تەلەۆيزيادا وزەكتى الەۋمەتتىك ماسەلەلەردى كوتەرىپ, ەلدىڭ جۇرەگىندە قالعان جۋرناليست بەيسەن قۇرانبەكتىڭ ەڭبەگى ۇمىتىلمايدى. جىل سايىن جەتىسۋ جەرى اياۋلى پەرزەنتىن ەسكە الىپ, ءتۇرلى ءىس-شارا ۇيىمداستىرىپ كەلەدى. سونىڭ ءبىرى – شاعىن فۋتبولدان باق وكىلدەرى اراسىنداعى رەسپۋبليكالىق تۋرنير. بيىل ءۇشىنشى رەت وتكەن دوپ دوداسى جىلداعىداي تارتىستى بولدى.
ەلىمىزدىڭ تۇكپىر-تۇكپىرىنەن كەلگەن جۋرناليستيكا سالاسىنىڭ جاس تولقىنى مەن اعا بۋىنى تالدىقورعان تورىندە باس قوستى. وبلىس اكىمدىگىنىڭ قولداۋىمەن وتكەن الادوپ سايىسىنا بەيسەن قۇرانبەكتىڭ وتباسى, اعايىن-تۋىسى, دوس-جارانى تەگىس جينالدى. ءداستۇرلى تۇردە 9 جەلتوقسان تۋعان كۇنى قارساڭىندا وتەتىن شاعىن فۋتبول باسەكەسىنە ءار وبلىستان كەلگەن 8 كوماندا قاتىستى.
«بەيسەن اعا ءتىرى بولعاندا 52 جاسقا تولاتىن ەدى. ول كىسى دۇنيە سالعاننان كەيىن ەسكە الۋ ماقساتىندا وسىنداي ءىس-شارانى باستادىق. جىل سايىن ءتۋرنيردىڭ دەڭگەيى ءوسىپ كەلەدى. ويىنشىلاردىڭ دا دەڭگەيى جاقسارىپ جاتىر. فۋتزالعا قازاق جۋرناليستەرى توسەلىپ قالدى دەپ ايتساق بولادى», دەيدى ءتۋرنيردى ۇيىمداستىرۋشى ەسبولات ايدابوسىن.
وسى جارىسقا اكىمدىكتەن بولەك, «جەتىسۋ» تەلەارناسى, «جەتىسۋ» گازەتى, Respublica پارتياسى, Janr ادەبي كلۋبى قولداۋ كورسەتكەن. ەكى كۇن بويى تالدىقورعانداعى ءسۇيىنباي اتىنداعى جاستار سپورت سارايىندا جۇلدەلى ورىنداردى ساراپقا سالعان كوماندالار اراسىنان «Qaz365.kz» كومانداسى سۋىرىلىپ العا شىعىپ, ءبىرىنشى ورىندى يەلەندى.
ەكىنشى ورىن تالدىقورعاندىق «قارەكەت» كومانداسىنا بۇيىرسا, ءۇشىنشى ورىندى «الماتى-سانىك» كومانداسى قانجىعاعا بايلادى. ال ءتورتىنشى ورىن «J-19» كومانداسىنا بۇيىردى.
تۋرنيردە ۇزدىك ونەر كورسەتكەن جەكەلەگەن ويىنشىلار دا ماراپاتتالدى. اتاپ ايتساق, جۋرناليست نۇرتىلەۋ يمانعالي ۇلى اتىنداعى ارنايى جۇلدە اراي ەسەنبەككە, ال سايىن تۇرسىنوۆ اتىنداعى ارنايى جۇلدە جاندوس ايتباي ۇلىنا تابىستالدى.
جەتىسۋ وبلىسى