تالدىقورعان قالاسىنا ىرگەلەس ورنالاسقان ساياجايلار مەن ەلدى مەكەندەرگە كوڭىل بولىنە باستادى. وزدەرىن «قالالىقپىز» دەپ سانايتىن تۇرعىندار ەندى بۇل ءسوزدى ماقتانىشپەن ايتسا بولعانداي. ماسەلەن, ىنتىماق اۋىلىنا گاز كەلسە, بالىقتى ساياجايىنىڭ تۇرعىندارى ءۇشىن جاڭا كوپىر قولدانىسقا بەرىلدى. بۇل – قالاداعى مەكتەبىنە اسىققان بالالارعا ۇلكەن كومەك.
اۋەلى بالىقتى ساياجايىنداعى كوپىردىڭ جايىنا توقتالساق. بۇعان دەيىن ەسكى كوپىردەن قاراشا حالىق قورقاسوقتاپ وتەتىن. اسىرەسە وبلىس ورتالىعىندا وقيتىن بالالارى ءۇشىن قام جەگەن اتا-انالاردىڭ الاڭى وبلىس اكىمدىگىنىڭ دە مازاسىن كەتىردى. بۇل تۇيتكىل ءباسپاسوز بەتىندە دە تالاي كوتەرىلدى. جەتىسۋلىقتار قالا اكىمى ەرنات بازىلمەن جۇزدەسۋدە كوپىردىڭ ماسەلەسى شەشىلمەي كەلە جاتقاندىعىن, كوكتەم مەن كۇز ايلارىندا قيىندىق تۋعىزىپ, ەرىگەن قار سۋىنىڭ وتكەلدى باسىپ قالاتىندىعىن جەتكىزگەن. مۇنى جاقسى تۇيسىنگەن قالا باسشىسى بۇل ماسەلە ءوزىنىڭ تىكەلەي نازارىندا ەكەنىن ايتىپ, ۋادە بەرگەن-ءدى. بۇدان حالىقتىڭ قۋانىشقا كەنەلەر ءساتى الىس ەمەس ەكەندىگىن اڭعارعانبىز.
ءسويتىپ, قالا باسشىسى تۇرعىنداردىڭ وتىنىشىنە بەيجاي قاراماي, ماسەلەنى ەكى ايدىڭ ىشىندە وڭتايلى شەشىپ بەردى. ەندى ساياجايدا ەنى 4 مەتر, ۇزىندىعى 30 مەتر بولاتىن كوپىر ارقىلى ەش كەدەرگىسىز وتۋگە مۇمكىندىك تۋىپ وتىر. سودان دا بولار كوپىردىڭ اشىلۋ سالتاناتىنا حالىق كوپ جينالدى.
ء«بىز حالىقتىڭ ءوتىنىشىن جەرگە تاستاماۋ ءۇشىن سالا ماماندارىمەن كەڭەسىپ, وسى يگىلىكتى دۇنيەگە قول جەتكىزىپ وتىرمىز. قالامىزدىڭ دامۋى ءۇشىن كەز كەلگەن پروبلەمانى كەيىنگە قالدىرماۋ ماڭىزدى. شاما جەتكەنشە قالا سىرتىنداعى اۋىلداردى تۇرلەندىرۋگە بارىمىزدى سالامىز. بالالاردىڭ قاۋىپسىز ءومىر ءسۇرۋى ۇلتتىڭ بولاشاعىن كوركەيتەدى. قۋانىش قۇتتى بولسىن», دەدى ە.ءبازىل.
ايتا كەتەيىك, كوپىردىڭ وسى جولعى جوندەۋ جۇمىستارىنا 19 ملن تەڭگە ءبولىندى. بارلىق تالاپقا ساي, تولىقتاي قاۋىپسىزدىك ەرەجەلەرى ساقتالعان. تۇرعىندار مەن وقۋشىلار ەكى ورتاعا ەركىن قاتىناۋعا بولادى.
«وتە قۋانىشتىمىن. قانشاما جىلدان بەرى وسى ماسەلەنى كوتەرىپ كەلدىك. اكىم بەرگەن ۋادەسىندە تۇرىپ, كوپىر جوندەلدى. ەندى بالالارىمىز ءۇشىن الاڭدامايمىز. ايتپەسە, ساباقتان ءسال كەشىكسە, مازامىز كەتەتىن. ءتىپتى كەيبىر اتا-انالار كوپىردىڭ الدىنا شىعىپ كۇتىپ الادى. اۋىلدىق جەر بولعان سوڭ شارۋا كوپ. كەيدە ۇلگەرە دە الماي قالاسىن. بۇگىن سول ۋايىمىمىز سەيىلىپ, كوڭىلىمىز ءبىر جادىراپ قالدى», دەيدى ساياجاي تۇرعىنى مارات دۇيسەنبەكوۆ.
جالپى, تالدىقورعان شاھارى بىرتىندەپ كوركەيىپ كەلەدى. ءبىزدى قۋانتاتىنى بۇرىنعىداي حالىقتىڭ ۇزاق ۋاقىت كومىرگە كەزەككە تۇرمايتىنى. جىلدان-جىلعا قالا ىشىندە قارا وتىنعا سۇرانىس ازايىپ كەلەدى. كۇنى كەشە تاعى ءبىر تۇرعىن ءۇي الابىنا تابيعي گاز جەتكىزىلدى. ەندى ىنتىماقتاعى ەكى جارىم مىڭ اۋلانىڭ كوگىلدىر وتىنعا قوسىلۋعا مۇمكىندىگى بار
مەملەكەت باسشىسى جەتىسۋ وبلىسىنا جاساعان ساپارى بارىسىندا تالدىقورعان قالاسىن 2025 جىلعا دەيىن تابيعي گازبەن تولىق قامتاماسىز ەتۋ تۋرالى تاپسىرما بەرگەن بولاتىن. وسىعان وراي, وتكەن جىلى تالدىقورعان قالاسى ماڭىنداعى ء«ۇيتاس» ساياجايىنا, «جاستار-2» اۋىلىنا گاز بەرىلدى. ەندى مىنە, جاڭا جىلدا «ىنتىماق» اۋىلىنا گاز تارتىلىپ وتىر.
«ىنتىماقتا ەكى جارىم مىڭداي ابونەنت بار. بۇگىن وسى ەلدى مەكەندى گازداندىردىق. وسىنداي جۇمىستار الداعى ۋاقىتتا دا جالعاسىپ, قالا ماڭىنداعى 8 ساياجايدى گازداندىرۋ اياقتالادى. جالپى, 2025 جىلى تالدىقورعان قالاسى گازبەن تەگىس قامتاماسىز ەتىلەدى. وسى باعىتتا قازىر جۇيەلى جۇمىستار ءجۇرىپ جاتىر», دەيدى قالا اكىمىنىڭ ورىنباسارى قۋانىش باقىت ۇلى.
«ىنتىماق» تۇرعىن ءۇي الابىن گازداندىرۋ جۇمىستارىنا 1,4 ملرد تەڭگە جۇمسالعان. قۇرىلىستى «مبك قۇرىلىس» جشس 2022 جىلدىڭ سوڭىندا باستاعان. بۇگىندە 113,5 كم گاز جەلىسى تارتىلدى. جىل سوڭىنا دەيىن ءالى دە جوندەۋ جۇمىستارى جالعاسادى.
قازىرگى كەزدە تالدىقورعان قالاسىندا حالىقتىڭ 90 پايىزىنىڭ گازعا قوسىلۋىنا جاعداي جاسالعان. بۇل رەتتە جالپى سانى 54,4 مىڭ ابونەنتتىڭ 32,5 مىڭى نەمەسە 59 پايىز كوگىلدىر وتىننىڭ يگىلىگىن كورىپ وتىر. الداعى جىلدارى اۋىل تۇرعىندارى كومىرگە كەزەككە تۇرمايتىن بولادى.
جەتىسۋ وبلىسى