بيىل ناۋرىز بەن ماۋسىم ارالىعىندا باتىس قازاقستان وبلىسىنان وتان الدىنداعى اسكەري بورىشىن وتەۋگە 600 جاس جىگىت شاقىرىلادى.
باتىس قازاقستان وبلىستىق قورعانىس ىستەرى جونىندەگى دەپارتامەنت باسشىسىنىڭ ورىنباسارى, پودپولكوۆنيك البەرت بەكمۇحانوۆ اسكەرگە شاقىرۋ پۋنكتتەرىندە قالالىق جانە اۋداندىق اسكەرگە شاقىرۋ كوميسسيالارى جۇمىسىن باستاعانىن حابارلادى.
قولدانىستاعى زاڭعا سايكەس, اسكەرگە شاقىرۋدى كەيىنگە قالدىرۋعا نەمەسە ودان بوساتىلۋعا نەگىزى جوق 18 جاستان 27 جاسقا دەيىنگى قازاقستان رەسپۋبليكاسىنىڭ ازاماتتارى مەرزiمدi اسكەري قىزمەتىن وتەۋگە مىندەتتى. وبلىستا 30 ماۋسىمعا دەيىن قارۋلى كۇشتەر, ۇلتتىق قاۋىپسىزدىك كوميتەتى شەكارا قىزمەتى, ۇلتتىق ۇلان جانە مەملەكەتتىك قىزمەت قاتارىنا 600-دەن استام جاس شاقىرىلماق.
– قورعانىس مينيسترلىگى جاس جىگىتتەردىڭ اسكەري قىزمەتىن وتكەرۋگە ىنتالاندىرۋعا باعىتتالعان ۇسىنىستار ازىرلەپ, جۇزەگە اسىرىپ جاتىر. مىسالى, مەرزىمدى اسكەري قىزمەت وتكەرۋ كەزەڭىندە نەسيەلىك كانيكۋل بەرۋ, اسكەري قىزمەتتىڭ بەلگىلەنگەن مەرزىمىن وتكەرگەن سوڭ ۇبت-عا قاتىسپاي جوعارعى وقۋ ورىندارىنا ءتۇسۋ سياقتى جەڭىلدىكتەر قاراستىرىلعان, – دەيدى البەرت ماركيست ۇلى.
بۇعان قوسا جىل اياعىنا دەيىن قازاقستان رەسپۋبليكاسى ۇكىمەتىنىڭ قاۋلىسىنا سايكەس ەلىمىزدىڭ ءتۇرلى اسكەري قۇرىلىمدارىنا 700 لەيتەنانت كەلۋگە ءتيىس. «سوندىقتان كەيىنگە قالدىرۋعا نەگىزى جوق 29 جاسقا دەيىنگى زاپاستاعى اسكەريلەر, 32 جاسقا دەيىنگى مەديتسينا ماماندىعى بار زاپاستاعى وفيتسەرلەر دە اسكەرگە شاقىرىلادى», دەيدى پودپولكوۆنيك ا.بەكمۇحانوۆ.
باتىس قازاقستان وبلىسى رەسەي فەدەراتسياسىنىڭ 5 وبلىسىمەن شەكتەسىپ جاتقان شەكارالىق ءوڭىر. سوندىقتان جاستار اراسىندا شەكارا قىزمەتى دە جاقسى تانىمال. ۇقك شەكارا قىزمەتى بقو دەپارتامەنتى باسشىسىنىڭ ورىنباسارى, پودپولكوۆنيك مەرەكە ايماعانبەتوۆتىڭ ايتۋىنشا, بىلتىر وڭىردەن 115 سارباز شەكارا قىزمەتىن تاڭداعان.
– ءبىزدىڭ وبلىستان شەكارا قىزمەتىنە شاقىرىلعان جاس ساربازدار اۋەلى الماتى قالاسىندا جانە الماتى وبلىسىندا شەكارا باسقارمالارىندا 2 اي وقىپ, اتىراۋ مەن ماڭعىستاۋ وبلىستارىندا اسكەري قىزمەتىن وتەيتىن بولادى. ورتا, ارنايى جانە جوعارى ءبىلىمى بار ساربازدار 6 ايدان كەيىن كەلىسىم شارت بويىنشا تۇراقتى جۇمىسقا ورنالاسا الادى. ول ءۇشىن ارنايى تەكسەرىستەن جانە اسكەري مەديتسينالىق تەكسەرىستەن ءوتۋى كەرەك. بىلتىر ءبىزدىڭ شەكارا قىزمەتىنە شاقىرىلعان 115 ازاماتتىڭ 35-ءى كەلىسىمشارت ارقىلى جۇمىسقا ورنالاستى. ولارعا اي سايىن 46 098 تەڭگە تۇرعىن ءۇي تولەماقىسى, 240 مىڭ تەڭگەدەن جوعارى ايلىق جالاقى تولەنەدى. تەگىن كيىم جانە تاماقپەن قامتاماسىز ەتىلەدى, – دەيدى م.ايماعانبەتوۆ.
ءبىر قۋانارلىعى, كەيىنگى جىلدارى اسكەر قاتارىنا شاقىرىلعان ورالدىق جاستاردىڭ دەنساۋلىعىندا وڭ وزگەرىس بار ەكەن. «بۇرىن جاستاردا جۇرەك, قۇلاق, كوز اۋرۋلارى, حيرۋرگيالىق سىرقاتتار ءجيى تىركەلەتىن. 2023 جىلعى اسكەري مەديتسينالىق كوميسسيالار ناتيجەسى 2021-2022 جىلدارعا قاراعاندا اسكەر قاتارىنا دەنساۋلىعى جاراماي قالعان جاستاردىڭ سانى ازايعانىن كورسەتتى», دەيدى ا.بەكمۇحانوۆ.
ارينە, ەلدى, جەردى قورعاۋ ءار ازاماتتىڭ قاسيەتتى بورىشى ەكەنى ءسوزسىز. وسىناۋ اسكەري قىزمەتتىڭ ابىرويىن اسىرىپ, جاستار اراسىندا ناسيحاتتاۋ ىسىنە ورال قالاسىنداعى 5517 اسكەري ءبولىمى دە بارىنشا ۇلەس قوسىپ وتىر. بۇگىندە ەلىمىزدىڭ ءار اۋماعىنان كەلگەن 400-گە جۋىق ازامات ۇلتتىق ۇلانعا قاراستى 5517 اسكەري بولىمىندە وتان الدىنداعى بورىشىن ورىنداپ, ۇلكەن ءومىر مەكتەبىنەن ءوتىپ جاتىر.
– جاستاردىڭ بويىندا پاتريوتتىق سەزىمدى وياتۋ ماقساتىندا ءبىزدىڭ اسكەري قۇرىلىمدار ايانباي ەڭبەك ەتىپ كەلەدى. اسىرەسە قازاقستان رەسپۋبليكاسىنىڭ ۇلتتىق ۇلانى كوپتەگەن ءىس-شارا وتكىزىپ ءجۇر. اسكەري بولىمدەردەگى اشىق ەسىك كۇندەرى, مەكتەپ وقۋشىلارىنا ارنالعان ۇگىت-ناسيحات جۇمىستارى, باسقا دا ءىس-شارالار وسىنىڭ ايعاعى, – دەيدى «باتىس» وڭىرلىك قولباسشىلىعى ءباسپاسوز قىزمەتىنىڭ وفيتسەر ءتىلشىسى, لەيتەنانت باقداۋلەت ماناربەك.
مىسالى, جاقىندا 5517 اسكەري ءبولىمنىڭ تاربيە جانە الەۋمەتتىك-قۇقىقتىق جۇمىس جونىندەگى بولىمشە قىزمەتكەرلەرى №19 ورتا مەكتەپتىڭ جوعارى سىنىپ وقۋشىلارىمەن كەزدەسىپ, ۇلتتىق ۇلان اكادەمياسىنا وقۋعا شاقىردى. كەزدەسۋدە اسكەري قىزمەتتىڭ قىر-سىرى, وتان قورعاۋ جولىندا ابىرويعا بولەنگەن اعا ۇرپاقتىڭ ونەگەلى ىستەرى ايتىلدى.
ال ۇلتتىق ۇلاننىڭ «باتىس» وڭىرلىك قولباسشىلىعىنا قاراستى 5517 اسكەري بولىمىندە وتكەن «اشىق ەسىك كۇنى» اتتى ءىس-شاراعا ورال قالاسىنداعى مەكتەپتەردىڭ جوعارى سىنىپ وقۋشىلارى قىزىعا كەلدى. ولار بولىمدەگى اسكەري تەحنيكامەن, قارۋ-جاراق تۇرلەرىمەن تانىستى. مۇنداي جيىندار وسكەلەڭ ۇرپاقتىڭ اسكەري-پاتريوتتىق سەزىمىن كۇشەيتىپ, جاستار اراسىندا ۇلتتىق ۇلاننىڭ ءيميدجىن كوتەرەرى ءسوزسىز دەيدى ۇيىمداستىرۋشىلار.
باتىس قازاقستان وبلىسى