ۋاقىتىندا اۋدان ورتالىعى رەتىندە اتى دۇركىرەگەن اقكول اۋىلى تاۋەلسىزدىكتىڭ ەلەڭ-الاڭىندا تالاي قيىندىقتى باستان وتكەردى. جىلدار جىلىستاعان سايىن جەرگىلىكتى اتقارۋشى بيلىك ەلدى مەكەن تۇرعىندارىنىڭ تالاپ-تىلەگىن ەسكەرىپ, الەۋمەتتىك ماسەلەلەر وڭىنان شەشىلە باستادى. ەندى, مىنە, اۋىل تۇرعىندارى تالاي جىل «جىرلاعان» كوگىلدىر وتىن ماسەلەسى دە شەشىمىن تاپتى.
تالاي مىقتى تۇلعا دۇنيەگە كەلگەن اقكول اۋىلىندا جالپى سانى 411 اۋلادا 2 242 ادام قونىستانعان. بىرلىگى جاراسقان اۋىل تۇرعىندارى ءدال وسى قۋانىشتى ءساتتى جىلدار بويى كۇتتى. سول ءۇمىتتى اقتاپ, جەرگىلىكتى بيلىك ۋادەسىن ورىنداپ, اۋىل تۇرعىندارىن قۋانتىپ وتىر.
ءوڭىر باسشىسى ەربول قاراشوكەەۆ اقكولدىك اعايىننىڭ قۋانىشىنا ورتاقتاستى. كوگىلدىر وتىندى كوپتەن كۇتكەن تۇرعىندارمەن جۇزدەسكەن وبلىس باسشىسى تالاس اۋدانىنىڭ وزگە دە اۋىلدارىنداعى الەۋمەتتىك ماسەلەلەردى رەتىمەن شەشۋ جۇمىستارى الداعى ۋاقىتتا دا تولاسسىز جالعاسا بەرەتىنىن, حالىقتىڭ مۇڭ-مۇقتاجىن تىڭداۋعا قاشان دا ءازىر ەكەنىن ايتىپ, جەرگىلىكتى جۇرتشىلىقتى تابيعي گازدىڭ اۋىلعا جەتۋىمەن قۇتتىقتادى.
«مەملەكەت باسشىسى قاسىم-جومارت توقاەۆ جەرگىلىكتى اتقارۋشى بيلىك وكىلدەرىنە حالىقتىڭ تۇرمىس-تىرشىلىگىن بارىنشا جاقسارتۋ قاجەتتىگىن تاپسىرعانى ءمالىم. وسى تۇرعىدان العاندا ەلىمىزدىڭ ءار قيىرىندا اۋقىمدى جۇمىستار قولعا الىنىپ, وڭ ناتيجە بەرىپ جاتقانىن كۇنبە-كۇن كورىپ ءجۇرمىز دەسەك, قاتەلەسپەيمىز. ءبىزدىڭ باستى ماقساتىمىز – ءوڭىر جۇرتىنىڭ ۇنىنە قۇلاق اسۋ, ماسەلەلەردى دەر كەزىندە شەشۋ. تالاي تارلان تۇلعا دۇنيەگە كەلگەن تالاس اۋدانىنداعى تۇيتكىلدى ماسەلەلەردى دەر كەزىندە شەشۋگە ءبىز قاي كەزدە دە كۇش سالۋعا دايىنبىز. بۇگىن اۋدانداعى ءىرى ەلدى مەكەندەردىڭ ءبىرى سانالاتىن اقكول اۋىلىندا تابيعي گاز پايدالانۋعا بەرىلىپ وتىر. بۇل – اۋىل تۇرعىندارى ۇزاق جىلدار بويى سارىلا كۇتكەن قۋانىش. ەلدى مەكەن حالقىن وسى ءبىر قۋانىشتى ساتپەن قۇتتىقتايمىن. جاقسى كۇندەرىمىز كوپ بولسىن», دەدى ە.قاراشوكەەۆ.
ءىس-شارا بارىسىندا ءسوز العان اقكول اۋىلدىق وكرۋگى ارداگەرلەر كەڭەسىنىڭ توراعاسى دوسبولات تۋعانباەۆ ءسوز الىپ, جەرگىلىكتى حالىقتىڭ قۋانىشىنا ورتاقتاسقان ءوڭىر باسشىسىنا ريزاشىلىعىن جەتكىزدى.
تالاس اۋدانى اكىمدىگى ءباسپاسوز قىزمەتى كەلتىرگەن دەرەككە جۇگىنسەك, ايماقتاعى وزگە دە ەلدى مەكەندەردى كوگىلدىر وتىنمەن قامتۋ بويىنشا اۋقىمدى جۇمىستار اتقارىلعان. وسى جىلدىڭ باسىندا قىزىلاۋىت جانە اقتوبە اۋىلدارى تۇرعىندارىنىڭ تالاپ-تىلەگى ەسكەرىلىپ, ەلدى مەكەندەر كوگىلدىر وتىن جۇيەسىنە قوسىلىپتى.
كەيىنگى جىلدارى كەزىندە اتى دۇركىرەگەن اقكول اۋىلىنا جەرگىلىكتى بيلىك تاراپىنان ايتارلىقتاي كومەك كورسەتىلىپ جاتىر. اۋىل ىشىندەگى جولداردى جوندەۋ جۇمىستارى جۇيەلى تۇردە جۇرگىزىلدى.
«اۋدانىمىزداعى ىرگەلى اۋىلداردىڭ ءبىرى سانالاتىن اقكول اۋىلى حالقىنىڭ كوكەيكەستى ماسەلەلەرىن شەشۋ بويىنشا ناقتى جۇمىستار قولعا الىنعانىن ايتا كەتكەن ءجون. ماسەلەن, 2021-2023 جىلدار ارالىعىندا ەلدى مەكەندەگى 20 كوشەنىڭ جولى جوندەۋدەن وتكىزىلدى. جاياۋ جۇرگىنشىلەرگە ارنالعان جول جولاقتارى قالىپقا كەلتىرىلدى. قازىرگى كەزدە كوشەلەردى تولىققاندى جارىقتاندىرۋ جۇمىستارى جۇرگىزىلىپ جاتىر», دەيدى تالاس اۋدانىنىڭ اكىمى نۇربول جۇنىسبەكوۆ.
رەسمي دەرەككە جۇگىنسەك, وبلىس اۋماعىنداعى ەلدى مەكەندەردى تابيعي گازبەن قامتۋ ماقساتىندا وتكەن جىلى 11,8 ملرد تەڭگە قارجىعا 11 جوبا ىسكە اسىرىلعان. ونىڭ التاۋىنىڭ جۇمىسى 2024 جىلعا وتپەلى. قازىرگى تاڭدا ءوڭىر حالقىن تابيعي گازبەن قامتۋ ۇلەسى 91,1 پايىزعا جەتكەن.
اۋىلداردى كوگىلدىر وتىنمەن قامتۋ جۇمىستارى بيىل دا ساتىمەن جالعاسپاق. وسى جىلى 11 اۋىلدا تۇراتىن 17 مىڭ حالىقتى تابيعي گازبەن قامتۋ كوزدەلىپ وتىر. ناتيجەسىندە, كوگىلدىر وتىنمەن قامتاماسىز ەتىلگەن ءوڭىر حالقىنىڭ قاراسى 92 پايىزعا جەتەدى ەكەن.
اۋداندىق اكىمدىك وكىلدەرى كەلتىرگەن دەرەككە جۇگىنسەك, تالاس اۋدانىندا قاراتاۋ قالاسىن قوسا ەسەپتەگەندە 23 ەلدى مەكەن بار بولسا, سونىڭ 18-ءى گازداندىرىلعان, ياعني كورسەتكىش 75 پايىزدى قۇراپ وتىر. 2027 جىلدىڭ سوڭىنا دەيىن بۇل كورسەتكىشتى 100 پايىزعا جەتكىزۋ جوسپارلانعان.
جامبىل وبلىسى,
تالاس اۋدانى