اقپان ايىنىڭ سوڭىندا استانا قالاسىندا «زەردەلى» اقىل-ويدى دامىتۋ مەكتەبىنىڭ ۇيىمداستىرۋىمەن باستاۋىش سىنىپ مۇعالىمدەرىنە ارنالعان «التىن تۇعىر» رەسپۋبليكالىق وليمپياداسى ءوتتى.
بۇل سايىسقا باتىس قازاقستان وبلىسىنان 7 باستاۋىش سىنىپ مۇعالىمى قاتىسىپ, بارلىعى جەڭىس تۇعىرىنان كورىندى. ءسويتىپ, وبلىس كوماندالىق ەسەپتە جۇلدەرى 3-ورىندى يەلەندى.
سونىڭ ىشىندە ورال قالاسى №25 ورتا مەكتەبىنىڭ باستاۋىش سىنىپ مۇعالىمى نۇرباقىت جامبىلوۆا, بايتەرەك اۋدانى ماكاروۆ ورتا مەكتەبىنىڭ باستاۋىش سىنىپ مۇعالىمى ليۋدميلا كيچاتوۆا جانە تەرەكتى اۋدانى تالپىن نەگىزگى مەكتەبىنىڭ باستاۋىش سىنىپ مۇعالىمى اقتولقىن نىقمۇقانوۆا ەكىنشى ورىن السا, ورال قالاسى قادىر مىرزا ءالى اتىنداعى №47 ورتا مەكتەبىنىڭ باستاۋىش سىنىپ مۇعالىمى نينا ەسجانوۆا, ءبورلى اۋدانى پۋگاچەۆ مەكتەپ بوبەكجاي-بالاباقشا كەشەنىنىڭ باستاۋىش سىنىپ مۇعالىمى ناتاليا موسەيكو, شىڭعىرلاۋ اۋدانى ل.قىلىشەۆ اتىنداعى ورتا مەكتەبىنىڭ باستاۋىش سىنىپ مۇعالىمى ساعىناي ناعىموۆا جانە قاراتوبە اۋدانى ۇشاعاش نەگىزگى ورتا مەكتەبىنىڭ باستاۋىش سىنىپ مۇعالىمى جانات زەينۋللينا ءۇشىنشى جۇلدەگە يە بولدى.
ءبىز ەلوردادان جەڭىسپەن كەلگەن نينا ەسجانوۆاعا جولىعىپ, جەتىستىگىمەن قۇتتىقتادىق.
«شىنىن ايتساق, باستاۋىش سىنىپ مۇعالىمدەرىنە ارنالعان وبلىستىق, رەسپۋبليكالىق سايىستار كوپ ەمەس. بۇدان بۇرىن قالالىق بايقاۋلاردان ءبىرىنشى ورىن الىپ جۇرسەم دە, جوعارى دەڭگەيدەگى سايىسقا جولداما الىپ كورمەگەن ەدىم. بۇل استاناعا ءبىرىنشى بارۋىم. «التىن تۇعىر» رەسپۋبليكالىق وليمپياداسى وتە تارتىستى ءوتتى. سوڭىنان مۇعالىمدەرگە ارنالعان وقىتۋ سەمينارىندا وليمپيادالىق ەسەپتەردى شىعارۋ جولدارى, بالالاردى دايىنداۋ جونىندە ناقتى اقىل-كەڭەس الدىق. وسى ەكى كۇندىك ءىس-شارا ءوزىم ءۇشىن وتە پايدالى بولدى», دەيدى نينا نۇرمانعاليقىزى.
نينا ەسجانوۆا – پەداگوگ-زەرتتەۋشى بىلىكتىلىك ساناتىنا يە, 17 جىل پەداگوگيكالىق ءوتىلى بار تاجىريبەلى ۇستاز. جاڭاقالا اۋدانى قىزىلوبا اۋلىندا تۋىپ-وسكەن نينا نۇرمانعاليقىزى 2006 جىلى ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىن باستاۋىش سىنىپ مۇعالىمى ماماندىعى بويىنشا بىتىرگەن ەكەن. كەيىنگى التى جىل بويىنا قادىر مەكتەبىندە قىزمەت ەتىپ كەلەدى.
قادىر مىرزا ءالى اتىنداعى №47 ورتا مەكتەبىنىڭ عيماراتى 1200 وقۋشىعا ارنالعانىمەن, مۇندا قازىر ءبىلىم الىپ جاتقان بالالار سانى 3 مىڭنان اسىپ كەتكەن. ءبىزدىڭ كەيىپكەرىمىز 2 «ا» سىنىبىن وقىتادى, سىنىپتا 28 وقۋشى بار. ال مەكتەپ بويىنشا ءدال وسى 2-سىنىپتىڭ 12 پاراللەل سىنىبى بار ەكەن.
«مەن بۇرىن №45 مەكتەپتە قىزمەت ەتتىم. ول جەردە ءار سىنىپتا ەڭ كوپ دەگەندە 24 وقۋشىدان اسىپ كورمەپ ەدى. ارينە, سىنىپتا بالا از بولعان سايىن ونى وقىتۋ ساپاسى جوعارى بولادى. دەگەنمەن بارىنشا تىرىسىپ, ەڭبەك ەتىپ جاتىرمىز. باستاۋىش سىنىپتا بالاعا اتا-انانىڭ كومەگى كەرەك. مۇعالىم مەكتەپتە, اتا-انا ۇيدە ەكى جاقتان تىزە قوسسا, بالانىڭ وقۋ ۇلگەرىمى دە جوعارى, ناتيجەلى بولادى. قۇدايعا شۇكىر, پاراللەل سىنىپتار اراسىندا ءبىزدىڭ 2 «ا» سىنىبى الدىڭعى قاتاردا», دەيدى نينا نۇرمانعاليقىزى.
اڭگىمەلەسە كەلە نينا ەسجانوۆانىڭ ۇستازدار اۋلەتىنەن ەكەنىن ەستىپ بىلدىك. ءاۋ باستا اجەسى ۇلداي توقتاروۆا 60-جىلداردان باستاپ جاڭاقالا اۋدانىنداعى مەكتەپتەردە كىتاپحاناشى بولىپ قىزمەت ەتكەن ەكەن. ال ءوز اكەسى نۇرمانعالي شارىپقاليەۆ ماتەماتيكا ءپانى مۇعالىمى بولسا, اناسى يرايدا شارىپقاليەۆا ورىس ءتىلى ءپانى مۇعالىمى بولىپ ءومىر بويى شاكىرت وقىتىپتى. «ولار قىزىلوبا اۋلىندا 40 جىل ۇستازدىق ەتىپ, زەينەت دەمالىسىنا شىقتى. اۋىلدا تۇراتىن كوپ اۋلەتتىڭ ءۇش بۋىنى مەنىڭ اتا-انامنىڭ الدىنان وقۋشى بولىپ وتكەن», دەيدى نينا.
«ۇيادا نە كورسەڭ, ۇشقاندا سونى ىلەسىڭ» دەيدى عوي قازاق. مۇعالىمدەر وتباسىندا دۇنيەگە كەلگەن ءتورت بالا دا اتا-انا جولىن قۋىپتى. اعاسى گەيرات شارىپقاليەۆ مۋزىكا مەكتەبىندە مۇعالىم بولسا, اپاسى اسەل شارىپقاليەۆا مەكتەپتە پسيحولوگ بولىپ قىزمەت ەتكەن. ال ءىنىسى تيمۋر شارىپقاليەۆ ءوزى تۋىپ-وسكەن قىزىلوبا اۋلىندا ينفورماتيكا ءپانىنىڭ مۇعالىمى ەكەن.
«اتا-انام مەنىڭ ماتەماتيكا فاكۋلتەتىنە بارعانىمدى قالادى. كىشكەنتايىمنان ەسەپكە جۇيرىك ەدىم. بىراق ءوزىم اۋەلدەن كىشكەنە بالالارمەن جۇمىس ىستەگەندى جاقسى كورگەندىكتەن, ءوز قالاۋىممەن باستاۋىش مەكتەپ مۇعالىمى ماماندىعىن تاڭدادىم», دەيدى نينا.
نينا نۇرمانعاليقىزىنىڭ ءوزى دە بۇگىندە 4 ۇل تاربيەلەپ وتىرعان كوپبالالى انا ەكەن. «ۋاقىتىمدى جانىم سۇيگەن جۇمىسىم مەن وتباسىما تەڭ بولەمىن. ءتۇرلى ۇسىنىس كوپ بولسا دا, قوسىمشا جۇمىستاردان باس تارتتىم. تۇسكە دەيىن ءوز سىنىبىمدى وقىتامىن, قاجەت بولسا, كەي كۇندەرى بالالاردى قوسىمشا ساباققا شاقىرامىن. قالعان ۋاقىتىمنىڭ ءبارىن وتباسىما, بالالارىما ارنايمىن», دەيدى ۇلاعاتتى ۇستاز.
...باستاۋىش سىنىپ – بالا بويىنداعى ءبىلىمنىڭ ىرگەتاسى قالاناتىن وتە ماڭىزدى كەزەڭ. شاكىرتتىڭ جۇلدىزى جانىپ, ءىلىم-بىلىمگە ىقىلاسى اشىلۋى كوبىنە العاشقى ۇستازىنا بايلانىستى. مەكتەپ تابالدىرىعىن اتتاعان بالاعا نينا نۇرمانعاليقىزى سىندى بىلىكتى ۇستاز تاپ بولسا, اتا-انانىڭ ارمانى سول ەمەس پە؟
باتىس قازاقستان وبلىسى