كەڭەس اسكەرىنىڭ اۋعانستان اۋماعىنان شىعارىلعانىنا 35 جىل تولۋىنا وراي بۇگىن 36803 اسكەري ءبولىمىنىڭ اسكەري قىزمەتشىلەرى سەمەي قالاسىنداعى ينتەرناتسيوناليست-جاۋىنگەرلەرگە ارنالعان ەسكەرتكىشكە گۇل شوعىن قويۋ ءراسىمىن وتكىزدى, دەپ حابارلايدى Egemen.kz اباي وڭىرلىك اسكەري گارنيزونىنىڭ ءباسپاسوز قىزمەتىنە سىلتەمە جاساپ.
وعان اۋعان سوعىسىنىڭ ارداگەرلەرى – زاپاستاعى مايور ايدار ماناسوۆ پەن اعا پراپورششيك راحمانقۇل ابدىكاريموۆ باستاعان جاۋىنگەرلەر قاتىستى.
«بۇگىن اۋعان سوعىسىندا قازا تاپقان جاۋىنگەرلەرىمىز بەن ارداگەرلەرىمىزدىڭ ەرلىگىن ەسكە الۋعا جينالىپ تۇرمىز. سول سۇم سوعىستىڭ اياقتالعانىنا بيىل 35 جىل تولىپ وتىر. ولاردىڭ كوبى بۇگىندە ورتامىزدا جوق, قارۋلاستارىمىزدىڭ كەيبىرى ودان كەيىن دە ءتۇرلى سەبەپتەرمەن ومىردەن ءوتتى. اۋعانستان جەرىندەگى مايدان ءبىز ءۇشىن دە ەل تاريحىندا ەلەۋلى ورىن الاتىن وقيعالاردىڭ ءبىرى. وعان قاتىسقان بوزداقتارىمىزدىڭ جاساعان ەرلىگى ارقاشان جادىمىزدا», دەدى 36803 اسكەري ءبولىم كومانديرىنىڭ ورىنباسارى, پودپولكوۆنيك بەكبولات سۇلتانباەۆ.
جينالعان اسكەري قىزمەتشىلەر مەن وتباسى مۇشەلەرى ەسكەرتكىش الدىنا گۇل شوقتارىن قويىپ, ەرلىكپەن قازا تاپقان جاۋىنگەرلەردى ءبىر مينۋتتىق ۇنسىزدىكپەن ەسكە الدى. وسى كۇندى جانە قارۋلاس دوستارىن ەسكە الۋعا كەلگەن اۋعان سوعىسىنىڭ ارداگەرلەرى وسكەلەن ۇرپاققا ەرلىككە تاعزىم جاساعانى ءۇشىن العىس ءبىلدىردى.
تاريح پاراعىنا كوز جۇگىرتەر بولساق, 1979 جىلى كەڭەس اسكەرلەرىنىڭ قاتارىنداعى ساربازدار ينتەرناتسيونالدىق بورىشىن وتەۋ ءۇشىن اۋعان جەرىنە اتانعان ەدى. ون جىلعا سوزىلعان سول ءبىر ادىلەتسىز سوعىستا قازاق دالاسىنان اتتانعان 22 مىڭعا جۋىق ازامات اۋعانستانعا بارىپ, ونىڭ قاتارىندا 900 سارباز قازا تاپسا, 20-ى حابار-وشارسىز كەتكەن ەدى.
ال قازىرگى كۇندەرى سەمەي قالاسىندا 400-گە جۋىق سول ءبىر سۇراپىل كۇندەردىڭ كوزى ءتىرى كۋاگەرلەرى بار.