قازاقستاننىڭ سەمسەرلەسۋشىلەرى بيىلعى ماۋسىمدى قورىتىندىلادى. ءتۇرلى جاس ەرەكشەلىكتەرى بويىنشا جالاۋى جەلبىرەگەن حالىقارالىق جارىستاردا جەرلەستەرىمىز 42 مەدالعا يەلىك ەتتى.
سولاردىڭ اراسىنداعى ەڭ قۇندىسى – شىلدە ايىنىڭ سوڭىندا ميلاندا وتكەن الەم چەمپيوناتىنىڭ قولا مەدالى. ونىڭ يەگەرى – رۋسلان قۇربانوۆ. «شپاگاشىلاردىڭ» سايىسىندا ول ماجارستاندىق ماتە تاما كوچ پەن يتاليالىق داۆيدە دي ۆەروليدەن عانا قالىپ قويدى. بۇل – وتاندىق سەمسەرلەسۋشىلەردىڭ دۇنيەجۇزىلىك دوداداعى تۇڭعىش جۇلدەسى. ءدال سول سپورتشىمىز الەم كۋبوگىنىڭ كەزەڭدىك سايىسىندا ءۇشىنشى ورىنعا تابان تىرەدى. اتالعان جارىستا ارتەم ساركيسيان («سابليا») كۇمىس مەدالدى موينىنا ىلسە, قۇرامىندا رۋسلان قۇربانوۆ, ەلمير ءالىمجانوۆ, ەرلىك سەرتاي, ۆاديم شارلايموۆ سىندى سايىپقىراندارى بار قازاقستان قۇراماسى («شپاگا») باس جۇلدەنى ولجالادى. بۇل باسەكەلەر يتاليانىڭ پادۋيا مەن لەنيانو جانە تۇركيانىڭ ىستانبۇل قالالارىندا ءوتتى.
قىتايدىڭ حۋانچجوۋ قالاسىندا الاۋى تۇتانعان ازيا ويىندارىنىڭ كوماندالىق سايىسىندا وتانداستارىمىز ءبىر كۇمىس پەن ءبىر قولانى ەنشىلەسە, ەلمير ءالىمجانوۆ ۇزدىك ۇشتىكتى تۇيىندەدى. سونداي-اق دۇنيەجۇزىلىك ۋنيۆەرسيادادا جەڭىپ العان قولا مەدالىمىز تاعى بار.