قايعىلى وقيعا 10 اقپان كۇنى سامارا-شىمكەنت تاس جولىنىڭ 1285 شاقىرىمىندا بولعان. قىزىلوردا قالاسىنداعى «قازاۆتوجول» فيليالىنىڭ قىزمەتكەرى قىزمەتتىك مىندەتىن اتقارۋ كەزىندە قايتىس بولعان, دەپ حابارلايدى Egemen.kz.
بۇل تۋرالى بۇگىن, 13 اقپاندا «قازاۆتوجول» كومپانياسىنىڭ ءباسپاسوز قىزمەتى حابارلادى.
«2024 جىلدىڭ 10 اقپانىندا ساعات 14:00 شاماسىندا سامارا-شىمكەنت تاس جولىنىڭ 1285-شاقىرىمىندا جانتۇرشىگەرلىك وقيعا بولدى. وقيعا سالدارىنان (تۇرعان كولىكپەن سوقتىعىس) قىزىلوردا قب باس مامانى «قازاۆتوجول» ۇك» اق وبلىستىق فيليالى سىدىقوۆ ساقتاپبەرگەن باقىتجان ۇلى ءوزىنىڭ تىكەلەي مىندەتىن اتقارۋ كەزىندە قايتىس بولدى», دەپ حابارلادى كومپانيانىڭ ءباسپاسوز قىزمەتى.
سامارا-شىمكەنت تاس جولىنىڭ ارال اۋدانى سازدى اۋىلى ۋچاسكەسىندە قوزعالىس قايتا جاندانعاننان كەيىن Toyota Alphard كولىگى كومپانيا قىزمەتكەرى تۇرعان جەردە توقتاعان كولىكپەن سوقتىعىسقان.
«سوقتىعىس سالدارىنان ول وقيعا ورنىندا كوز جۇمدى. مارقۇم قىزىلوردا وبلىستىق فيليالىنىڭ باس مامانى بولىپ, كومپانيادا التى جىلدان استام جۇمىس ىستەپ, ءوزىن ادال, كاسىبي قىزمەتكەر رەتىندە كورسەتتى. ساقتاپبەرگەن سىدىقوۆتىڭ ارتىندا ءتورت بالاسى مەن جۇبايى قالدى», دەپ قوستى كومپانيا.
ۇلتتىق كومپانيا مارقۇمنىڭ وتباسىنا قارجىلاي كومەك كورسەتىلەتىنىن مالىمدەدى.