ءماجىلىس سپيكەرى ەرلان قوشانوۆتىڭ توراعالىعىمەن بيۋرو ءوتىپ, الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتاردىڭ تالقىلاۋىنا مەملەكەت باسشىسىنىڭ 2022 جىلعى 13 ساۋىردەگى «ادام قۇقىقتارى سالاسىنداعى ودان ءارى شارالار تۋرالى» جارلىعىن ىسكە اسىرۋ ءۇشىن ازىرلەنگەن «قازاقستان رەسپۋبليكاسىنداعى ادام ساۋداسىنا قارسى ءىس-قيمىل تۋرالى» ۇكىمەتتىك زاڭ جوباسىن ءبىرىنشى وقىلىمدا قاراۋ ۇسىنىلادى. زاڭعا ىلەسپە زاڭ جوبالارى «نەكە (ەرلى-زايىپتىلىق) جانە وتباسى تۋرالى», قىلمىستىق, قىلمىستىق ءىس جۇرگىزۋ كودەكستەرىنە, سونداي-اق «جابىرلەنۋشىلەرگە وتەماقى قورى تۋرالى» زاڭعا تۇزەتۋلەر ەنگىزىلەدى.
اتاپ ايتقاندا, قىلمىستىق كودەكس بويىنشا ادام ساۋداسىنىڭ انىقتاماسى كەڭەيتىلىپ, كامەلەتكە تولماعانداردىڭ جىنىستىق قىزمەتتەرىن پايدالانۋ قىلمىستىق جاۋاپكەرشىلىككە تارتىلادى. اكىمشىلىك قۇقىق بۇزۋشىلىق تۋرالى كودەكسكە ەنگىزىلگەن وزگەرىستەرگە سايكەس مەديتسينالىق ۇيىمدار مەن ۇيىمداردىڭ لاۋازىمدى ادامدارىنىڭ جەتىم بالالار مەن اتا-اناسىنىڭ قامقورلىعىنسىز قالعان بالالارعا جاڭا تۋعان نارەستەنى تاستاپ كەتۋ فاكتىسى تۋرالى حابارلاماعانى ءۇشىن جاۋاپكەرشىلىك كوزدەلەدى.
الداعى جالپى وتىرىستا دەپۋتاتتار ازىرلەگەن كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى تۋرالى زاڭ جوباسى ەنگىزىلەدى. قۇجات ازاماتتاردىڭ بورىشتىق جۇكتەمەسىن تومەندەتۋ ءۇشىن جاعداي جاساۋعا جانە قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ دەڭگەيىن ارتتىرۋعا باعىتتالعان. زاڭ جوباسىن ەكىنشى وقىلىمعا دايىنداۋ بارىسىندا ۇكىمەت دەپۋتاتتاردىڭ تۇزەتۋلەرىن قولدادى.
ونىڭ ىشىندە, بانكتىك قارىزدار مەن ميكروكرەديتتەر بويىنشا سىياقىنىڭ جىلدىق ءتيىمدى مولشەرلەمەسىنىڭ شەكتى كولەمىن ايقىنداۋ, كاسىپكەرلىك قىزمەتتى جۇزەگە اسىرۋعا بايلانىستى ەمەس جەكە تۇلعانىڭ بانكتىك قارىز جانە ميكروكرەديت شارتتارى بويىنشا قۇقىقتاردى كوللەكتورلىق اگەنتتىككە (تالاپتارعا) بەرۋگە 2026 جىلعا دەيىن موراتوري ەنگىزۋ, بانك ومبۋدسمانىنا تەك بانكتىك نەسيەلەر بويىنشا داۋلاردى قاراۋ جونىندەگى وكىلەتتىكتەردى بەكىتۋ جانە ميكروقارجى ومبۋدسمانى ينستيتۋتىن ەنگىزۋ ماسەلەلەرى بار.
سونىمەن قاتار ءماجىلىستىڭ كۇن تارتىبىندە 1993 جىلعى 14 قاڭتارداعى ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ تۋرالى قىتايمەن جاسالعان شارتقا, سونداي-اق دەنساۋلىق ساقتاۋ ماسەلەلەرى جونىندەگى زاڭ جوباسىنا سەناتتىڭ تۇزەتۋلەرىنە وزگەرىستەر ەنگىزىلگەن حاتتامانى راتيفيكاتسيالاۋ تۋرالى زاڭ جوبالارى بار.