قادىر ءتۇنىن قالاي وتكىزگەن دۇرىس؟

يسلام عۇلامالارى قاسيەتتى قادىر ءتۇنىن تومەندەگىشە اتقارۋدى ۇندەيدى:

1. بۇل تۇندە اللانىڭ ريزالىعى ءۇشىن عيبادات جاساپ, ناماز وقىپ, قۇلدىق سەزىمدەرىمىزدى ارتتىرۋىمىز كەرەك; قۇپتان, تاراۋيح, ءتاھاججۋد, تاۋبە, قاجەت, قازا نامازدارىن وقۋعا تىرىسۋ قاجەت.

2. قۇران كارىم وقۋ, تىڭداۋ, ونى تۇسىنۋگە ىنتا قويىپ, قۇران كارىمگە سۇيىسپەنشىلىك پەن بايلانىستار ورناتىلۋى ءتيىس; 

3. پايعامبارىمىزعا (اللانىڭ يگىلىگى مەن سالەمى بولسىن) سالاۋات ايتىپ, ونىڭ شاپاعات ەتۋىنەن ۇمىتتەنىپ, ونىڭ ۇمبەتىنەن بولعانىمىزدى سانالى تۇردە سەزىنىپ, ونىڭ جولىن بەرىك ۇستانۋىمىز شارت; 

4. ۋاعىز-ناسيحات تىڭداپ, سۇحباتتار قۇرىپ, كۇندەلىكتى كۇيبەڭ  تىرشىلىك بارىسىندا جۇرەككە تۇسكەن كىربىڭدى جۋىپ-شايىپ, كوڭىلگە ۇيالاعان كومەسكىلىكتەن ارىلۋىعا ءتيىستىمىز; 

5. قادىر كەشىنىڭ ماڭىزىنا بايلانىستى جانە قادىر تۇنىنە قاتىستى جەتكىلىكتى ماعلۇمات بەرەتىن ءدىن ادامدارىمەن سۇحبات قۇرۋ كەرەك. اسىرەسە, ادام ءوز وزىمەن سۇحباتتاسىپ, قاتەلىكتەرىن تانىپ, كەمشىلىكتەرىن جويۋعا كۇش سالۋعا, ادامدارمەن دوستىق قارىم قاتىناسىن كۇشەيتۋگە, بىرلىك پەن بىرتۇتاستىقتى ارتتىرۋعا ءمان بەرۋى ءتيىس;

6. تاۋبە مەن يستيعفار جاساپ, ءوز ءناپسىسىن ەسەپكە الىپ, قاتەلىك جاساۋدان ساقتانىپ, قايىرلى ىستەردى جاساۋعا قۇمبىل بولۋى شارت; وسى كۇنگە دەيىنگى بارلىق كۇنالارىڭىز بەن قاتەلىكتەرىڭىزدى ەسىڭىزگە ءتۇسىرىپ, اللا تاعالانىڭ كەشىرۋىن سۇراپ دۇعا جاساڭىز. سەبەبى بارلىق كۇنالاردى كەشىرۋشى جالعىز اللا عانا. 

7. اللانى زىكىر ەتىپ, پىكىر (تەرەڭ جاقسى ويلانۋ) ەتىپ,  ۇلى جاراتۋشىنىڭ ۇشى قيىرى جوق قۇدىرەتىمەن جوقتان بار بولعان جاراتىلىستىڭ سىرلارىنا ءۇڭىلىپ (جاقسى تەرەڭ ويلانىپ), يمانىمىزدى كۇشەيتۋىمىز قاجەت. اللانى ەسكە العاننان جۇرەك تىنىشتالادى; 

8.ء جيى-ءجيى دۇعا جاساۋىمىز كەرەك. ويتكەنى, دۇعا - ادامدى ۇلى جاراتۋشىعا جاقىنداتاتىن دانەكەر. پايعامبارىمىز (اللانىڭ يگىلىگى مەن سالەمى بولسىن) بۇل ءتۇنى كوبىنەسە مىنا دۇعانى جاساعان: 

«اللاھۋمما ينناكا عافۋ’ۋن تۋحيببۋل عافۋا, فاعفۋ انني!».

ماعىناسى: «ۋا جاراتۋشى يەم! ءسوزسىز سەن كەشىرىمدىسىڭ ءارى كەشىرۋدى جاقسى كورەسىڭ. مەنى كەشىرە گور! ايشا انامىز اللانىڭ ەلشىسىنەن: «قادىر تۇنىندە نە ايتسام بولادى؟», دەپ سۇراعاندا, ول وسى دۇعانى ايتۋدى كەڭەس ەتكەن ء[ال-حاكيم, ءال-مۇستادراك –779-باب/№1985-حاديس].

بۇل قادىر ءتۇنىنىڭ قۇرمەتىنە راببىمىزدان بۇكىل مۇسىلمانداردىڭ كۇنالارىنىڭ كەشىرىلۋىن, قادىر ءتۇنىنىڭ جاقسىلىققا مۇرىندىق بولۋىن, دوستىق پەن باۋىرماشىلدىقتى ارتتىرىپ, يسلام الەمىنىڭ بىرتۇتاستىعىن, ەلدىڭ اماندىعىن, كوركەيۋىن جانە كۇللى ادامزاتتى اپاتتاردان ساقتاۋىن تىلەۋىمىز ءتيىس.

9. شاماڭىز كەلەتىن كولەمدە ساداقا بەرىڭىز جانە ساداقاڭىزدىڭ قابىل بولۋىن سۇراپ اللاعا جالبارىنىپ دۇعا ەتىڭىز. ساداقاڭىز قابىل بولسا 83 جىل 4 اي ۇزدىكسىز ساداقا بەرگەن بولاسىز.