كاسىپ يەسىنىڭ ەسەپشوتىنا 3 ايدا 100-دەن اسا ءموبيلدى اۋدارىم كەلىپ تۇسسە ارنايى سالىق تولەۋگە مىندەتتەلەتىنى بەلگىلى بولعالى بيزنەسمەندەر تۇتىنۋشىدان قولما-قول اقشا تالاپ ەتۋگە كوشكەن. الايدا مەملەكەتتىك كىرىستەر كوميتەتى ساتىپ الۋشىعا ەركىنەن تىس قولما-قول تولەمدى تالاپ ەتكەندەر قوماقتى ايىپپۇل ارقالايتىنىن ايتتى, دەپ جازادى Egemen.kz.
2024 جىلدىڭ 1 قاڭتارىنان باستاپ كاسىپكەرلەر ەلەكتروندى تولەمنەن باس تارتىپ جاتىر. كوپشىلىك كاسىپكەرلەردىڭ بۇل ىسىنە نارازىلىعىن ءبىلدىرىپ وتىر.
كەز كەلگەن كاسىپكەر نەسيە كارتاسى نەمەسە QR ارقىلى تولەم قابىلداماي قولما-قول ساتىپ الۋدى سۇراسا, الدىمەن ەسكەرتۋ بەرىلەدى. كەلەسى رەت قايتالانسا 150 مىڭ تەڭگە شاماسىندا ايىپپۇل سالىنادى.
«تولەمدەر جانە تولەم جۇيەلەرى تۋرالى» زاڭنىڭ نورمالارى بانك كارتاسى, QR-تولەم نەمەسە قولما-قول اقشامەن تولەۋ تاسىلدەرىن كوزدەيدى (25-باپ). كاسىپكەرلەرگە تولەم كارتوچكالارىن پايدالانا وتىرىپ تولەمدەردى قابىلداۋدان باس تارتقانى ءۇشىن اكىمشىلىك جاۋاپكەرشىلىك قاراستىرىلعان: ءبىرىنشى رەت ەسكەرتۋ, ءتارتىپتى قايتالاپ بۇزعان جاعدايدا - 147 680 تەڭگە (40 اەك*) مولشەرىندە ايىپپۇل سالىنادى», دەلىنگەن مەملەكەتتىك كىرىستەر كوميتەتىنىڭ مالىمەتىندە. ايتا كەتەيىك, وسى جىلدان باستاپ بانكتەر بيزنەس-شوتقا ەمەس, جەكە شوتقا 3 ايدا 100 ءموبيلدى اۋدارىم تۇسكەنىن انىقتاسا, بەلگىلى بولعان دەرەكتەردى سالىق باسقارماسىنا ۇسىنادى.