ەلىمىزدە بىرىڭعاي ۋاقىت بەلدەۋى بەلگىلەندى

«قازاقستان رەسپۋبليكاسىنىڭ اۋماعىندا ۋاقىتتى ەسەپتەۋ ءتارتىبى تۋرالى» ۇكىمەت قاۋلىسىنا وزگەرىستەر ەنگىزىلگەن بولاتىن. وزگەرىستەرگە سايكەس, 2024 جىلعى 1 ناۋرىزدا ساعات 00:00-دەن باستاپ ەلدىڭ بۇكىل اۋماعىندا بىرىڭعاي ۋاقىت بەلدەۋى ورناتىلادى.

وسىلايشا, قازاقستاننىڭ بۇكىل اۋماعىنا 5-ءشى ۋاقىت بەلدەۋى (UTC+5) قولدانىلادى.

«قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 جىلعى 23 قاراشاداعى N 1749 قاۋلىسىنا ەنگىزىلگەن وزگەرتۋلەرگە سايكەس, «استانا, الماتى قالالارىنىڭ اكىمدىكتەرى, شىمكەنت, اقمولا, الماتى, جامبىل, قاراعاندى, قوستاناي, پاۆلودار, سولتۇستىك قازاقستان, تۇركىستان, شىعىس قازاقستان وبلىستارىندا جانە اباي, جەتىسۋ, ۇلىتاۋ وبلىستارىندا 2024 جىلعى 29 اقپاننان 1 ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعاتقا ارتقا قويۋ كەرەك».

ايتا كەتسەك, بۇگىندە قازاقستاندا UTC+5 جانە UTC+6 ەكى ۋاقىت بەلدەۋى بار. ەل اۋماعىنىڭ كوپ بولىگى (باتىس وبلىستاردى قوسپاعاندا) UTC+6 ايماعىندا ورنالاسقان.

ەلىمىزدە بىرىڭعاي ۋاقىت بەلدەۋىن ورناتۋدى ۋاقىتتى ەسەپتەۋ ماسەلەلەرى جونىندەگى جۇمىس توبىنا كىرگەن وتاندىق عالىمدار مەن ساراپشىلار ۇسىنعان.

جۇمىس توبى 2023 جىلدىڭ اقپانىندا ەل ازاماتتارىنىڭ ەڭ قولايلى ۋاقىت بەلدەۋىنە كوشۋ تۋرالى بىرنەشە مارتە كەلىپ تۇسكەن وتىنىشتەرىنە بايلانىستى قۇرىلعان. ونىڭ قۇرامىنا عىلىمي ينستيتۋتتاردىڭ, مەديتسينالىق جوعارى وقۋ ورىندارىنىڭ, ورتالىق جانە جەرگىلىكتى مەملەكەتتىك ورگانداردىڭ وكىلدەرى, پارلامەنت دەپۋتاتتارى جانە ت. ب. كىردى.

جۇمىس توبىنا قاتىسۋشىلار UTC+5 بىرىڭعاي ۋاقىت بەلدەۋىنە كوشۋ ەڭ دۇرىس جانە وڭتايلى نۇسقاسى ەكەنىن جانە قازاقستاننىڭ كوپتەگەن ايماقتارى تابيعي ۋاقىتقا ەڭ جاقىن ۋاقىتتى پايدالاناتىن بولادى دەگەن ورتاق پىكىرگە كەلدى.

بۇل رەتتە جۇمىس توبى حالىقارالىق تاجىريبەنى سارالاپ, الەمنىڭ 175 ەلىندە بىرىڭعاي ۋاقىت بەلدەۋى قولدانىلسا, 22 مەملەكەت بىرنەشە ۋاقىت بەلدەۋىندە تۇر.

سونداي-اق ساراپشىلار بىرىڭعاي ۋاقىت بەلدەۋىن بەلگىلەۋ ەلىمىزدىڭ ءار ءوڭىرىنىڭ تۇرعىندارى اراسىنداعى ۋاقىتشا كەدەرگىلەردى جويىپ, كولىك جانە باسقا دا كوممۋنيكاتسيالاردى ۇيلەستىرۋدى جاقسارتىپ, بيزنەستى جۇرگىزۋگە, مەملەكەتتىك ورگانداردىڭ ءوزارا ءىس-قيمىلىنا وڭ اسەرىن تيگىزەتىنىن اتاپ ءوتتى.

قاۋلى رەسمي تۇردە جاريالانىپ, 2024 جىلعى 1 ناۋرىزدان باستاپ قولدانىسقا ەنگىزىلەدى.