپ, بريگادا شاقىرۋدى تاپسىردى», دەدى سالتانات بايسالباەۆا.
كەلىنشەك ۇيگە جەدەل جاردەم شاقىرىپ, قىزى ەكەۋى قايتادان اۋرۋحاناعا بارعان. ول كەزدە ءسابي السىرەپ, بوزارىپ كەتەدى. ينفەكتسيالىق بولىمشەنىڭ دارىگەرى بالانى رەانيماتسيالىق بلوكقا جىبەرگەن.
ء«بىز رەنتگەننەن وتتىك. سودان كەيىن رەانيماتسيادا ەكى ساعات بويى مەدبيكەلەر بالاعا كاتەتەر ورناتا المادى, ونىڭ قولدارى مەن اياقتارىنىڭ تامىرلارىن 8 رەت تەسىپ تاستادى. پەرزەنتحانادا اكۋشەر بولىپ جۇمىس ىستەيتىن تۋىسىم باسقا مەدبيكە اكەلىپ, ول كاتەتەر ورناتتى. بالانى ءتۇنى بويى قولىما الىپ ءجۇردىم, ءيىسى جاعىمسىز قۇسۋلارى بولدى. تاڭەرتەڭ قاتتى شارشاپ, ونىمەن بىرگە ۇيىقتادىم. كەۋدەمنىڭ اۋىرسىنعانىنان وياندىم, قىزىم تىستەپ الىپتى. سول كەزدە قىزىمنىڭ كوزدەرى ءبىرتۇرلى ەكەنىن بايقادىم, ول ماعان جاۋاپ قاتپادى, بىراق تىنىس الىپ جاتتى. دارىگەر ەكىنشى رەت كەلىپ, «ۇيىقتاسىن, ول شارشادى» دەدى. اياعىنا ماسساج جاساپ, قايتا ۇيىقتادىم. مەدبيكە وياتىپ, قىزىمنىڭ تىنىس الماي جاتقانىن ايتتى», دەيدى سالتانات بايسالباەۆا.
كەيىننەن سالتانات قىزىنىڭ ءجىتى ىشەك ينفەكتسياسى سالدارىنان قاتتى ۋلانىپ قايتىس بولعانىن بىلگەن.
«ول 15 ساعات بويى قينالدى. ونىڭ ولىمىنە دارىگەرلەر كىنالى دەپ ەسەپتەيمىن. اتاپ ايتقاندا, جۇقپالى اۋرۋلار بولىمشەسىنىڭ دارىگەرى ءبىرىنشى كەزەكتە اسقازانىڭ جۋماي, ۇيگە جىبەردى. سول ءتۇنى كەزەكشىلىك ەتكەن ينفەكتسيونيست, پەدياتر, رەانيماتولوگ كەشكى تەكسەرۋگە كەلگەن جوق», دەپ تولىقتىردى قايعىدان قان جۇتقان ايەل.
ۇلىتاۋ وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى بالانىڭ قايتىس بولۋ فاكتىسىن راستادى.
«دەنساۋلىق باقىلاۋ كوميتەتىنىڭ ۇلىتاۋ وبلىسى بويىنشا دەپارتامەنتى جوسپاردان تىس تەكسەرۋ جۇرگىزىپ جاتىر. تەكسەرۋ اياقتالعاننان كەيىن تۇسىنىكتەمە بەرەمىز», دەلىنگەن حابارلامادا.