اۋا رايىنىڭ قولايسىزدىعىنا قاراماستان, كەز كەلگەن ۋاقىتتا ناۋقاستارعا جەدەل جەتىپ, باستاپقى مەديتسينالىق كومەك كورسەتەتىن جەدەل جاردەم ستانساسى قىزمەتكەرلەرىنىڭ ەڭبەگى زور ەكەنى انىق. وعان جەلتوقسان ايىندا شۋ, قورداي اۋداندارىندا, قاڭتار ايىندا جۋالى اۋدانى اۋماعىندا بولعان ات قۇلاعى كورىنبەيتىن بوران كەزىندە دە كوز جەتكىزدىك. اۆتوكولىك جەتە الماعان مەكەنجايلارعا جاياۋ بارعان اق حالاتتى ابزال جانداردىڭ ەڭبەگى ەلەۋلى.
سارشۇناق ايازدا جولدا قالعان جولاۋشىلار مەن جول اپاتىنان جاراقات العان ازاماتتارعا جەدەل كومەك كورسەتكەن مەيىربيكەلەردىڭ ەڭبەگى ەسكەرۋسىز قالعان جوق. وڭىردەگى العاشقى مەديتسينالىق كومەك ۇيىمدارىنا 40 جەدەل جاردەم كولىگىنىڭ كىلتى تابىستالدى. وسىلايشا, توزىعى جەتكەن تەحنيكانىڭ ورنىن سۋ جاڭا اۆتوكولىكتەر الماستىردى. بۇل, ارينە, سالا قىزمەتكەرلەرىنە كورسەتىلگەن زور قامقورلىق ەكەنى داۋسىز.
وبلىس اكىمدىگى ءباسپاسوز قىزمەتى كەلتىرگەن دەرەككە جۇگىنسەك, وڭىردەگى جەدەل جاردەم كولىكتەرىن جاڭارتۋ جۇمىستارى وسى جىلى قارقىندى جۇرگىزىلمەك. ناتيجەسىندە, ەسكىرگەن تەحنيكانى ەداۋىر جاڭارتۋعا مۇمكىندىك تۋادى. جىل باسىندا 40 اۆتوكولىكتىڭ كىلتىن تاپسىرعان جەرگىلىكتى اتقارۋشى بيلىك 2024 جىلى سالا قىزمەتكەرلەرىنە تاعى 30 بىرلىك قىزمەتتىك كولىك تابىستاۋدى جوسپارلاپ وتىر. ناتيجەسىندە, تەحنيكانىڭ توزۋ كورسەتكىشى 47 پايىزدان 17 پايىزعا دەيىن تومەندەمەك. وسىلايشا, جەرگىلىكتى اتقارۋشى بيلىك جىلدار بويى قوردالانعان ماسەلەنى شەشۋدى قولعا الماق. بۇل – ارينە, قۇپتارلىق قادام.
«قاي دەڭگەيدە بولسىن, ءوڭىر حالقىنىڭ دەنساۋلىعىنا باسا نازار اۋدارۋىمىز كەرەك. بۇل – مەملەكەت باسشىسى قاسىم-جومارت توقاەۆ ساياساتىنىڭ باسىم باعىتتارىنىڭ ءبىرى. ءوڭىر تۇرعىندارىنىڭ دەنساۋلىعىن جاقسارتۋ – بارشامىزدىڭ ورتاق مىندەتىمىز. ءاربىر تۇرعىننىڭ تىلەگى نازاردان تىس قالماۋى كەرەك دەپ ەسەپتەيمىن. سول ءۇشىن جۇدىرىقتاي جۇمىلىپ ەڭبەك ەتۋىمىز كەرەك. سوندىقتان دا مەديتسينا سالاسىن وركەندەتۋگە ەرەكشە دەن قويىپ وتىرمىز. سالا قىزمەتكەرلەرى ءبىرىنشى كەزەكتە ساپاعا نازار اۋدارعانى ابزال. كۇن-ءتۇن دەمەي ەڭبەك ەتىپ جۇرگەن جەدەل جاردەم قىزمەتىنىڭ ەڭبەگى قاي كەزدە دە جوعارى باعاعا لايىق. مەيىربيكەلەردىڭ تىنباي تەر توگىپ جۇرگەنى بارشامىزعا ايان. وڭىردە اق حالاتتى ابزال جانداردىڭ قىزمەتى ساپالى ءارى قولجەتىمدى بولۋى كەرەك. ءبىز سول ءۇشىن دە سالا قىزمەتكەرلەرىنە قولدان كەلگەنشە قولداۋ كورسەتىپ جاتىرمىز. قازىرگى ۋاقىتتا مەديتسينا مەكەمەلەرىنىڭ عيماراتتارىن جاڭارتىپ, ماتەريالدىق-تەحنيكالىق بازاسىن نىعايتۋ جۇمىستارىن جالعاستىرۋعا نيەتتىمىز. ويتكەنى ۇلت ساۋلىعى قاي كەزدە دە ماڭىزى ەكەنى تۇسىنىكتى», دەدى ءوڭىر باسشىسى ەربول قاراشوكەەۆ جاڭا اۆتوكولىكتەردى تابىستاۋ راسىمىندە سويلەگەن سوزىندە.
جامبىل جەدەل جاردەم ستانساسى ءباسپاسوز قىزمەتى كەلتىرگەن دەرەككە جۇگىنسەك, وبلىس بويىنشا 93 جەدەل جاردەم بريگاداسى ءۇزىلىسسىز جۇمىس ىستەيدى. ونىڭ 53-ءى اۋدانداردا بولسا, قالعان 40 بريگادا وبلىستىق دەڭگەيدە ەڭبەك ەتىپ ءجۇر. جالپى العاندا, ءوڭىردىڭ مەديتسينا سالاسىن وركەندەتۋ جۇمىستارى سوڭعى ۋاقىتتا قارقىندى جۇرگىزىلىپ جاتقانى انىق. ءتۇرلى باعدارلامالار اياسىندا مەديتسينا نىساندارىن جاڭارتۋعا باسىمدىق بەرىلىپ وتىر.
2023 جىلى وبلىس بويىنشا 3,2 ملرد تەڭگەگە 24 مەديتسينالىق نىسانعا ءتۇرلى دەڭگەيدە قۇرىلىس جۇمىستارى جۇرگىزىلگەن. بۇل عيماراتتاردىڭ 10-نىڭ (1,7 ملرد تەڭگە) قۇرىلىسى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا قولعا الىنعانىن ايتا كەتكەن ءلازىم. جىل قورىتىندىسىنا سايكەس, جوعارىدا ايتىلعان 24 نىساننىڭ 19-ى پايدالانۋعا بەرىلگەن ەكەن. سونداي-اق 1,5 ملرد تەڭگەگە 11 نىسان كۇردەلى جوندەۋدەن وتكەنىن ايتا كەتكەن ءجون.
وڭىردە قاتەرلى ىسىك دەرتىنە شالدىققان ازاماتتارعا قولدان كەلگەنشە جاعداي جاساۋ ماسەلەسى دە ماڭىزدى بولىپ تۇر. اتى جامان اۋرۋمەن سىرقاتتانعان تۇرعىندار ەندى جاڭا عيماراتتا ەم قابىلداپ جاتىر. بىلتىر جالپى قۇنى 14,1 ملرد تەڭگەگە سالىنعان وبلىستىق ونكولوگيالىق ديسپانسەردە ناۋقاستارعا كومەك كورسەتۋدىڭ بارلىق العىشارتى قاراستىرىلعان ەكەن.
قالاي دەسەك تە ءوڭىردىڭ مەديتسينا سالاسىنىڭ جۇمىسىن وركەندەتۋگە كەيىنگى ۋاقىتتا قولدان كەلگەنشە قولداۋ كورسەتىلىپ جاتقانى داۋسىز. وبلىس اكىمى ە.قاراشوكەەۆتىڭ تاپسىرماسى نەگىزىندە سالاعا جاۋاپتى لاۋازىمدى تۇلعالار دا بارلىق باعىتتاعى جۇمىستى جۇيەلەپ جاتىر.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بيىل دا اۋقىمدا ىستەر قولعا الىنباق. دەرەككە سەنسەك, وسى جىلى 20 نىساننىڭ قۇرىلىسىن جۇرگىزۋ جوسپارلانعان.
جامبىل وبلىسى