سەنات توراعاسى ماۋلەن اشىمباەۆ پالاتا اپپاراتىنىڭ جاس قىزمەتكەرلەرىمەن كەزدەستى. ديالوگ فورماتىندا وتكەن كەزدەسۋدە قاتىسۋشىلار مەملەكەت باسشىسىنىڭ جاستاردى قولداۋعا ارنالعان تاپسىرمالارىن ىسكە اسىرۋ بارىسىن تالقىلاپ, زاڭ شىعارۋ قىزمەتى مەن اپپارات جۇمىسىن جەتىلدىرۋگە قاتىستى يدەيالارىمەن ءبولىستى.
پالاتا سپيكەرى جاستاردى قولداۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى. ەلىمىزدە مەملەكەت باسشىسىنىڭ باستاماسىمەن كەشەندى رەفورمالار ىسكە اسىرىلىپ, ستراتەگيالىق باعدارلامالار مەن مەملەكەتتىك جوبالار قولعا الىندى.
«پرەزيدەنت قاسىم-جومارت توقاەۆ رەفورمالارىنىڭ نەگىزگى ماقساتى – قازاقستاندى ادىلەتتى, دەموكراتيالىق جانە ينكليۋزيۆتى مەملەكەت رەتىندە قالىپتاستىرۋ. بۇل باعىتتا اۋقىمدى جۇمىس اتقارىلىپ جاتىر. پرەزيدەنتتىك جاستار كادرلىق رەزەرۆى جاساقتالىپ, تالانتتى, ءبىلىمدى, بىلىكتى جاستارعا مەملەكەتتىك قىزمەتكە كەلۋدىڭ جاڭا ءبىر جولى اشىلدى. ءماجىلىس جانە ءماسليحات دەپۋتاتتارىنىڭ قاتارىندا جاستاردىڭ بولۋىن قامتاماسىز ەتەتىن نورمالار دا قابىلداندى. وسى رەتتە سەناتتىڭ زاڭ شىعارۋ قىزمەتىنە اپپاراتتاعى جاس قىزمەتكەرلەر دە ۇلكەن ۇلەس قوسىپ وتىرعانىن اتاپ وتكەن ءجون», دەدى ماۋلەن اشىمباەۆ.
سونداي-اق سەنات توراعاسى مەملەكەتتىك قىزمەت جۇيەسىن دامىتۋ, بيۋروكراتييانى ازايتۋ جانە كاسىبي بىلىكتىلىكتى ارتتىرۋ ماڭىزدى مىندەتتەردىڭ ءبىرى ەكەنىن ايتىپ, بۇل رەتتە مەريتوكراتيا قاعيداتىن كەڭىنەن قولدانۋ قاجەتتىگىنە نازار اۋداردى.
«مەريتوكراتيا قاعيداتى كەز كەلگەن ەڭبەكقور, پاتريوت ازاماتتىڭ ءوز سالاسىندا وسۋىنە جول اشادى. بۇل باعىتتا سەنات اپپاراتىندا جۇيەلى جۇمىس جۇرگىزىلىپ كەلەدى. ءبىز جوعارى لاۋازىمدارعا تاعايىنداۋ كەزىندە نەگىزىنەن ىشتەگى كادرلارعا باسىمدىق بەرەمىز. وسى جەردەگى جيناعان تاجىريبەلەرىڭىز بەن العان بىلىمدەرىڭىز الداعى ۋاقىتتا قايراتكەر تۇلعا بولىپ قالىپتاسۋلارىڭا ۇلكەن سەپتىگىن تيگىزەدى دەپ سەنەمىن», دەدى پالاتا سپيكەرى.
سونىمەن قاتار ماۋلەن اشىمباەۆ بەلسەندى جاستاردى قولداۋعا ارنالعان, ۆولونتەرلىك نەگىزدە جۇمىس ىستەيتىن سەنات جانىنداعى جاس ساراپشىلار كلۋبى مەن تالداۋ مەكتەبىنىڭ قىزمەتىنە دە نازار اۋداردى. ايتا كەتەيىك, الداعى قاڭتار ايىنىڭ ورتاسىندا تالداۋ مەكتەبىنىڭ ءۇشىنشى كەزەڭى باستالادى.
كەزدەسۋ بارىسىندا جاس مەملەكەتتىك قىزمەتشىلەر دە ءوز پىكىرلەرىن ءبىلدىرىپ, قولعا الىنعان جوبالاردى ىسكە اسىرۋعا جانە اپپارات جۇمىسىنىڭ تيىمدىلىگىن ارتتىرۋعا قاتىستى يدەيالارى مەن ۇسىنىستارىن ايتتى.