وتكەن جۇمادا «دارىن» مەملەكەتتىك جاستار سىيلىعىنىڭ لاۋرەاتتارى انىقتالدى. ۇزدىكتەردى ەلوردادا مادەنيەت جانە اقپارات ءمينيسترى ايدا بالاەۆا ماراپاتتادى.
«دارىن» سىيلىعى 1992 جىلدان باستاپ دارىندى جاستاردى عىلىمي, شىعارماشىلىق جانە سپورتتاعى جوعارى جەتىستىكتەرى ءۇشىن مەملەكەتتىك قولداۋ ماقساتىندا تاعايىندالعان. ءار جىلدارى ءتۇرلى سالاداعى 320-دان اسا ازامات اتالعان سىيلىقتى يەلەندى. سالتاناتتى راسىمدە ايدا بالاەۆا مەملەكەتتىك دەڭگەيدەگى بۇل ماراپاتتىڭ ماڭىزى ەرەك, جىگەرلى, اسقاق رۋحتى جاستارعا كورسەتىلگەن زور قۇرمەت ەكەنىن اتاپ ءوتتى.
«دارىن» – تاريحى دا, ءداستۇرى دە قالىپتاسقان, وسى ۋاقىتقا دەيىن جۇزدەگەن تالانتتى جاستىڭ شىعارماشىلىق جولىن اشقان ەرەكشە سىيلىق. ولاردىڭ ىشىندە ايگىلى سپورتشىلارىمىز ولگا شيشيگينا, دەنيس تەن, دينارا سادۋاقاسوۆا, بۇگىندە مادەنيەت قايراتكەرلەرى اتانعان ديماش قۇدايبەرگەن, ماريا مۋدرياك, «مۋز ارت» جانە « ۇلىتاۋ» توپتارى, جاس عىلىمدار ماكسيم زدوروۆەتس, ماقسات جاباعين, وسى كۇنى جۋرناليستيكا مايتالماندارىنا اينالعان گۇلناز الىمگەرەي, ماقپال جۇماباي, يرينا تەن سىندى دارىندار بار. ارينە, ونەر-ءبىلىم – ادامنىڭ تالابىنان تۋسا, ونىڭ ىشكى ءتالىمى مەن مادەنيەتى – تۇلعانىڭ زيالى ساناسى مەن ۇلتتىڭ ساپاسىنان. سوندىقتان دا پرەزيدەنت قاسىم-جومارت توقاەۆ زيالى, ينتەللەكتۋالدى ۇلت تۋرالى ايتقاندا, ەڭ الدىمەن, ونىڭ نەگىزىن قۇراۋشى – ونەرلى دە ءبىلىمپاز جاس قانا ەمەس, تەرەڭ سانالى, رۋحاني ساپالى جاندار تۋرالى ايتادى. مەملەكەت باسشىسىنىڭ كەيىنگى جىلدارى جۇرگىزىپ جاتقان اۋقىمدى رەفورمالارى دا وسىنداي جاستارىمىزدىڭ ەرتەڭى ءۇشىن جاسالىپ جاتىر. بولاشاق قازاقستاننىڭ الەمدىك ارەنادا شىن مانىندە وركەنيەتتى, زيالى دا زايىرلى, وزىق ويلى بولۋىنىڭ بىردەن-ءبىر كەپىلى دە وسى. ونىڭ نەگىزىندە قاراپايىم, بىراق وتە ماعىنالى بەس تالاپ جاتىر: ءبىلىم, ەڭبەكقورلىق, ادالدىق, جاۋاپكەرشىلىك جانە كاسىپقويلىق. بۇل قاسيەتتەردىڭ بارلىعى «دارىن» سىيلىعىنىڭ يەگەرلەرىنە ءتان, ءوسىپ كەلە جاتقان جاستارعا ۇلكەن ونەگە. ءبىر عانا ديماش قۇدايبەرگەننىڭ مىسالىندا وتانىمىزدى, ونىڭ مادەنيەتى مەن ءتىلىن تورتكۇل دۇنيەگە پاش ەتىپ جۇرگەن ونەرپازدى عانا ەمەس, ىشكى پاراساتى زور, ادامي ءتالىمى ۇلگى, جانى مەيىربان ازاماتتى كورەمىز. ءسوز جوق, بۇل جاستارعا دۇرىس باعىت كورسەتەتىن ونەگەلى جول», دەدى مينيستر.
بيىلعى «دارىندا» بىرقاتار وزگەرىس بولدى. ۇمىتكەرلەر جاسى 35-كە دەيىن ۇلعايتىلدى. «قوعامدىق قىزمەت» اتالىمى «كرەاتيۆتى باستامالار» دەپ وزگەرتىلدى. اتالىم كرەاتيۆتى يندۋستريا سالاسىن دامىتۋعا مەملەكەت تاراپىنان ەرەكشە نازار اۋدارۋعا بايلانىستى وزگەرىسكە ءتۇستى. وسى باعىتتى ىنتالاندىرۋ وڭىرلەردەگى باستامالارعا جۇيەلى تۇردە نازار اۋدارۋعا, ءتۇرلى جوبالاردى انىقتاۋعا جانە ولاردى كوتەرمەلەۋگە, ەڭ ۇزدىك يدەيالاردى ىسكە اسىرۋعا مۇمكىندىك بەرەدى.
تۇسكەن ءوتىنىمنىڭ سانى جىلداعىدان 50 پايىزعا كوپ. 340-قا جۋىق جاستىڭ جۇمىسى 10 نوميناتسيا بويىنشا ساراپقا سالىندى. ولارعا قوعام قايراتكەرلەرى مەن سالادا ايشىقتى ورنى بار تۇلعالار قازىلىق ەتتى. ناتيجەسىندە, 19 جاستىڭ جۇلدىزى جانىپ, ابىرويى اسقاقتادى. جەڭىمپازدارعا «دارىن مەملەكەتتىك جاستار سىيلىعىنىڭ لاۋرەاتى» اتاعى جانە ديپلوم, توسبەلگى مەن اقشالاي سىيلىق تابىستالدى. جەمىستى عىلىمي, شىعارماشىلىق, قوعامدىق قىزمەتى, سونداي-اق جوعارى سپورتتىق جەتىستىكتەرى ءۇشىن: «عىلىم» اتالىمى بويىنشا ينەش كەنجينا, ەلبەك وتەپوۆ, «ەسترادا» اتالىمى بويىنشا ايزادا ابدىقالىقوۆا, تولعاناي پازىلاقىن, «كلاسسيكالىق مۋزىكا» اتالىمى بويىنشا ايگەرىم امانجولوۆا, اقبيكە العي, «حالىق شىعارماشىلىعى» اتالىمى بويىنشا بولات دولداشەۆ, بەكبولات ابدىبەرىك ۇلى, «ديزاين جانە بەينەلەۋ ونەرى» اتالىمى بويىنشا دامير كاسيانوۆ, سالتانات جاپاروۆا, «جۋرناليستيكا» اتالىمى بويىنشا اقەركە بەكتاس, «كرەاتيۆتى باستامالار» اتالىمى بويىنشا ءادىلحان قوپاباەۆ, ايبەك قۋاتباەۆ, «سپورت» اتالىمى ريزابەك ايتمۇحان, جىبەك ق ۇلىمبەتوۆا, «ادەبيەت» اتالىمى بويىنشا باقىتبەك قادىر, مەيىرجان جىلقىباي, «تەاتر جانە كينو» اتالىمى بويىنشا ەركىنبەك پتىراليەۆ, فارحاد بۋلاتوۆ 2023 جىلعى «دارىن» مەملەكەتتىك جاستار سىيلىعىنىڭ لاۋرەاتتارى اتاندى.
ماراپاتتالعاندار اراسىندا ەل گازەتى «Egemen Qazaqstan» ءتىلشىسى, جاس جازۋشى باقىتبەك قادىر دا بار. باقىتبەك جازۋ شەبەرلىگى قالىپتاسقان, كوركەم شىعارماشىلىق الەمىندە ءوز قولتاڭباسىن تانىتىپ ۇلگەرگەن قالامگەر, «جاسىل شاتىرلار» اتتى ادەبي شىعارمالار جيناعى جارىق كورگەن.