جاركەنتتىك قىز-كەلىنشەكتەر كاسىپكە ەرەكشە دەن قويىپ كەلەدى. قازىر سول وڭىردە جۇزدەگەن ايەل كاسىپكەر بار. كوبى ارۋعا ءتان يگىلىكتى ءىستىڭ تۇتقاسىن ۇستاعان. ماسەلەن, «سانام» كۋلينارلىق تسەحىنىڭ قوجايىنى سانام سادىقوۆا ءوز اۋدانىن عانا ەمەس, كورشىلەس ۇيعىر اۋدانىنىڭ تۇرعىندارىن دا تاتتىمەن قامتاماسىز ەتىپ كەلەدى.
ءبىراز جىلدان بەرى جاركەنت قالاسىنىڭ برەندىنە اينالعان «سانام» ءتاتتى تاعامدارى جەتىسۋلىقتاردىڭ دا اۋزىندا. بۇگىندە اتالعان تسەح پانفيلوۆ, ۇيعىر اۋداندارىنداعى وتىزعا جۋىق كافەتەري مەن ازىق-ت ۇلىك دۇكەنى ارقىلى وزدەرى ءپىسىرىپ دايىنداعان كۋلينارلىق تاتتىلەرىن ساۋدالاپ كەلەدى. تۇتىنۋشىلاردى اسەم بەزەندىرىلگەن تورت پەن ءتاتتى تۇرلەرىنىڭ قولجەتىمدى باعاسى قۋانتادى. داستارقان كوركىن كىرگىزەتىن بال تاتىعان توقاشتار ارالۋاندىعىمەن كوز اربايدى.
«مەرەكە جاقىنداعان سايىن تاتتىلەرگە سۇرانىس كوپ بولادى. ونىڭ ۇستىنە بۇل تاعامدار ۋاقىت تاڭدامايدى, حالىق كۇندەلىكتى تۇتىنعاندىقتان ءوتىمدى. قولدا تۇرمايدى دەسەك تە بولادى. ءبىز وتە ۇقىپتىلىقپەن تۇتىنۋشىنىڭ تالابىن ەسكەرە وتىرىپ دايىندايمىز. سوندىقتان بۇگىنگە دەيىن ەشكىمنەن جاعىمسىز پىكىر ەستىپ كورگەن جوقپىز. ساۋدامىز ساتىمەن ءجۇرىپ جاتىر. تۇتىنۋشىلاردى كۇن سايىن پىسىرىلگەن ءدامدى تاعامدارىمىزبەن قۋانتىپ جاتىرمىز», دەيدى «سانام» كۋلينارلىق تسەحىنىڭ قوجايىنى س.سادىقوۆا.
كاسىپكەر كەلىنشەكتىڭ نەگىزگى ماماندىعى – استىق ساقتاۋ مەن قايتا وڭدەۋ تەحنولوگى. جەكە كاسىپكەرلىكپەن شۇعىلداناردان بۇرىن كوكتال جۇگەرى زاۋىتىندا ساراپشى بولىپ ەڭبەك ەتكەن. 1986 جىلى جاركەنت قالاسىنداعى قۇرىلىس ماتەريالدارى زاۋىتىنا ساپا ينجەنەرى قىزمەتىنە اۋىسادى. ونىڭ كۋلينارلىق قىزمەتتى تاڭداۋىنا توقسانىنشى جىلدارداعى ءىرى كاسىپورىندار مەن زاۋىتتاردىڭ جاپپاي جابىلا باستاۋى سەبەپ بولعان. ءوز ماماندىعى بويىنشا جۇمىس تاپپاي, ەلمەن بىرگە قىتاي تاۋارلارىن ساۋدالاپ ءجۇرىپ, ءتورت كۇنگە ۇرىمجىگە بارادى. وسى قالاداعى ارنايى تەحنولوگيامەن تاتتىلەر پىسىرەتىن «ارماني» ءوندىرىس كومبيناتىنىڭ جۇمىسىمەن تانىسادى. ءدامى بال تاتىعان ءتاتتىنىڭ تۇرلەرى ونى تامساندىرىپ قانا قويماي, وندىرىسكە دەگەن قىزىعۋشىلىعىن ارتتىرادى. سول ساتتە ول جەرلەستەرىنە وسىنداي كۋلينارلىق شەبەرلىكپەن پىسىرىلگەن ءتاتتى تاعامدار ۇسىنۋدى ماقسات ەتكەن. 2003 جىلى «سانام» جك بيزنەسىن باستاپ, وتباسىلىق كاسىپورىن اشقان. جولداسى قۇربانجان تاياموۆ تا كەلىنشەگىنىڭ بيزنەسىن قولداپ, كاسىپكەرلىكتىڭ وركەن جايۋىنا كومەگىن تيگىزگەن. قازىر ۇجىمدا 47 ادام قىزمەت ىستەيدى. ۋاقىت وتكەن سايىن كاسىپورىندا وندىرىلەتىن ءونىم ءتۇرى كوبەيىپ, وندىرىستىك قۋات ارتىپ كەلەدى. 2017 جىلى سانام سادىقوۆا رەسپۋبليكالىق «اق داستارقان» بايگەسىنە قاتىسىپ, 3-ورىندى جەڭىپ السا, 2019 جىلعى ناۋرىزدا «بەيبىتشىلىك الەمى» حالىقارالىق شىعارماشىلىق بىرلەستىگىنىڭ «ۇزدىك كاسىپكەر» مەدالىمەن ماراپاتتالعان.
وتباسىلىق بيزنەستى وركەندەتكەن كاسىپكەر انا وڭىردەگى قايىرىمدىلىق شارالارىنان تىس قالمايدى. سوڭعى بىرنەشە جىلدان بەرى 3 مەكتەپتەگى 100 وقۋشىنى تەگىن ىستىق تاماقپەن قامتاماسىز ەتەدى. بۇدان باسقا, بالالاردى قورعاۋ كۇنى, جاڭا جىل مەرەكەسىندە از قامتىلعان وتباسىلار مەن مۇگەدەك بالالارعا وزدەرىنىڭ ءتاتتى تاعامدارىن ۇسىنادى. جەرۇيىق اۋىلىنداعى ورتا مەكتەپكە قۇرىلىس ماتەريالدارىن, باسقا دا قاجەت زاتتاردى الۋعا قارجىلاي كومەك كورسەتەدى.
جەتىسۋ وبلىسى