ينتەرنەت ارقىلى الداپ-ارباۋ – بۇگىنگى قوعامنىڭ اسقىنعان «دەرتى». قۋلىق پەن ايلانىڭ مىڭ ءتاسىلى ءتۇرلى جولمەن جۇزەگە اسىپ جاتىر. قولدا بار قارجىسىن تانىمايتىن الدەكىمدەردىڭ اڭگىمەسىنە سەنىپ, اۋدارىپ جىبەرىپ, ارتىنشا سان سوعىپ قالىپ جاتقانداردى كۇندەلىكتى كورىپ تە ءجۇرمىز. الەۋمەتتىك جەلى ارقىلى تاۋار جارنامالاپ, «اسپاننان اقشا جاۋدىراتىندار» دا ءورىپ ءجۇر.
اباي وبلىستىق پوليتسيا دەپارتامەنتى ينتەرنەت الاياقتاردىڭ ايلا-شارعىسىنىڭ الدىن الىپ, ولارمەن كۇرەسۋگە بەلسەنە كىرىسىپ وتىر. دەپارتامەنتتىڭ ءباسپاسوز قىزمەتىنىڭ حابارلاۋىنشا, 2023 جىلى قالانىڭ 800-گە جۋىق تۇرعىنى ينتەرنەت الاياقتاردىڭ قۇربانى بولعان. قوڭىراۋ شالعاننىڭ ءبارىن وزىندەي كورەتىن جەرگىلىكتى «اقكوڭىل-اڭقاۋلار» الاياقتارعا 127 ملن تەڭگەدەن استام قاراجاتتى قالاي اۋدارىپ جىبەرگەنىن اڭعارماي قالعان.
وسىعان وراي 1-12 اقپان ارالىعىندا سەمەي قالاسىندا «ستوپ الاياق» جەدەل الدىن الۋ ءىس-شاراسى باستالدى. بىرەر كۇن بۇرىن قالا اكىمدىگىنىڭ عيماراتىندا وسى ءىس-شارانى ىسكە اسىرۋ ماسەلەلەرى بويىنشا ارنايى جيىن ءوتىپ, وعان شاھار اكىمى نۇربول نۇرساعاتوۆ, قالا پروكۋرورى ازامات ۋاليەۆ, پوليتسيا باسقارماسىنىڭ باسشىسى قايرات ابدىعاليەۆ جانە باسقا دا قوعامدىق ينستيتۋتتاردىڭ باسشىلارى مەن وكىلدەرى قاتىستى.
«وكىنىشكە قاراي, كيبەرقىلمىس, سونىڭ ىشىندە ينتەرنەت قولدانۋشىلارىنىڭ الاياقتىعى جيىلەپ كەتتى. وڭىردە 2023 جىلى ىسكە قوسىلعان «كيبەرپول» قاناتقاقتى جوباسى العاشقى ناتيجەسىن بەرە باستادى. بۇل باعىتتاعى قىلمىستىق ىستەردى ساپالى تەرگەۋ ءۇشىن ارنايى جەدەل تەرگەۋ توپتارى قۇرىلدى. ولاردىڭ كومەگىمەن الەۋمەتتىك جەلىلەردەگى اككاۋنتتار باقىلانىپ, 21 ۆەب-سايتتاعى 23 جالعان حابارلاندىرۋ بۇعاتتالدى. سونىمەن قاتار بۇل ءىس-شارالار ءىىم-ءنىڭ كيبەرقىلمىس ەرەجەلەرىن, ونىڭ ىشىندە 2025 جىلعا ارنالعان تەلەفون مەن ينتەرنەت الاياقتىققا قارسى كۇرەس باعدارلاماسىنىڭ ەرەجەلەرىن ىسكە اسىرۋ اياسىندا ءوتىپ جاتىر», دەيدى اباي وبلىستىق پد باسشىسى, پوليتسيا گەنەرال-مايورى سۇلتان بەكتورە.