جەتىسۋدا جىل سايىن جۇزدەگەن وتباسى قونىستويىن تويلاپ, قۋانىشقا كەنەلەدى. بىلتىر ءدال وسى ۋاقىتتا تالدىقورعاندىق تۇرعىندار باسپانالى بولعان ەدى. بيىل دا سول ءۇردىس جالعاسىن تاپتى. مەملەكەتتىك قوردان تۇرعىن ءۇي الۋ ءۇشىن كەزەكتە تۇرعان حالىقتىڭ الەۋمەتتىك وسال ساناتىنداعى ازاماتتارىنا پاتەر كىلتى تابىستالدى.
بىلتىر مەملەكەتتىك ساتىپ الۋ پورتالى ارقىلى 63 پاتەرگە رەسپۋبليكالىق بيۋدجەتتەن 642 ملن تەڭگە بولىنگەن. تۇرعىن ءۇي كوميسسياسى 30 تالدىقورعاندىقتىڭ ءوتىنىشىن قاراپ, جاڭا باسپانانىڭ كىلتىن يەلەرىنە تابىستادى. ال قالعان 33 پاتەر كەزەكتە تۇرعان تۇرعىندارعا الداعى ۋاقىتتا بەرىلەدى دەپ جوسپارلانىپ وتىر.
كوپتەن كۇتكەن قۋانىشىنا جەتىپ, جۇزدەرى بال-بۇل جانعان كوپشىلىكتى تالدىقورعان قالاسى اكىمىنىڭ ورىنباسارى جەڭىس اندابەكوۆ ارنايى قۇتتىقتاپ, ىستىق ىقىلاسىن جەتكىزدى.
ء«بىز كەزەكتە تۇرعان تۇرعىندارعا, بارلىق زاڭدىلىقتى ساقتاي وتىرىپ, پاتەر كىلتىن تابىس ەتتىك. ءۇي كەزەگىندە تۇرعان حالىق سانىن ازايتۋ – مەملەكەت باسشىسىنىڭ نازارىنداعى باستى ماسەلە بولعاندىقتان, ءجىتى قاداعالاۋىمىزدا. جۇمىستىڭ اشىق, ءادىل جۇرگىزىلۋىن ءبىز تىكەلەي نازارعا الامىز. ەشقانداي دا زاڭبۇزۋشىلىق بولعان. وكىنىشكە قاراي, قالا حالقىنىڭ 15 مىڭنان استامى باسپاناعا مۇقتاج. بۇل ماسەلە كەزەڭ-كەزەڭىمەن شەشىلەدى. كەيىنگى ەكى جىلدا وبلىس ورتالىعىندا, ونىڭ ىشىندە حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ جۇمىسى جۇيەلى اتقارىلدى. ءدال وسى قارقىنمەن جۇمىس جۇرگىزىلسە, كەزەك تە ءبىرشاما قىسقارادى. ال بۇگىنگى قۋانىش يەلەرىن شىن جۇرەكتەن قۇتتىقتايمىز! ەندىگى تىلەك شاڭىراقتان شاتتىق پەن بالانىڭ كۇلكىسى ۇزىلمەسە دەيمىز», دەدى قالا اكىمىنىڭ ورىنباسارى ج.اندابەكوۆ.
2008 جىلدان بەرى باسپانا كەزەگىندە تۇرعان كوپبالالى انا كۇلارا ەركەباەۆا 3 بولمەلى پاتەردىڭ كىلتىن يەلەندى. قۋانىشتان كوزىنە جاس العان بەس بالانىڭ اناسى ەدىل مەن جايىق ەسىمدى ەگىز ۇلىن ومىرگە الىپ كەلگەن ساتتە باسپاناعا كەزەككە تۇرعان. قازىر سول ۇلدارى – 17 جاستاعى تەپسە تەمىر ۇزەتىن جىگىتتەر. بىرلىگى مەن بەرەكەسى جاراسقان وتباسى پاتەر جاعالاپ, تالاي تابالدىرىقتى توزدىرعانىن كوزىنە جاس الىپ ەسكە الادى. وباعا قارسى بەكەتتە مەدبيكە بولىپ جۇمىس ىستەيتىن تالدىقورعاندىق كەلىنشەك مەملەكەتتىڭ قامقورلىعىنا ءدان ريزا.
پاتەر كىلتىن تابىستاۋ سالتاناتىنا قايىنجامال اتكەنوۆا بالالارىمەن, تۋعان-تۋىستارىمەن كەلدى. ول مەملەكەتكە باسپانا ماسەلەسىن شەشۋگە قولداۋ كورسەتكەنىنە انالىق العىسىن جەتكىزدى.
«زەينەتكەر, ەڭبەك ارداگەرى رەتىندە 2005 جىلى تۇرعىن ءۇي كەزەگىنە تۇردىم. 8 بالام, 18 نەمەرەم بار. بۇگىن ءبىر بولمەلى پاتەر الدىم. مەملەكەت باسشىسىنا, وبلىس, قالا اكىمدەرىنە ريزاشىلىعىمدى ءبىلدىرىپ, ەلىمىزدىڭ ءاربىر ازاماتىنىڭ شاڭىراعى بيىك, بوساعاسى بەرىك بولسىن دەپ تىلەيمىن. ەڭ باستىسى, تىنىش زاماندا تاتۋ-ءتاتتى ءومىر سۇرەيىك», دەيدى 88 جاستاعى قايىنجامال اجە. ايتا كەتەيىك, الداعى ۋاقىتتا كەزەكتە تۇرعان وتباسىلارعا ءالى دە باسپانا كىلتى تابىستالادى. جەرگىلىكتى بيلىك وكىلدەرى مەملەكەت باسشىسىن تاپسىرماسىنا ساي حالىقتى تولىقتاي پاتەرمەن قامتۋعا كۇش سالىپ جاتىر.
جەتىسۋ وبلىسى