ۇلت كەسكىندەمە ونەرىنىڭ تارلانبوزى ءابىلحان قاستەەۆتىڭ تۋعانىنا بيىل 120 جىل تولىپ وتىر. ۇلتتىق بەينەلەۋ ونەرى دەسە, ءابىلحان قاستەەۆتىڭ ەسىمىن برەند دەپ بىلەمىز. حالىق سۋرەتشىسىنىڭ «كوگىلدىر كويلەكتى قىز», «امانگەلدى ساربازدارى», «قالىڭدىق» سەكىلدى وزگە دە تۋىندىلارىن زامانداستارى, مايتالمان ماماندار جوعارى باعالاعانى انىق.
بەينەلەۋ ونەرى الىبىنىڭ مەرەيتويىنا وراي تاراز قالالىق «اناعا تاعزىم» ورتالىعىنىڭ ۇيىتقى بولۋىمەن ءىس-شارا ءوتتى. قاستەەۆ مۇراسىن حالىق اراسىندا كەڭىنەن ناسيحاتتاۋ ماقساتىندا ۇيىمداستىرىلعان ءىس-شاراعا جەرگىلىكتى سۋرەتشىلەر قاتىسىپ, برودسكي ستۋدياسىندا شەبەرلىگىن ۇشتاعان ونەر يەسىنىڭ تۋىندىلارى تۋرالى ويلارىن ورتاعا سالدى.
«ۋاقىتىندا ءابىلحان قاستەەۆتى ءوز كوزىممەن كورىپ, قايتالانباس تۇلعانىڭ قاسىندا بولدىم. داڭقتى سۋرەتشىنىڭ گالەرەياسىنان اكەمنىڭ پاروۆوز جۇرگىزىپ بارا جاتقان كارتيناسىن تاماشالاپ, كەرەمەت سەزىمدى باستان كەشىرگەن ەدىم», دەدى ەڭبەك ارداگەرى گۇلباحرام اقىلوۆا وتكەن شاققا كوز جۇگىرتىپ.
ءىس-شارا بارىسىندا ءسوز العان رەجيسسەر قارجاۋباي سىدىقنازاروۆ پەن قازاقستان سۋرەتشىلەر وداعى وبلىستىق فيليالىنىڭ جەتەكشىسى ايدارحان سيحاەۆ ءابىلحان قاستەەۆ كارتينالارىنىڭ ەرەكشەلىگى تۋرالى تولعامدى ويلارىن ءبولىستى.
«اسىلىندە سۋرەتشى ماماندىعىنا قىزىققان كەز كەلگەن جاس الماتىداعى قاستەەۆ گالەرەياسىن كوزبەن كورىپ, ونىڭ قولتاڭباسىنىڭ ەرەكشەلىگىن جۇرەكپەن سەزىنۋى كەرەك. ءابىلحان مۇراسىنىڭ ارتىقشىلىعىن تۇسىنگەن جاس قانا مىقتى مامان بولا الادى», دەدى ا.سيحاەۆ ءىس-شارا بارىسىندا سويلەگەن سوزىندە.
جاس تالانتتاردىڭ بەينەلەۋ ونەرىنە قىزىعۋشىلىعىن ارتتىرۋ, قاستەەۆ مۇراسىن ەل ىشىندە ناسيحاتتاۋ ماقساتىندا ۇيىمداستىرىلعان كەزدەسۋدە وزگە دە ماماندار پىكىرلەرىن ورتاعا سالدى. ونەرپازداردىڭ ادەمى اندەرىمەن ادىپتەلگەن ءىس-شارانىڭ جوعارى دەڭگەيدە وتۋىنە د.قوناەۆ اتىنداعى بالالار جانە جاسوسپىرىمدەر كىتاپحاناسى ۇجىمى اتسالىستى. كىتاپحاناشىلار ۇيىمداستىرعان كورمەنى تاماشالاعان كوپشىلىك ءابىلحان قاستەەۆ تۋىندىلارىمەن تەرەڭىرەك تانىستى.
تاراز