ۇكىمەتتە ءبىرىنشى ۆيتسە-پرەمەر ومىرزاق شوكەەۆتىڭ توراعالىعىمەن شاڭعى سپورتىن دامىتۋ جونىندەگى ۇيىمداستىرۋ كوميتەتىنىڭ العاشقى وتىرىسى ءوتتى.
وتىرىستا سپورتتىڭ وسى ءتۇرىنىڭ قازىرگى دامۋ دەڭگەيى, ەلىمىزدە كەلەسى جىلى وتەتىن قىسقى ازيا ويىندارىنا دايىندىق ماسەلەلەرى قارالدى. سونىمەن بىرگە وندا ءو.شوكەەۆتىڭ شاڭعى سپورتى فەدەراتسياسىنىڭ پرەزيدەنتى بولىپ تاعايىندالعانى حابارلاندى. وسىعان بايلانىستى ول ءوز تاراپىنان سپورتتىڭ وسى ءتۇرىن دامىتۋعا جانە شاڭعىشىلاردىڭ حالىقارالىق جارىستاردا جوعارى ناتيجەلەر كورسەتۋلەرىنە بارلىق جاعدايدىڭ جاسالاتىنىن اتاپ ءوتتى. ونىڭ ايتۋىنشا, قازىر ەلىمىزدە قىسقى سپورت تۇرلەرى جاقسى دامىپ كەلەدى. دەگەنمەن, بەس ساۋساق بىردەي ەمەس دەگەندەي, شاڭعى جارىستارىندا وتانداستارىمىزدىڭ لايىقتى دەڭگەيدە ونەر كورسەتپەي جۇرگەنى جاسىرىن ەمەس. وسى ماسەلەنى ءبىر جاقتى شەشۋ ءۇشىن شاڭعى سپورتىنا مەملەكەت جانە جەكە بيزنەس تاراپىنان ۇلكەن قولداۋ قاجەت. بۇگىندە شىعىس قازاقستان مەن اقمولا وبلىستارى عانا سپورتتىڭ وسى ءتۇرىن دامىتۋعا باسا نازار اۋدارۋدا. بولاشاقتا ءبىزدىڭ الدىمىزدا شاڭعى سپورتى استانا مەن الماتى قالالارىندا, الماتى وبلىسى مەن سولتۇستىك وڭىرلەردە دامىتۋ مىندەتى تۇرۋى ءتيىس.
وتىرىستا ءو.شوكەەۆ وسى ماسەلەنى شەشۋ ءۇشىن بىرقاتار تاپسىرمالار بەردى. سونىڭ ىشىندە ول الداعى كەزدە استاناداعى ورتالىق پاركتە شاڭعى بازاسىن, ريددەردە شاڭعى روللەر تراسساسىن سالۋ كەرەكتىگىن ايتتى. ءسوزىنىڭ سوڭىندا فەدەراتسيا پرەزيدەنتى بولاشاقتا قازاقستاننىڭ قىسقى سپورتىنىڭ برەندىن جاساۋ ءۇشىن قازىر “استانا” ۆەلوكلۋبى سياقتى شاڭعىدان مىقتى ءبىر كوماندا جاساقتاۋ كەرەك دەگەن پىكىرىن ءبىلدىردى.
داستان كەنجالين.