قازىر تالدىقورعاندىقتار جەتىسۋدىڭ ورتالىعىن شاعىن شاھار سانامايدى. ءزاۋلىم ۇيلەر مەن اسەم عيماراتتار جىل ساناپ ارتىپ, جاڭا شاعىن اۋداندار تۇرلەنىپ كەلەدى. جىلدار بويى قوردالانىپ قالعان تۇرعىن ءۇي ماسەلەسى دە شەشىمىن تاۋىپ جاتىر. ماڭايىنداعى اۋىلدار مەن ساياجايلار كوگىلدىر وتىنعا قول جەتكىزىپ, اۋىز سۋمەن قامتاماسىز ەتىلدى. قالا باسشىسى ەرنات ءبازىل حالىق ىشىندە ءجۇر, ءاربىر تۇرعىن ماسەلەسىن اكىمگە اشىق ايتا الادى.
جەتىسۋدا حالىقتى تابيعي گازبەن تولىقتاي قامتاماسىز ەتۋ جۇمىستارى جۇيەلى تۇردە ءجۇرىپ جاتىر. تالدىقورعان قالاسىندا بۇگىندە 32 466 ابونەنت گازدىڭ قىزىعىن كورىپ وتىر. ولاردىڭ قاتارىنا ء«ۇيتاس» ساياجايى مەن «جاستار-2» تۇرعىن ءۇي الابىنىڭ تۇرعىندارى دا كىردى. جالپى, قالا كولەمىندە ابونەنتتەردىڭ 58 پايىزى تابيعي گازعا قوسىلعان. كەلەر جىلى مويناق اۋىلى كەزەكتە تۇر.
«مويناق اۋىلىنا گاز كەلسە, 220 ءۇيدى قامتىماق. قالا اۋماعىن تولىق گازعا قوسۋ جۇمىستارى جۇيەلى تۇردە جۇرگىزىلىپ جاتىر. ءبىز الداعى ۋاقىتتا شامامەن 4 مىڭ تۇرعىندى گازبەن قامتىماقپىز. اتاپ ايتقاندا, «قاراتال», «قىزىلتاس», «مەرەكەلىك», «بالىقتى», «سارىبۇلاق», «المالى» جانە «اششىبۇلاق» ساياجايلارىمەن قاتار 1-بولىمشە تۇرعىن ءۇي الابىن دا گازداندىرامىز. وسىلايشا, قالا اۋماعىنىڭ گازعا تولىق قوسىلۋىن قامتاماسىز ەتەمىز», دەيدى قالا اكىمى ءبازىل ەرنات.
سونداي-اق 2 مىڭنان اسا تۇرعىندى قامتۋعا مۇمكىندىك بەرەتىن تاعى دا 2 جوبا جۇزەگە اسىرىلىپ جاتىر. ولار – «ىنتىماق» تۇرعىن ءۇي الابى مەن 6, 7-شاعىن اۋداندار جانە «اگروپرومىشلەننيك» ساياجايىن گازداندىرۋ.
ال اۋىز سۋمەن قامتۋ ماسەلەسىنە كەلسەك, بۇگىندە قالا اۋماعىن ورتالىقتاندىرىلعان تازا اۋىز سۋمەن قامتۋ 98 پايىزدى قۇراپ وتىر. بيىلدىڭ وزىندە قالا ىرگەسىندەگى «قىزىلتاس», «قاراتال» ساياجايلارى اۋماعىنا سۋ قۇبىرى تارتىلىپ, جۇمىستارى اياقتالۋعا جاقىن. سونىمەن قاتار «ۇلان» اسكەري قالاشىعىندا جانە «جاستار 1\1» تۇرعىن ءۇي الابىندا سۋ قۇبىرى جەلىلەرىن قايتا جاڭعىرتۋ جۇمىستارى باستالسا, كەلەر جىلى بۇل جۇمىستار ەركىن اۋىلىندا جالعاسادى. ايتا كەتەيىك, 2024 جىلى تالدىقورعان قالاسىندا 47,8 كم بولاتىن سۋمەن جابدىقتاۋ جەلىلەرى مەن 37,4 كم سۋ بۇرۋ قۇرىلىسى باستالماق.
ءبىلىم سالاسىنداعى وزەكتى ماسەلە – وقۋشى ورىندارىنىڭ تاپشىلىعى. وسى رەتتە سالىنعان ىنتىماق اۋىلىندا 1 200 ورىندى مەكتەپ قاڭتار ايىندا وقۋشىلاردى قابىلدايدى. سونىمەن قاتار 2024 جىلى «جايلى مەكتەپ» ۇلتتىق جوباسى اياسىندا جاستار-2 شاعىن اۋدانىندا, باتىس تۇرعىن اۋدانىندا جانە كوكتال اۋىلىندا 3 مەكتەپتى سالۋ جوسپارلانىپ وتىر. بۇدان بولەك, 2024-2025 جىلدارعا زاماناۋي IT كوللەدجىنىڭ قۇرىلىسى دەمەۋشىلەر ەسەبىنەن جانە وڭتۇستىك-باتىس تۇرعىن اۋدانىندا 1 200 ورىندىق مەكتەپ قۇرىلىسى ء«بىلىم بەرۋ ينفراقۇرىلىمىن قولداۋ قورىنىڭ» قاراجاتى ەسەبىنەن سالىنادى.
«بيىل بالالاردىڭ قاۋىپسىزدىگىن قامتاماسىز ەتۋ ماقساتىندا 26 مەكتەپ پەن 16 مەملەكەتتىك بالاباقشا ارنايى كۇزەتپەن, بەينەباقىلاۋ جۇيەلەرىمەن, دابىل تۇيمەلەرىمەن قامتاماسىز ەتىلدى. سونىمەن قاتار مەكتەپكە دەيىنگى بىلىممەن قامتۋ بويىنشا 4 جەكەمەنشىك بالاباقشا اشىلىپ, 1 مەملەكەتتىك بالاباقشا كۇردەلى جوندەۋدەن ءوتتى. جىل سوڭىنا دەيىن تاعى 1 جەكەمەنشىك بالاباقشا پايدالانۋعا بەرىلىپ, «التىن بەسىك» جەكەمەنشىك بالاباقشاسىندا قوسىمشا 40 ورىن اشۋ جوسپارلانىپ وتىر», دەيدى قالا باسشىسى ە.ءبازىل.
ونىڭ ايتۋىنشا, «قازاقستان حالىق بانكى» اق ەسەبىنەن فۋتبول الاڭىنىڭ قۇرىلىسى جىل سوڭىنا دەيىن اياقتالادى.
جالپى, وبلىس ورتالىعىنىڭ دامۋىنا كەلەتىن بولساق, 11 ايدا ونەركاسىپ ءوندىرىسىنىڭ كولەمى 117,7 ملرد تەڭگەنى قۇراعان, ءوسىم – 4 پايىز. جىل سوڭىنا دەيىن 130 ملرد تەڭگەگە ءونىم ءوندىرۋ جوسپارلانىپ وتىر. وسى جىلى 2 ونەركاسىپتىك كاسىپورىن ىسكە قوسىلعان. اتاپ ايتساق, «حالىق استىق ەكسپو» جشس. كاسىپورىن 30 جۇمىس ورنىنا ارنالعان اۋىل شارۋاشىلىعى ونىمدەرىن كەپتىرۋ ەلەۆاتورى. ەكىنشىسى – «التىنعاجينوۆ» ءجۇن كورپە ءوندىرۋ تسەحى. سونداي-اق «الماز كەراميكس» سەرىكتەستىگى ءوندىرىسىن كەڭەيتكەن. بۇگىندە كاسىپورىندا 260 ادام جۇمىس ىستەيدى.
وسى ورايدا «مەديسون-2008» جشس-نا توقتالا كەتسەك. اتالعان كاسىپورىن مەديتسينالىق ماقساتتاعى فورمالار مەن جيھاز, جابدىقتار شىعارۋمەن اينالىسادى. تالدىقورعان قالاسىندا ورنالاسقان كومپانيا ءوزىنىڭ قۋاتتى وندىرىستىك بازاسىنا يە. وندا 50-دەن اسا بىلىكتى مامان جۇمىس ىستەيدى. ولار اسىرەسە ءونىمنىڭ ساپالى شىعۋىنا ەرەكشە ءمان بەرەدى. بۇل جەردەن مەديتسينالىق كەرەۋەت, اربا, ديۆان, ۇستەل, ءدارى-دارمەك ساقتاۋعا ارنالعان شكاف سياقتى مەديتسينالىق جيھازدىڭ نەبىر ءتۇرى بار.
سونداي-اق ءوندىرىستى ودان ءارى دامىتۋ ءۇشىن كومپانيا مەملەكەتتىك قولداۋدى پايدالانا وتىرىپ, «2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا» باعدارلاماسى شەڭبەرىندە «نۇر بانك» اق-دان نەسيە الدى. كاسىپكەر ءۇشىن نەسيە مولشەرلەمەسى جىلدىق 8 پايىزدى قۇرايدى.
كومپانيا جەتەكشىسى الەكسەي شايكين الداعى ۋاقىتتا مەديتسينالىق مەكەمەلەردى تەحنيكالىق جابدىقتاۋدى عانا ەمەس, سونىمەن بىرگە مەديتسينالىق كيىم تىگۋمەن اينالىساتىن قىزمەتكەرلەردىڭ جۇمىس ۇدەرىسىن وڭتايلاندىرۋدى ويعا الۋدا.
قالادا 17 مىڭنان استام جۇمىس ىستەپ تۇرعان بيزنەس سۋبەكتىسى بار. بۇل وتكەن جىلمەن سالىستىرعاندا 16 پايىزعا جوعارى. جالپى, وبلىستا وندىرىلەتىن تاماق ونىمدەرىنىڭ 25 پايىزى تالدىقورعان قالاسىنىڭ ۇلەسىندە. حالىقتىڭ ماۋسىم ارالىعىنا كارتوپ پەن كوكونىسكە قاجەتتىلىگىن قامتۋ ءۇشىن «جەتىسۋ اگرو كەشەنى» كاسىپورنىنىڭ قويماسى قايتادان جاڭعىرتىلىپ, 6 مىڭ تونناعا جۋىق ءونىم ءارتۇرلى مەرزىمگە ساقتاۋعا سالىنعان. بيىل قىس-كوكتەم ايلارىندا, ماۋسىمارالىق قىمباتتاۋشىلىق كەزەڭىندە ولار شەكتەلگەن باعامەن ساتىلىمعا شىعارىلادى. الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ ماقساتىندا 18 ازىق-ت ۇلىك تاۋارىن ساتاتىن ەكى شاعىن الەۋمەتتىك دۇكەن اشىلعان.
ال باسپانا ماسەلەسى دە بىرتىندەپ شەشىمىن تاۋىپ كەلەدى. جاقىندا «بەرەكە» كوتتەدج قالاشىعىندا 11 وتباسىعا كوتتەدج ءۇي بەرىلدى. قونىسقا يە بولعاندار – كوپبالالى وتباسىلار ساناتىنداعى قالا تۇرعىندارى. ەستەرىڭىزگە سالا كەتسەك, بۇعان دەيىن قالا كۇنى قارساڭىندا 25 وتباسىعا وسىنداي باسپانالاردىڭ كىلتى بەرىلگەن ەدى. بۇگىندە وبلىس ورتالىعىندا تۇرعىن ءۇي كەزەگىندە 15 مىڭنان اسا ازامات تۇرسا, سونىڭ 315-ىنە پاتەر پايدالانۋعا بەرىلدى.ولاردىڭ دەنى – الەۋمەتتىك وسال توپقا جاتاتىن ازاماتتار.
«مەملەكەتتىڭ الەۋمەتتىك ساياساتىنىڭ باستى باعىتتارىنىڭ ءبىرى – حالىقتى تۇرعىن ۇيمەن قامتاماسىز ەتۋ. قازىرگى تاڭدا وڭىردە باسپانا تاپشىلىعىن ازايتۋ ءۇشىن ءارتۇرلى اۋقىمدى جۇمىس ىستەلىپ, جىل سايىن قۇرىلىس قارقىنى ارتىپ كەلەدى. بۇل جۇمىستاردى ەكى ەسە كۇشەيتۋىمىز قاجەت», دەيدى ە.ءبازىل.
مەملەكەت باسشىسى وبلىسقا كەلگەن جۇمىس ساپارىندا ءوڭىردىڭ الەۋمەتتىك-ەكونوميكالىق دامۋىمەن, سونداي-اق وبلىس ورتالىعىنداعى بىرنەشە نىساننىڭ تىنىس-تىرشىلىگىمەن تانىسىپ, اتقارىلىپ جاتقان ءىستى وڭ باعالاعان ەدى. توتىداي تۇلەگەن تالدىقورعان قالاسى ءوڭىردىڭ ماقتانىشى رەتىندە العا نىق قادام باسىپ كەلەدى.
جەتىسۋ وبلىسى