2023 جىلى 5 مامىردا وتكەن بۇكىلارميالىق كەڭەستە مەملەكەت باسشىسى قاسىم-جومارت توقاەۆ بارلىق اسكەري قىزمەتشىلەرگە ارنالعان جاڭا كيىم ۇلگىسىن ماقۇلداعان بولاتىن. قورعانىس مينيسترلىگى قوعامدىق تالقىلاۋدان كەيىن, اسكەريلەردىڭ جاڭا فورماسىن تانىستىردى, دەپ جازادى Egemen.kz.
«ەندى اسكەري قىزمەتشىلەر قاراكول جاعالى قىسقى كۋرتكانىڭ ورنىنا «الياسكا» ءتيپتى كۋرتكالار كيەدى. جوعارى وفيتسەرلىك قۇرامنان وزگە اسكەري قىزمەتشىلەردىڭ باس كيىمدەرى كۇنقاعارسىز بولادى. ماۋسىمدىق كۇندەلىكتى پلاشش كامۋفلياج ءتۇستى دالالىق كۇرتەشەگە, ال كۇندەلىكتى سۆيتەر دالالىق سۆيتەرگە اۋىستىرىلدى. اسكەري قىزمەتشى ايەلدەر ءۇشىن پيلوتكانىڭ ورنىنا كەپي قاراستىرىلعان. جوعارى وفيتسەرلىك قۇرامنان, قورعانىس مينيسترلىگى مەن باس شتابتىڭ قۇرىلىمدىق بولىمشەلەرىنىڭ, قارۋلى كۇشتەر باس باسقارمالارىنىڭ باستىقتارىنان, باس قولباسشىلاردان, قولباسشىلاردان جانە ولاردىڭ ورىنباسارلارىنان وزگە اسكەري قىزمەتشىلەردىڭ بارلىق ساناتتارى ءۇشىن كيتەل, شالبار, جەيدەلەر, گالستۋكتار الىنىپ تاستالدى», دەلىنگەن مينيسترلىك حابارلاماسىندا.
قازىرگى وفيستىك كيىم ۇلگىسى تەك باسقارۋ ورگاندارى, جوعارى وقۋ ورىندارىنىڭ تۇراقتى قۇرامى, اسكەري ءبولىم كومانديرلەرى, ولاردىڭ ورىنباسارلارى جانە اسكەري قاتىناستار كومەنداتۋرالارى ءۇشىن كۇندەلىكتى فورما بولادى.
قارا ءتۇستى قونىشى ۇزىن باتەڭكەمەن قاتار تۇراقتى قۇرامدى قۇم ءتۇستى جازعى باتەڭكەمەن قامتاماسىز ەتۋ قاراستىرىلعان. بۇل نۇسقا ەلىمىزدىڭ گەوگرافيالىق ەرەكشەلىكتەرىنە, سونداي-اق ىستىق وتكىزبەيتىن جانە ماتەريالدىق قاسيەتتەرىنە بايلانىستى تاڭدالعان.
جاڭا ۇلگىدەگى دالالىق كيىم-كەشەككە كوشۋ 2024 جىلدىڭ ءتورتىنشى توقسانىنا, قالعان ۇلگىدەگى جاڭا ديزاينداعى اسكەري فورماعا اۋىسۋ الداعى ءۇش جىل كولەمىنە جوسپارلانعان.
بۇعان دەيىن ەل اسكەرىنىڭ جاڭا ۇلگىدەگى فورماسى قوعامدىق تالقىلاۋعا ۇسىنىلعانىن حابارلاعان بولاتىنبىز.