بۇگىن «قازمەديا ورتالىعىنىڭ» كينوكونتسەرت زالىندا «قازاقستان» تەلەراديوكورپوراتسياسىنىڭ ۇيىمداستىرۋىمەن « ۇلىستىڭ ۇلى كۇنى» ناۋرىز-مارافونى ءوتتى, دەپ حابارلايدى Egemen.kz.
ءتورت ساعاتقا سوزىلعان مەرەكەلىك مارافونعا مادەنيەت جانە اقپارات ۆيتسە-ءمينيسترى قانات ىسقاقوۆ, ءماجىلىس دەپۋتاتتارى قازىبەك يسا, قاراقات ابدەن, ءۇنزيلا شاپاق, جاناربەك ءاشىمجان, نۇرگۇل تاۋ, ناتاليا دەمەنتەۆا, داۋلەت مۇقاەۆ, سەنات دەپۋتاتتارى دارحان قىدىرالى, گەننادي شيپوۆسكيح, مەملەكەت جانە قوعام قايراتكەرلەرى, زيالى قاۋىم وكىلدەرى, ونەر مەن مادەنيەت وكىلدەرى, جانە ەرەكشە ەرلىگىمەن كوزگە تۇسكەن ازاماتتار قاتىستى.
ناۋرىز تەلەمارافونىندا: ارنايى قۇرىلعان ەتنواۋماق, ءتۇرلى تاقىرىپتاعى تالقىلاۋلار وتكىزىلەتىن ديسكۋسسيا الاڭى, تانىمال مەيماندارمەن سۇحبات جۇرگىزىلگەن ەكسپرەسس-كامەرا جانە ۇلتتىق ويىندار كورسەتىلگەن ارنايى الاڭ مەن ونەر جانە ءسان ۇلگىلەرى ۇسىنىلعان ساحنا ۇيىمداستىرىلدى.
ديسكۋسسيا الاڭىندا «ناۋرىزناما» (ناۋرىزدى زامانعا ساي مەرەكەلەۋ ءداستۇرىن قالىپتاستىرۋ) تاقىرىبى بويىنشا: ەتنوگراف سەرىك ەرعالي, «وتانداستار» قورىنىڭ پرەزيدەنتى ابزال ساپاربەك ۇلى, اقىن سەرىكزات دۇيسەنعازى جانە جۋرناليست گۇلبانۋ ءانيات ءوز ويلارىن ورتاعا سالدى. «ۇلتتىق سەزىم» (ۇلتتىق كيىم ادەبى, مۋزىكا, كينو, سپورت, تەاتر سالاسىنداعى جەتىستىكتەر) ديسكۋسسيالىق تاقىرىبى بويىنشا ءماجىلىس دەپۋتاتى جاناربەك ءاشىمجان, جۋرناليست, بلوگەر الماس التاي, ەتنو-ديزاينەر تاربيا ايدىنباەۆا مەن اكتەر نۇركەن وتەۋىل ءوزارا پىكىر الماستى. ال «جاڭا زاماننىڭ ادامى قانداي بولۋى كەرەك؟» دەگەن سۇراققا قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل, بلوگەر اراي ءالىمحان, ەتنو-ديزاينەر تۇرار ساتتارقىزى جانە بلوگەر امان مامبەتالى جاۋاپ بەردى.
بۇدان بولەك, مارافونعا الماتى وبلىسىنىڭ ىلە اۋدانىندا اۆتوبۋس اپاتى كەزىندە جولاۋشىلاردى امان الىپ قالعان 8-سىنىپ وقۋشىسى اقجول گەروي, بوراندا جولدا قالعان جۇكتى ايەلگە كومەكتەسكەن ەرەيمەنتاۋ اۋداندىق توتەنشە جاعدايلاردى جويۋ ءبولىمىنىڭ قىزمەتكەرى امانگەلدى دوسكەنوۆ, مۇز ويىلىپ, سۋعا ءتۇسىپ كەتكەن 17 جاستاعى ەلوردا تۇرعىنىن قۇتقارىپ قالعان مەرەكە ەدرەسوۆ, 1500-گە جۋىق مۋزىكالىق اسپاپتى جيناپ, ساقتاپ جۇرگەن قولونەر شەبەرى, مۋزىكاتانۋشى ازامات باقيا, بۇركىتشى, «Qazaqstan» تەلەارناسىنان شىعاتىن جاڭا «بۇركىتشى قىز» تەلەحيكاياسىنىڭ كەيىپكەرى ايشولپان نۇرعايىپ, الىپ كۇش يەسى, گيننەس كىتابىنىڭ رەكوردشىسى سەرگەي تسىرۋلنيكوۆ قاتىستى جانە الماتىداعى جەر سىلكىنىسى كەزىندە وتا جاساۋىن توقتاتپاعان كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ حيرۋرگى احىت باعدات تىكەلەي قوسىلىمعا شىقتى.
جوبانىڭ تەلەنۇسقاسى «Qazaqstan» ارناسىنان 22 ناۋرىز كۇنى ساعات 11:45-تە ەفيرگە شىعادى.