وسى كۇندەرى پەتروپاۆل قالاسىنداعى ا.ۆينوكۋروۆ اتىنداعى سپورت سارايىندا 13–15, 18–20 جاس ارالىعىنداعى جاسوسپىرىمدەر مەن جاستار اراسىندا گرەك-ريم جانە ەركىن كۇرەستەن رەسپۋبليكا چەمپيوناتى ءوتىپ جاتىر. بۇعان ەلىمىزدىڭ استانا, الماتى, شىمكەنت سياقتى رەسپۋبليكالىق دارەجەدەگى قالالارىمەن قاتار 17 وبلىستان بارلىعى 11 سالماق بويىنشا 700 سپورتشى كەلدى. سونىڭ ىشىندە سولتۇستىك قازاقستان وبلىسىنىڭ نامىسىن 101 پالۋان قورعايدى.
تەرىستىك كومانداسىنىڭ ىشىندە 31 پالۋان ەركىن كۇرەستەن, 42 پالۋان گرەك-ريم جانە 28 قىز ايەلدەر كۇرەسىنەن قاتىسادى. گرەك-ريم كۇرەسىنەن قازاقستاننىڭ قۇرمەتتى سپورت شەبەرى جامبىل تاسەمەنوۆتىڭ ايتۋىنا قاراعاندا, بارلىق سپورتشىنىڭ دايىندىعى جوعارى. «شيىرشىق اتقان جاستاردىڭ كۇرەس شەبەرلىگى دە جوعارى بولار دەپ ويلايمىن. ۇزاق ۋاقىت جاقسى دايىندىقتان وتكەندەرى كورىنىپ تۇر», دەدى ول.
الايدا «كۇش اتاسىن تانىماس» دەگەندەي, سولتۇستىكقازاقستاندىق سپورتشىلار جوعارى كورسەتكىشتەرگە ازىرشە جەتە الماي جاتىر. وبلىس جاتتىقتىرۋشىلارىنىڭ ءۇمىتى بولعان ءۋاليحانوۆ اۋدانىنىڭ ورتالىعى كىشكەنەكول اۋلىنان كەلگەن ەركىن كۇرەس وكىلى اسىل ەرەجەپوۆ ەكىنشى كۇنگى كۇرەستە تەك بەسىنشى ورىنعا عانا تابان تىرەدى.
«بۇلاردىڭ ءبىرازى – ازيا ويىندارى مەن ازيا چەمپيوناتتارىنىڭ جۇلدەگەرلەرى. سوندىقتان چەمپيونات وتە تارتىستى ءوتىپ جاتىر. ءتىپتى قىزدار اراسىنان دا كۇرەستىڭ كۇردەلى تاسىلدەرىن تەرەڭ مەڭگەرگەندەر كورىنىپ قالادى», دەدى اقتوبە قالاسىنان كەلگەن حالىقارالىق دارەجەدەگى تورەشى بەرىك شالاباەۆ.
تۇركىستان وبلىسىنان كەلگەن داۋلەت قۋانىشبەكتى اڭگىمە تارتقانىمىزدا, ول ءوزىنىڭ بارلىق بەلدەسۋگە دە قۇشتارلىقپەن شىققانىن جەتكىزدى.
«مەن 52 كگ سالماق دارەجەسىندە كۇرەسەمىن. كۇرەسپەن اينالىسقانىما 10 جىلداي بولدى. بىراق بۇگىنگى فينالدا كەزدەسكەن الماتى وبلىسىنان كەلگەن قارسىلاسىم دايىندىعىمنىڭ ءالى دە تومەن ەكەنىن كورسەتىپ, مەنى ۇتىپ كەتتى. سونىمەن 3-ورىنمەن قاناعاتتاندىم», دەدى ول.
وسى چەمپيوناتتا جەڭىپ شىققاندار يسپانياداعى الەم چەمپيوناتىنا قاتىسۋعا جولداما الادى. چەمپيون بولعانداردىڭ كوبى «قازاقستاننىڭ سپورت شەبەرى» ءنورماتيۆىن دە ورىندايدى.
پەتروپاۆل