سىرتقى ىستەر مينيسترلىگىندە اتالعان ۆەدومستۆونىڭ رەسمي وكىلى اسقار ابدراحمانوۆتىڭ قاتىسۋىمەن ءداستۇرلى بريفينگ ءوتتى. بريفينگ بارىسىندا رەسمي وكىل ەقىۇ-نىڭ ءىس باسىنداعى توراعاسى, مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ قىرعىزستاندا قالىپتاسقان جاعدايلارعا بايلانىستى مالىمدەمەسىن وقىپ بەردى.
ا.ابدراحمانوۆتىڭ ايتۋىنشا, ەقىۇ-نىڭ ءىس باسىنداعى توراعاسى قانات ساۋداباەۆ قىرعىزستانداعى جاعدايدى رەتكە كەلتىرۋ ماقساتىندا پارلامەنت ءماجىلىسى توراعاسىنىڭ ورىنباسارى جانىبەك كارىبجانوۆتى جانە بۇۇ حاتشىلىعىنىڭ قاقتىعىستاردىڭ الدىن الۋ ءجونىندەگى ورتالىعىنىڭ جەتەكشىسىن ارنايى وكىل رەتىندە جىبەرگەن.
بۇدان كەيىن رەسمي وكىل تاياۋ كۇندەرگە جوسپارلانعان ءىس-شارالار بارىسى جونىندە ايتتى. ماسەلەن, كەشە, 14 ماۋسىمدا ۆەنادا قازاقستان توراعالىعىنىڭ باسشىلىعىمەن قاۋىپسىزدىك سالاسىنداعى ماسەلەلەرگە شولۋ جونىندەگى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ جىل سايىنعى كونفەرەنتسياسى باستالىپتى. بۇل شارا بارىسىندا اتالعان ۇيىمعا مۇشە ەلدەردىڭ ترانسۇلتتىق قاۋىپ-قاتەرلەرگە قارسى كۇرەستەگى ىنتىماقتاستىعىنىڭ احۋالى مەن كەلەشەگى, قاۋىپسىزدىك پەن سەنىم شارالارىن نىعايتۋ, ۇيىمنىڭ قاقتىعىستاردىڭ الدىن الۋ مەن ەسكەرتۋدەگى جانە بولدىرماۋداعى رولىنە قاتىستى ماسەلەلەر تالقىلانادى.
ال 15-17 ماۋسىم كۇندەرى لوندوندا وتەتىن “قازاقستان: دامۋدىڭ جاڭا كوكجيەكتەرى” اتتى جىل سايىنعى بەسىنشى حالىقارالىق فورۋمعا جانە قازاقستان-بريتانيا ساۋدا-ونەركاسىپ كەڭەسىنىڭ كەزەكتى 14-ءشى وتىرىسىنا قازاقستان پرەمەر-ءمينيسترىنىڭ ءبىرىنشى ورىنباسارى ومىرزاق شوكەەۆ باستاعان وتاندىق دەلەگاتسيا قاتىسپاق.
بۇدان كەيىنگى كەزەكتە رەسمي وكىل 17 ماۋسىمدا ەلىمىزدىڭ ەكونوميكالىق دامۋ جانە ساۋدا مينيسترى جانار ايتجانوۆا باستاعان وتاندىق دەلەگاتسيانىڭ پەتەربوردا وتەتىن تمد ەكونوميكالىق كەڭەسىنىڭ 46-شى وتىرىسىنا قاتىساتىنىن, وندا ءوزارا ەكونوميكالىق ءارىپتەستىكتى نىعايتۋ ماسەلەلەرى قارالاتىنىن اتاپ ءوتتى. بريفينگ بارىسىندا سونداي-اق, 17-18 ماۋسىم ارالىعىندا ۆەنادا ادام ساۋداسىنا قارسى اليانستىڭ 10-شى كونفەرەنتسياسى وتەتىندىگى ايتىلدى.
“ال 18 ماۋسىمدا ەۋروپالىق وداقپەن ساياسي ديالوگ ورناتۋ كەستەسىنە سايكەس, بريۋسسەلدە “قازاقستان-ەۋروپالىق وداق” ىنتىماقتاستىق كوميتەتىنىڭ كەزەكتى 10-شى وتىرىسى وتەدى. وندا قازاقستانىڭ ەۋروپالىق وداقپەن ستراتەگيالىق ارىپتەستىكتى ودان ءارى دامىتۋ ماسەلەلەرى قارالماق”, دەدى رەسمي وكىل.
ءلايلا ەدىلقىزى.