سەرپىلىسكە باستايتىن اشىق اڭگىمە

شىنىندا دا ەل-جۇرتتى, قاراپايىم حالىقتى, تۇتاس قوعامدى ويلاندىرىپ-توعاندىرىپ, ءتىپتى ەلەڭدەتىپ جۇرگەن ماسەلەلەر, سۇراقتار بارشىلىق بولاتىن. بۇگىنگى كۇندە قولىمىز جەتكەنى قايسى, قايدا جانە قايتىپ ىلگەرى بارا جاتىرمىز, قانداي اۋقىمدى ساياسي-الەۋمەتتىك وزگەرىستەر ءجۇرىپ جاتىر, ەكى جىل بۇرىنعى قاسىرەتتى قاڭتار ۋاقيعاسى ءتيىستى باعاسىن الدى ما, ودان قانداي ساباق الدىق, ەسكى بيلىكتىڭ سارقىنشاقتارى ءالى ەتەكتەن تارتىپ كەلەدى عوي, ولاردان قالاي قۇتىلامىز, ەكونوميكالىق دامۋدا تىڭ سەرپىلىستەر بار ما دەگەن سياقتى سان الۋان, وتە وزەكتى سۇراقتار وتە قاراپايىم تۇردە, ناقتى جاۋاپتارىن العانىن ەرەكشە اتاپ وتكەنىمىز ورىندى دەپ بىلەمىن.

قالىڭ قاۋىمدى ەرەكشە ۋايىمعا ۇرىندىرىپ جۇرگەن ۇلكەن ماسەلەنىڭ ءبىرى نەسيەسىن ۋاقتىلى وتەي الماي, قارىزعا بەلشەسىنەن باتۋى وتە كۇردەلى جاعداي ەكەنى راس. ونىڭ ۇستىنە قىمباتشىلىقتىڭ بەلەڭ العانى, تاريفتەردىڭ ءوسىپ جاتقانى, جۇمىسسىزدىقتىڭ بۇيىردەن قىسقانى وتىرىك ەمەس. مەملەكەت باسشىسى بۇل ماسەلەلەرگە دە ەگجەي-تەگجەيلى توقتاپ, شەشۋ امالدارىن ىسكە قوسىپ جاتقانىن سەنىمدى تۇردە جاريالادى. وتىن ەنەرگەتيكا كەشەنى مەن كوممۋنالدىق شارۋاشىلىقتارداعى مۇشكىل اقۋالدىڭ كوپ جىلدىق سالعىرتتىقتىڭ سالدارى ەكەنى دە اشىق ايتىلدى. بۇل رەتتە دە قولعا الىنعان شارالار مەن الداعى اتقارىلار ىستەر ناقتى تۇردە باياندالدى.

پرەزيدەنتىمىزدىڭ سۇحبات بارىسىندا ەرەكشە ءمان بەرىپ, نازار اۋدارعان ماسەلەسى – ۇلتىمىزدىڭ بولاشاعى, ءوسىپ-وركەندەۋى دەر ەدىم. قوعامدا ەڭبەكقورلىق پەن جاسامپازدىق جوعارى باعالانۋعا, بىلىمپازدىق پەن جاڭاشىلدىق سالتانات قۇرۋعا ءتيىس. ء«بىز وزىق ويلى ۇلت رەتىندە حالقىمىزدى ىدىراتاتىن ەمەس, بىرىكتىرەتىن جولدى تاڭداپ, تەك قانا العا قاراۋىمىز كەرەك», دەدى ول. شىنىندا دا دۇنيەتانىمىمىزعا جات مادەنيەتتەرگە كوزسىز ەلىكتەۋدەن, جالعان پاتريوتيزمنەن, داڭعويلىق پەن داراقىلىقتان ساقتانۋىمىز كەرەك. مەملەكەت باسشىسى ەرەكشە اتاپ وتكەندەي «ەڭبەكقورلىق, بىلىمپازدىق, كاسىبيلىك, بىرلىك, ىنتىماق, جاڭاشىلدىق, ىسكەرلىك, باستاماشىلدىق, ادالدىق, قاراپايىمدىلىق جانە ۇنەمشىلدىك – ناعىز وتانشىل, ادال ازاماتقا ءتان قاسيەتتەر مەن قۇندىلىقتار».

وسى قاسيەتتەر مەن قۇندىلىقتاردى جان-جاقتى دارىپتەپ, ۇرپاق ساناسىنا ءسىڭىرۋ باستى بورىشىمىز ەكەنىن, ەلىمىزدەگى ءبىلىم سالاسىنىڭ ۇستازدارى, وقىتۋشىلارى, پروفەسسورلارى مەن عالىمدارى تەرەڭ سەزىنىپ, ۇلكەن جاۋاپكەرشىلىكتى مويىنعا الىپ, ابىرويمەن اتقارۋعا كۇش-جىگەرىمىزدى, بۇكىل تاجىريبەمىزدى جۇمسايمىز دەپ حالقىمىزدى سەندىرەمىز.

ۇلىقپان سىدىقوۆ,

قازاقستاننىڭ ەڭبەك سىڭىرگەن قايراتكەرى, فيلوسوفيا عىلىمىنىڭ دوكتورى, ق.ي.ساتباەۆ اتىنداعى قازۇتزۋ پروفەسسورى, قر ۇلتتىق جاراتىلىستانۋ عىلىمدارى اكادەمياسىنىڭ اكادەميگى, قازاقستاننىڭ قۇرمەتتى جازۋشىسى