تەاتر جانە كينو الەمىندە تالاي وبرازدى سومداعان ونەر تارلانى تۇڭعىشباي جامانقۇلوۆقا دەگەن جامبىلدىقتاردىڭ قۇرمەتى قاشاندا زور. بىرنەشە جىل بويى اۋليەاتادا «تۇڭعىشباي تارازعا شاقىرادى» اتتى تەاتر فەستيۆالىنىڭ وتكىزىلۋى سوزىمىزگە دالەل بولسا كەرەك.
مەملەكەتتىك سىيلىقتىڭ لاۋرەاتى, جامبىل وبلىسىنىڭ قۇرمەتتى ازاماتى تۇڭعىشباي جامانقۇلوۆتىڭ 75 جىلدىعى جەرگىلىكتى اتقارۋشى بيلىكتىڭ نازارىنان تىس قالعان جوق. مەرەيتوي يەسىنىڭ قۇرمەتىنە ارنالعان ءىس-شارا اسقار توقپانوۆ اتىنداعى وبلىستىق قازاق دراما تەاترىندا ۇيىمداستىرىلدى.
بۇل كۇنى تەاترعا اعىلعان ونەرسۇيەر قاۋىمنىڭ قاراسى قالىڭ بولدى. جەرگىلىكتى جۇرت «ابىلاي حاننىڭ اقىرعى كۇندەرى» قويىلىمىن تاماشالاۋ, تەاتر تارلانىنا قۇرمەت كورسەتۋ ءۇشىن اسىقتى. ءىس-شاراعا ءوڭىر باسشىسى ەربول قاراشوكەەۆ تە ارنايى قاتىستى.
سپەكتاكلدى تارازدىق ونەرسۇيەر قاۋىممەن بىرگە تاماشالاعان ءوڭىر باسشىسى سوڭىرا مەرەيتوي يەسىن قۇتتىقتادى.
«بۇگىن ساحنالانعان «ابىلاي حاننىڭ اقىرعى كۇندەرى» قويىلىمى جۇرەكتى قوزعادى, كوپشىلىكتى تولعاندىردى. ءبىر سوزبەن ايتقاندا, تەاترعا كەلگەن جۇرتتىڭ كوڭىلىنەن شىقتى. قازاق ونەرى مەن رۋحانياتىندا ءسىزدىڭ ورنىڭىز بيىك شىڭعا اينالعانى اقيقات. مەرەيتويىڭىز قۇتتى بولسىن! جارتى عاسىردان استام ۋاقىت بويى اتقارعان تىنىمسىز ەڭبەگىڭىز ءۇشىن العىسىمىز زور. ءبىز سىزبەن قاي كەزدە دە ماقتانامىز. وتباسىڭىزعا باقىت, دەنىڭىزگە ساۋلىق تىلەيمىن. جاڭا رولدەرىڭىزبەن جەرلەستەرىڭىزدى قۋانتا بەرىڭىز», دەدى ە.قاراشوكەەۆ.
ءىس-شارا سوڭىندا وبلىس اكىمى مەرەيتوي يەسىنىڭ يىعىنا زەرلى شاپان جاۋىپ, قۇرمەت كورسەتتى.
تاراز