نازارباەۆ ۋنيۆەرسيتەتىندە «اباي تاعىلىمى: «تولىق ادام» جانە ادىلەت» اتتى سەمينار-ترەنينگ ءوتتى. تاعىلىمدى ءىس-شارانىڭ تىزگىنىن وسى وقۋ ورنى ۇلتتىق مادەني ورتالىعىنىڭ ديرەكتورى, پروفەسسور گۇلتاس قۇرمانباي ۇستادى.
نازارباەۆ ۋنيۆەرسيتەتى – ەلىمىزدەگى تاريحى جونىنەن ەڭ جاس ءارى حالىقارالىق جوعارى وقۋ ورنى. الەمنىڭ ەڭ ۇزدىك عالىمدارىنان, وقىتۋشى-پروفەسسورلارىنان ءبىلىم الىپ جاتقان ستۋدەنتتەر ۋنيۆەرسيتەتتە ءجۇرىپ-اق عىلىمي جاڭالىقتار اشىپ, تىرناقالدى ەڭبەكتەرىن حالىقارالىق عىلىمي باسىلىمداردا جاريالاپ ءجۇر. الەمدىك دەڭگەيدەگى ءبىلىم العان ۋنيۆەرسيتەت تۇلەكتەرى ەرتەڭ ەل ىسىنە ارالاسقاندا, ولاردىڭ بويىندا ەڭ باستىسى ادامگەرشىلىك قاسيەت بولۋى قاجەت. وسى ماقساتتا نازارباەۆ ۋنيۆەرسيتەتى تاربيە جۇيەسىن ابايدىڭ «تولىق ادام» تۇجىرىمداماسىمەن جۇرگىزۋدى قولعا الدى.
جيىن بارىسىندا گۇلتاس قۇرمانباي ۇلى اقىننىڭ تۇجىرىمداماسىن كەڭىنەن تارقاتىپ, بۇل قاسيەتتەر جاڭا زاماندا دا ۇلتتىق ۇستانىمعا, ومىرلىك ماقساتقا اينالۋى قاجەتتىگىن تىلگە تيەك ەتتى.
«نۇرلى اقىل, ىستىق قايرات, جىلى جۇرەكتى ولشەيتىن تارازى – ادىلەت. تولىق ادام بولۋ ءۇشىن وسى ءۇش قاسيەت جينالىپ, ادىلەتكە سىن ارتۋى كەرەك», دەدى ول. سونىمەن قاتار پروفەسسور ءبىلىم الۋشىلارعا ۇلى اقىننىڭ شىعارماشىلىعىن قالاي جانە قاي ولەڭدەرىن وقىتۋ كەرەكتىگى جونىندە ءوز جوباسىن تانىستىردى.
سەمينار سوڭىندا «ۇلتتىق قۇندىلىقتار اكادەمياسى» قوعامدىق بىرلەستىگىنىڭ توراعاسى دۇيسەبەك ءادىلحان ەلىمىزدىڭ ورتا ءبىلىم بەرۋ جۇيەسى ۇلتتىق مودەرنگە كوشىرىلۋ كەرەكتىگىن, ال سونىڭ نەگىزگى تۇعىرى – ابايدىڭ «تولىق ادام» تۇجىرىمداماسى ەكەنىن ايتتى.
اباي فيلوسوفياسىنىڭ تەرەڭ تامىرلارىن اشىپ كورسەتكەن جيىن ءوز ماقساتىنا جەتتى دەپ ويلايمىز.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى